Од што се плашат најголемите компании од Македонската берза?

Од вкупно 89 компании котирани на Македонската берза, во периодот јануари-септември годинава 68 работеле со добивка, а 21 прикажала загуба. Остварениот вкупен нето-финансиски резултат на компаниите во овој период изнесува 300,6 милиони евра, што е зголемување од 21,6 проценти во однос на истиот период минатата година, кога вкупната нето -добивка изнесувала 247,2 милиони евра. Одлични резултати имаат и компаниите што се дел од МБИ10, со оглед на тоа што од вкупно десет компании, осум имаат зголемување на добивката во однос на претходната година, а исклучок се „Македонски телеком“ и „ТТК банка“, кои бележат мало намалување на добивката.

Ваквите показатели најавуваат дека повеќето компании би требало да имаат одлична завршница на годинава. Сепак во меѓувреме се можни тектонски промени на геополитички план, пред сѐ по изборот на Доналд Трамп за претседател на САД, што може да доведе со своевидна трговска војна со Кина доколку се остварат најавите за воведување нови тарифи за увозот во оваа земја. Исто така можни се нови влијанија од војните во Украина и на Блискиот Исток, како и од политичката криза во Германија, која важи за економски мотор на ЕУ, а веќе се наоѓа во незавидна економска состојба.  

Во коментарите на остварените резултати заклучно со третиот квартал годинава, повеќето компании од МБИ10 ги забележуваат неизвесноста и можните негативни влијанија, но сепак покажуваат решителност за уште поголемо подобрување на резултатите во наредниот период.   

Непредвидливост околу цената на енергентите и синџирите на испораки

Имено, „Алкалоид“ соопшти дека трендот на работење во отежнати економски услови, кои беа актуелни во изминатите неколку години, сосема е извесно дека ќе продолжи и во 2024 година.

„Доминантни предизвици беа инфлацијата и порастот на каматните стапки, кои сепак, според сите очекувања, би требало да влезат во зоната на стагнација, а можеби и на мало опаѓање. Секако, глобалните безбедносни кризи ги отежнуваат економскиот амбиент и предвидливоста, што секогаш може да повлијае и врз цените на енергентите и да создаде тешкотии во синџирите на испораки, но и да повлијае врз достапноста на одредени материјали“, велат од компанијата.

Алкалоид

Сепак, оттаму очекуваат во 2024 година да продолжат по патеката на континуираниот раст базиран на можностите од тековните инвестиции во нови производствени капацитети и опрема и од вложувањата во развојноистражувачки проекти, на тој начин создавајќи конкурентно портфолио и можности за ширење на пазарите.

„За остварување на овие цели ќе продолжиме и со нови вработувања во земјава, но и на странските пазари, притоа континуирано вложувајќи во подигнување и во усовршување на нивото на знаења и на вештини на нашите вработени и во градење таленти“, соопшти „Алкалоид“.

Во согласност со досегашните резултати, при непроменети услови на пазарите во кои функционира „Алкалоид“, менаџментот на компанијата проценува надминување на планираните консолидирани продажби за 2024 година и за првпат реализирање износ од над 18,5 милијарди денари (300 милиони евра).

Рецесијата во Германија носи ризици

Од „Комерцијална банка“ соопштија дека макроекономските услови во кои банката ќе ја остварува својата активност до крајот на 2024 година се условени од домашните политички случувања, како и од сѐ уште неизвесниот и непредвидлив глобален амбиент и присутните ризици предизвикани од продолжената војна во Украина и разгорувањето на воениот конфликт на Блискиот Исток, послабиот раст на кинеската економија како втора по големина во светот, рецесијата во Германија како наш најголем трговски партнер и зголемениот финансиски стрес кај високозадолжените земји.

„Ваквиот амбиент создава ризици за економскиот раст, инфлацијата и екстерната позиција“, велат од банката.

Оттаму додаваат дека високото ниво на неизвесност во домашната економија и на меѓународен план упатува на потребата од поконзервативен пристап во обликувањето на очекувањата за 2024 година.

„Во согласност со најновите проекции од Светската банка, се очекува македонската економија во 2024 година да забележи раст на БДП од само 1,8 проценти наспроти пролетната проекција од 2,5 проценти и мајските проекции од НБРМ за раст на БДП од 2,6 проценти. Ваквата надолна корекција е резултат на долготрајните инфлациски притисоци, слабата надворешна побарувачка и одложената изградба на инфраструктурните проекти“, велат од банката.

Александар Димитриоски/Bloomberg Adria

Од банката очекуваат макроекономската стабилност да се остварува преку одржување на ценовната стабилност и стабилноста на номиналниот девизен курс на денарот во однос на еврото.

„Просечната годишна инфлација заклучно со крајот на третиот квартал изнесува 3,3 проценти, додека до крајот на 2024 година се очекува нејзино натамошно забавување. Сепак, нагорните ризици околу инфлацијата сѐ уште постојат и се поврзани главно со цените на примарните производи и промените на регулираните цени, како и со политиките на страната на побарувачката (расположливиот доход) и профитните маржи“, велат од Комерцијална банка.

Според КБ, се очекува дека банкарскиот систем и натаму ќе обезбедува солидна кредитна поддршка, во услови на почнато олабавување на монетарната политика, преземени макропрудентни мерки и континуирано зголемување на стапката за противцикличен заштитен слој на капиталот кај банките.

„Кредитниот раст во 2024 година би изнесувал околу 6,1 проценти, додека годишниот раст на депозитите се предвидува да биде околу 7,4 проценти. Комерцијална банка ќе ги презема сите неопходни активности за приспособување кон новонастанатите состојби“, велат од банката.

Од „НЛБ банка“ во претстојниот период очекуваат да се одржи макроекономската стабилност на државата како резултат на економскиот раст, намалувањето на стапката на невработеност, стабилизацијата на инфлацијата и намалувањето на каматните стапки. 

НЛБ банка

„Рејтингот на државата ББ+ со стабилна перспектива беше потврден од агенцијата за кредитен рејтинг „Фич“, како резултат на веродостојните и конзистентни макроекономски политики што го поддржуваа стабилниот девизен курс (де факто фиксниот девизен курс) на денарот во однос на еврото. Забрзувањето на растот на БДП се очекува да биде воден од владините капитални инвестиции во инфраструктурни проекти, како и од приватните инвестиции и потрошувачката“, велат од „НЛБ банка“.

Оттаму додаваат дека, сепак, неизвесност за идната макроекономска стабилност и понатаму постои преку ризиците поврзани со глобалните фактори и геополитички случувања.

Од градежната компанија „Гранит“ соопштија дека со оглед на вкупната економска состојба во државата, регионот и пошироко, која се одразува преку стабилизирање на нивото на инфлацијата, каматните стапки и економскиот раст, очекувањата за наредниот период се продолжување и зголемување на растот, кој би се ефектуирал преку забрзување на тековните проекти, а особено преку добивање нови проекти од областа на градежната инфраструктура.

Во моментов нема коментари за веста. Биди прв да коментира...

Остави коментар