Божиќ на берзите - подарете си празнична заработка

Крајот на годината обично носи удар за паричникот, но ако паметно инвестирате на берзите, Дедо Мраз може и вам да ви донесе подароци. Веќе пишувавме за феноменот познат како „релито на Дедо Мраз“ односно за растот на цените на акциите кон крајот на декември и почетокот на јануари. Бидејќи тој период допрва се наближува, со Тео Муратовиќ од „Сизонекс“ (Seasonax) истражувавме дали годинава ќе следува позитивeн шаблон или нè очекуваат некои изненадувања.

„Јасно е дека претстојат значителни неизвесности. Од една страна, поради изборот на Доналд Трамп за претседател на САД, се очекува американската економија да доживее даночни намалувања и дерегулација. Ова ќе го стимулира краткорочниот раст, што пак може да го поттикне S&P500“, вели Муратовиќ.

Тој додава дека, од друга страна, влошувањето на динамиката на глобалниот раст, особено забавувањето во Кина, како и потенцијалните трговски и царински спорови со Европа, би можеле да создадат проблеми што ќе го доведат во прашање неодамнешниот економски замав во САД.

„Исто така, клучно ќе биде движењето на каматните стапки во САД. За неколку дена Фед ќе објави резиме на економските проекции, а пониската траекторија на каматните стапки за 2025 година би можела да го поттикне растот на S&P500 до крајот на годината“, елаборира Муратовиќ.

Значи, има доста пазарни несигурности пред нас со кои Дедо Мраз ќе мора да се бори. Сепак, ова не му е првпат. Историски гледано, декември е извонреден месец за пазарите, редовно нудејќи високи просечни приноси, стабилни добивки и мала нестабилност, особено за време на изборните години.

Годинава растот на индексот S&P500 го поттикнува комбинацијата од позитивната сезона, можноста за намалување на стапката на Фед и оптимизмот на потрошувачите.

„Релито на Дедо Мраз“ започнува веќе во средината на декември

Почнувајќи околу 20 декември и завршувајќи на 6 јануари, „релито на Дедо Мраз“ испорачува некои од најимпресивните краткорочни приноси во историјата на пазарот.

Seasonax

„Во текот на последните 96 години, ’релито на Дедо Мраз‘ генерира годишен принос од 50,80 проценти за индексот S&P500, за само 11 трговски дена. За споредба, просечниот годишен принос за остатокот од годината е скромни 3,93 проценти“, посочува Муратовиќ.

Гледајќи го примерот за приносите за секоја поединечна година од 1928 година, цените растеле речиси 80 проценти од времето, што значи дека само 19 години од 96 донесоа загуби за време на нагласениот период.

Глобално влијание

„Релито на Дедо Мраз“ не е ограничено само на американските пазари туку влијае и на германскиот DAX. 

Закрепнувањето на DAX обично започнува на 14 декември и трае до 6 јануари, нудејќи малку подолг прозорец на можности во споредба со S&P 500. 

Seasonax

„Во текот на изминатите 44 години, DAX имаше просечен принос од 2,85 проценти за време на периодите на раст. Овој тренд се повторува во 34 од 44 години, што го прави добра можност за инвеститорите на европските пазари“, објаснува Муратовиќ.

Што го движи „релито на Дедо Мраз“?

Постојат неколку објаснувања за оваа сезонска појава. „Шминкањето“ на резултатите на инвестициските фондови често го стимулира растот на берзата на крајот на годината, а секако не одмага и зголемувањето на исплатите на бонусите што често се пресметуваат на крајот на годината.

„Иако помалку очигледни, психолошките причини се исто така важен фактор. На пример, повеќето луѓе ги затвораат сметките на крајот на годината и се позиционираат за инвестиции во следната. Покрај тоа, има статистички значаен ефект од празниците, така што берзите растат и за време на други празници“, заклучува Муратовиќ.

Во моментов нема коментари за веста. Биди прв да коментира...

Остави коментар