Кои македонски компании заработија милиони, а кои посакуваат подобри времиња?

На речиси еден месец до новата година, компаниите што котираат на Македонската берза веќе на големо ги анализираат остварените резултати во тековната година и коваат планови за следната година. Ако по утрото денот се познава, тогаш деветмесечните резултати се главен индикатор за тоа какви ќе бидат завршните биланси на успех за целата 2024 година.

„Блумберг Адрија“ веќе објави дека од вкупно 89 компании котирани на берзата, во периодот јануари-септември годинава 68 работеле со добивка, а 21 прикажале загуба. Остварениот вкупен нето-финансиски резултат на компаниите во овој период изнесува 300,6 милиони евра, што е зголемување од 21,6 проценти во однос на истиот период минатата година, кога вкупната нето-добивка изнесувала 247,2 милиони евра. Сепак, поединечните биланси на успех откриваат големи разлики во остварените финансиски резултати, без оглед на тоа дали компаниите доаѓаат од ист или од различни сектори на работење.

Нема зима за македонските банки

Меѓу најуспешните акционерски друштва во земјава по остварената нето-добивка, како и во претходниот период, се македонските банки. Сите седум банки што котираат на Македонската берза во периодот јануари-септември работеа со добивка. На ниво на сектор добивката во деветте месеци од 2024 година бележи зголемување на годишно ниво од 25,7 проценти.

Се разбира, има големи разлики во однос на остварените поединечни резултати меѓу банките, кои пред сѐ зависат од нивната големина. Како и во изминатите години, во Македонија најголем кајмак собираат најголемите играчи во банкарскиот сектор, како што се „Комерцијална банка“, „НЛБ банка“ и „Стопанска банка“ АД Скопје.

Фармацевтските компании газат напред, а не им оди лошо и на градежниците

Голема причина да бидат задоволни на крајот од годината извесно е дека ќе имаат акционерските друштва од фармацевтскиот сектор. Во периодот јануари-септември годинава двете компании што доаѓаат од фармацијата („Алкалоид“ и „Реплек“) забележаа зголемување на добивката.

Слична е состојбата и кај компаниите од градежниот сектор. „Гранит“ и „Фабрика Карпош“ остварија поголема добивка во деветте месеци од 2024 година во однос на истиот период минатата година.

Како е во осигурувањето, трговијата и угостителството?

Шаренолика е сликата кога станува збор за резултатите на компаниите од осигурителниот сектор и трговијата. Во првиот, „Македонија осигурување“ забележа загуба во периодот јануари-септември годинава, што го прави неизвесен крајниот финансиски резултат за 2024 година. Од друга страна, „Триглав осигурување“ забележа добивка што е значително помала во однос на истиот период минатата година.

Кога станува збор за трговијата со нафта, двете големи компании од овој сектор „Макпетрол“ и ОКТА бележат добивка во деветте месеци од 2024 година, иако кај ОКТА таа е многу помала во однос на добивката од истиот период минатата година.

Од другите компании што берзата ги рангира како трговски, се истакнува „Скопски пазар“, кој во деветте месеци од 2024 година бележи значително зголемување на добивката од 347 проценти во однос на истиот период минатата година. Сепак, има компании од трговскиот сектор што прикажаа загуба во периодот јануари-септември годинава.

Се чини дека угостителите ќе ја паметат 2024-та како одлична година ако ги задржат перформансите од деветте месеци. Имено, сите покажаа зголемување на добивката во однос на минатата година.

Неизвесност во индустријата, не е розово во земјоделството

На прсти можат да се избројат компаниите од индустрискиот сектор што забележаа загуба во периодот јануари-септември годинава. Повеќето од нив остварија зголемување на добивката иако се чини дека во оваа дејност неизвесноста за конечните годишни резултати е најголема, со оглед на тоа што некои од компаниите зависат од извозот на странските пазари, пред сѐ европскиот, каде што работите не се најсјајни во последните месеци од 2024 година, со оглед на тоа дека Германија, најголемата европска економија, постојано кокетира со рецесија.

Не е розова состојбата ниту кај акционерските друштва од земјоделскиот сектор во земјава, со оглед на тоа што некои од нив работеа со загуба во деветте месеци од годинава, а некои забележаа намалување на добивката.

Големи разлики има и кај остварените резултати меѓу компаниите од услужниот сектор во периодот јануари-септември годинава. Ретки се оние што остварија поголема добивка во однос на истиот период минатата година, а повеќето имаат или намалена добивка или загуба и ќе треба да се случи чудо за да ги подобрат резултатите во завршницата од 2024 година.  

 

 

Во моментов нема коментари за веста. Биди прв да коментира...

Остави коментар