Каматата на благајничките записи изнесува рекордни 4,25 отсто. Советот на Народната банка на Македонија на вчерашната седница изврши ново, најголемо досега, зголемување на основната камата за 0,75 базични поени.
Сегашното ниво на референтната камата е највисоко по 2010 година, во времето на глобалната финансиска криза.
Последното зголемување на основната камата е седмо по ред од април досега. Пред стартот на кризата, таа изнсуваше 1,25 отсто.
Покрај зголемување на каматната стапка, НБРМ, донесе одлука и за промена на стапките на задолжителна резерва на банките, заради натамошно стимулирање на штедењето во домашна валута.
„Измената на овој инструмент, којашто е четврта по ред оваа година, опфаќа зголемување на стапката на задолжителна резерва на банките за обврските во странска валута од 18 отсто на 19 отсто. Зголемен е и делот од задолжителната резерва во странска валута којшто банките го исполнуваат во евра, од 75 на 77 oтсто, со што се зајакнува ефектот од промената во овој инструмент. Се очекува дека со мерката ќе се засилат започнатите промени во каматната политика на банките и дека банките ќе понудат поповолни камати за сите категории денарски депозити, придонесувајќи за посилен раст на штедењето во домашна валута“, стои во соопштението на НБРМ
По последните мерки, Народната банка го задржува континуитетот на затегнување на монетарната политика заради одржување на стабилноста на девизниот курс и на среднорочната ценовна стабилност.
„Промените во поставеноста на политиката на Народната банка се реакција на зголемените ценовни притисоци. Инфлацијата во последните месеци забрза, за што растот на цените на храната има најголем и растечки придонес. Тоа го нагласува влијанието на увезените ценовни притисоци од храната и енергијата врз домашната инфлација, врз коишто монетарната политика нема директно влијание. Сепак, имајќи ги предвид преносните ефекти и подигнувањето на инфлациските очекувања, овие поместувања во инфлацијата наметнуваат потреба од монетарна реакција. Со оглед на врзаноста на нашата валута со еврото, при одлучувањето влијаат и промените во монетарната политика на Европската централна банка“, наведува Централната банка.
Во услови на натамошни поумерени притисоци од енергетската криза и прилив на девизи од менувачкиот пазар, домашниот девизен пазар и натаму е стабилен.
„Народната банка и во текот на октомври интервенира со откуп на девизи на девизниот пазар, а девизните резерви од јули наваму бележат постојан раст, при што нивното ниво ги задоволува барањата за адекватност согласно со меѓународните стандарди. Оцените за надворешната позиција на економијата упатуваат на поголеми притисоци од енергетската криза врз трговскиот дефицит, но од друга страна има подобри остварувања кај приватните трансфери, со што девизните резерви и натаму се во комфорната зона којашто гарантира одржување на стабилноста на курсот на домашната валута во однос на еврото“, соопшти НБРМ.
.webp){kind=icon}
