Тетер (Tether), дигиталната монета што е основа на поголемиот дел од светскиот екосистем на криптовалути, забележа пад на својата пазарна капитализација за првпат во девет месеци во услови на растечка реконструкција на секторот за стабилни криптовалути (таканаречени стејблкоини).
Пазарната капитализација на монетата тетер (УСДТ- USDT) падна за 1,2 отсто, на 82,9 милијарди долари во август, според истражувачката платформа ЦЦДата (CCData). Тоа е сепак трипати повеќе од нејзиниот најблизок конкурент. Стејблкоини се криптомонети што обично се врзуваат за средства како што е доларот, на основа еден на еден, и главно се користат за тргување и преместување дигитални средства од една берза во друга.
Вкупната големина на секторот за стејблкоини се намалува 17 месеци по ред - падна за 0,4 отсто, на околу 125 милијарди долари, соопшти ЦЦДата. Обемот на тргување опадна оваа година на пазарот на дигитални средства, во услови на зголемување на каматните стапки и ситуација во која регулаторите вршат поголема контрола, секако и со намален интерес на инвеститорите. Тетерот сепак остана најтргуваната криптовалута во светот.
„Овој тековен пад не го одразува само нискиот обем на тргување на централизираните берзи туку и намалената активност во просторот DeFi (од англиски: децентрализирани финансии)“, рече Џејкоб Џозеф, истражувачки аналитичар во ЦЦДата.
Претставник на „Тетер“, која е регистрирана на Британските Девствени Острови, не одговори на барањето за коментар.
CCData
Промената на пазарната динамика доведе до изразени поместувања во стабилните криптовалути. Стејблкоинот БУСД (BUSD), зад кој стои криптоберзата „Бајненс“ (Binance), полека се повлекува од употреба, по изречените регулаторни мерки на САД. Во меѓувреме, најголемиот конкурент на тетер, монетата УСДЦ (USDC) на „Сркл“ (Circle), изгуби околу половина од својот удел на пазарот во изминатата година поради превирањата во „Силикон валеј банк“ (СВБ), во која се држеа резервите за таа фирма во Бостон. УСДЦ доживеа мала промена во август, држејќи ниво околу 26 милијарди долари.
Во меѓувреме, неодамна лансираниот стејблкоин на „Фрст дигитал груп“ - ФДУСД (First Digital Group - FDUSD) добива на сила, делумно благодарение на стимулациите што им се нудат на корисниците на „Бајненс“, додека се обидува да го забрза префрлањето од БУСД. И Комисијата за хартии од вредност и Комисијата за тргување со фјучерси на стоки поднесоа обвиненија против „Бајнанс“ во Соединетите Американски Држави (САД).
„Дури и со неодамнешните превирања во криптоиндустријата, постојат знаци дека секторот за стејблкоини можеби го достигна дното“, вели Џозеф. Вкупната пазарна капитализација достигна најниско ниво од 123 милијарди долари на 19 август, но оттогаш се зголеми.
„Иако е премногу рано да се каже дали пазарната капитализација на стејблкоините конечно го достигна дното, постојат охрабрувачки знаци што укажуваат на одреден прилив на капитал“, рече Џозеф.
CCData
Растот на крајот на август следува по одредени позитивни движења во секторот. „Пејпал холдингс“ (PayPal Holdings Inc.) објави дека го лансира својот нов стејблкоин на 7 август. Судската одлука што дојде истиот месец се чинеше дека го расчисти патот за „Грејскејл“ (Grayscale), кој може да го претвори својот биткоин траст (Bitcoin Trust) во фонд со кој се тргува преку берза, поддржан од физички биткоин. А целокупната употреба на стејблкоини низ блокчејн сугерира дека нивната употреба останала „релативно стабилна“, рече Џејмс Сејфарт, аналитичар во „Блумберг интелиџенс“.
.webp){kind=icon}
