Ранг листа: Невиден раст кај одредени акции на Македонската берза

Голема причина за задоволство ќе имаат голем број од инвеститорите што „играа“ на Македонската берза во текот на 2024 година со оглед на тоа што веќе се покажува дека 2025 година ќе ја дочекаме со повеќе рекорди во однос на растот на вредноста на акциите, пред се на најатрактивните компании коишто го формираат берзанскиот индекс МБИ10. Тоа доведе до континуиран пораст на овој индекс кој на почетокот на годинава изнесуваше 6.154 индексни поени, а заклучно со вчерашниот ден неговата вредност достигна 9.833 индексни поени. Како што веќе пишуваше „Блумберг Адрија“, поради ваквите резултати МБИ10 во септември се најде меѓу топ пет берзански индекси во светот по остварениот раст од почетокот на годинава.

Најголем раст во апсолутен износ од 25.625 денари досега оствари акцијата на „Макпетрол“ чија просечна цена на почетокот на годинава беше 64.375 денари, а заклучно со минатата недела таа достигна 90.000 денари. Забележителен раст од 24.308 денари имаше и акцијата на „НЛБ Банка“, чијашто просечна цена се зголеми од 29.747 денари на 54.055 денари. Се истакнува и акцијата на „Комерцијална банка“ чијашто просечна цена се зголеми од 14.336 денари на 26.931 денари односно за 12.595 денари. За речиси десет илјади денари се зголеми и просечната цена на акцијата на „Алкалоид“, а од друга страна двојно порасна просечната цена на акцијата на „Македонијатурист“.

Доколку не се случи чудо до крајот на годината, извесно е дека акциите на „Македонијатурист“ годинава ќе имаат најголемо учество во берзанскиот промет со акции до оглед на тоа што од јануари до минатата недела вредноста на прометот со оваа акција изнесува 3,6 милијарди денари (околу 59 милиони евра), што е значително повеќе отколку второпласираната акција на „Комерцијална банка“ со којашто во истиот период е остварен промет во тргувањето од 2,5 милијарди денари (41,3 милиони евра).

„Блумберг Адрија“ во неколку наврати веќе пишуваше дека во „Македонијатурист“ подолг период има процес на ново окрупнување на сопственичкиот капитал што доведе до зголемен обем на тргување со акции на компанијата и значителни промени во сопственичката структура.

Токму затоа оваа компанија се наоѓа на врвот на листата на компании рангирани по количината истргувани акции. Сепак, акциите на „Комерцијална банка“ остануваат на врвот во однос на бројот на склучени трансакции, а на второто место се акциите на „Алкалоид“, што е само уште еден показател за атрактивноста на овие компании.