Македонија денеска се претставува пред инвеститорите за нова еврообврзница. На таканаречениот повик за инвеститори земјава ќе ја претстават министерот за финансии Фатмир Бесими, Дејан Николовски, државен советник за јавен долг, гувернерката Анита Ангеловска-Бежоска и вицегувернерката Ана Митреска. Се бараат пари за четиригодишна еврообврзница, дознава „Блумберг Адрија“.
Овој повик го организираат Сити банк, Дојче банк и ЏП Морган како заеднички организатори овластени од македонското Министерство за финансии. Во повикот стои дека Македонија има ББ- (стабилен) рејтинг од Стандард и Пурс и ББ+ (со негативен изглед) од Фич.
Претставувањето ќе биде денеска, во периодот од 14 до 15 часот, а понудата е еврообврзницата да котира на Лондонската берза во зависност од пазарните услови. Според информациите, Дојче банк ја координира маркетинг-логистиката, а целен пазар се само квалификувани договорни страни и професионални клиенти.
„Блумберг Адрија“ веќе пишуваше за плановите за финансирање на дефицитот годинава и за враќањето на старите долгови. Ќе се задолжуваме и дома, но и во странство.
Од Министерството за финансии пред десетина дена изјавија дека задолжувањето во странство во 2023 година, во согласност со планираното, може да се реализира со издавање должнички хартии од вредност на меѓународниот пазар на капитал, преку повлекување транша од кредитната линија за претпазливост и ликвидност од ММФ и преку повлекување средства од поволни кредити од странски финансиски институции и кредитни линии наменети за финансирање одделни проекти и буџетски дефицит. А во ноември минатата година извршниот одбор на Меѓународниот монетарен фонд (ММФ) го одобри кредитот за Македонија од околу 530 милиони евра преку кредитната линија за претпазливост и ликвидност (ПЛЛ).
„Министерството за финансии при изборот на извор за финансирање ќе се базира на поволните тековни состојби на меѓународните пазари на капитал, како што беше направено и во текот на 2022 година“, велат од Министерството.
Инаку, Владата на седница ја усвоила Информацијата за продолжување на постапката за потенцијално задолжување на државата на меѓународниот пазар во 2023 година. Од Министерството објаснија дека станува збор за документ што е во насока на продолжување на процесот што беше предвиден, а не се реализира во 2022 година поради неповолната состојба на меѓународниот пазар.
„Наместо таа трансакција, се издаде регистрирана обврзница NSV со поповолни услови, со што се направи заштеда во буџетот. По донесување на буџетот за 2023 година и во услови на поволни пазарни движења, со оваа информација, Владата на Република Северна Македонија го задолжи Министерството за финансии да продолжи со постапката за потенцијално задолжување на Република Северна Македонија на меѓународниот пазар на капитал во 2023 година“, велат од Министерството.
.webp){kind=icon}