Јапонската централна банка ја урна цената на акциите

Цените на јапонските акции драстично паднаа, а јенот силно порасна во вторникот, откако Банката на Јапонија (BoJ) направи изненадувачки потег и ја олабави контролата врз приносите на обврзниците. Тоа е прв чекор кон нормализирање на монетарната политика, која досега беше исклучително поттикнувачка.

„Блумберг“ објави дека денот што започна со мал пад на тргувањето во Азија, по објавата на BoJ, која ја зголеми горната граница за толеранција на десетгодишната државна обврзница од 0,25 на 0,5 отсто, заврши со превирања на берзата. Најмногу паднаа берзанските индекси во Јапонија.

Притоа, на токиската берза индексот Nikkei потона речиси за 3 отсто, додека цените на акциите во Јужна Кореја, Шангај, Австралија и Хонгконг паднаа меѓу 0,9 и 2,2 отсто. Индексот на азиско-пацифичките акции MSCI, без Јапонија, беше во минус од 0,9 отсто околу 7 часот, откако ослабна втор ден по ред. Кинеските берзи повторно се под силен притисок поради зголемувањето на бројот на заболени од коронавирус, откако властите ги олеснија рестриктивните мерки. Исто така, инвеститорите се разочарани бидејќи кинеската централна банка не ги промени каматните стапки, а се очекуваше намалување на цената на парите за да се поттикне економскиот раст.

Јапонската валута се зголеми речиси за три отсто во однос на доларот, на највисоко ниво од средината на август, а приносот на јапонската десетгодишна обврзница се искачи на највисокото ниво од 2015 година, зголемувајќи се за повеќе од 20 базични поени.

„Јапонската централна банка повторно покажа дека стивнувањето е лошо. Ова е најголемото изненадување што го направија на пазарот откако се одлучија за негативни каматни стапки во јануари 2016 година“, коментира за „Блумберг“ Метју Симпсон, висок пазарен аналитичар во „Сити индекс“ (City Index).

Во понеделникот, на Волстрит цените на акциите паднаа четврти ден едноподруго. Dow Jones загуби 0,5 отсто, додека S&P 500 се лизна за 0,9 отсто, а индексот Nasdaq за 1,5 отсто. Инвеститорите се гневни од најавите на Федералните резерви дека не може да се очекува пад на каматните стапки во блиска иднина. Всушност, според последните информации од американската централна банка, тие ќе пораснат и повеќе од очекуваното. Се проценува дека ќе се достигне ниво од 5,1 отсто, додека претходно се очекуваше плафонот да достигне 4,6 отсто.

Доларот ослабе втор ден по ред, паѓајќи за 0,2 отсто, покажува индексот на „Блумберг“. И еврото ослабе за 0,2 отсто, при што едно евро вреди 1,0585 долар. Од друга страна, јапонскиот јен порасна за 2,8 отсто, на 6,9904 долари.

Зајакнаа и криптовалутите, биткоин за 1,1 отсто, на 16.771,13 долар, и етер за 2,6 отсто, на 1.206,4 долари.

Цените на фјучерсите на сурова нафта ВТИ пораснаа за 0,4 отсто, на 75,5 долари за барел, додека цената на златото остана речиси непроменета.

Во моментов нема коментари за веста. Биди прв да коментира...

Остави коментар