Кредитирањето на американските банки е рекордно намалено во последните две недели од март, што укажува на заострување на условите за кредитирање по неколкуте колапси на банки од висок профил, а тоа претставува ризик да ѝ наштети на економијата.
Кредитирањето од страна на комерцијалните банки се намали за речиси 105 милијарди долари во двете недели заклучно со 29 март, што е најмногу според податоците на Федералните резерви (ФЕД) од 1973 година.
Намалувањето од повеќе од 45 милијарди долари во последната недела првенствено се должи на падот на заемите од малите банки. Повлекувањето на вкупното кредитирање во последната половина на март беше широко и вклучуваше помалку заеми за недвижности, како и комерцијални и индустриски кредити.
Bloomberg Mercury
Вчерашниот извештај покажа пад и кај депозитите на комерцијалните банки, кои се намалија за 64,7 милијарди долари во последната недела, што го означи 10-то последователно намалување, што главно го одразува падот на големите фирми.
Намалувањето на кредитирањето следува по колапсот на неколку фирми, вклучувајќи ги и банките „Силикон валеј“ (СВБ) и „Сигначур“ (Signature Bank). Економистите внимателно го следат овој извештај на ФЕД, за да ги проценат условите за кредитирање.
Неодамнешните неуспеси на банките ги искомплицираа напорите на централната банка да ја намали инфлацијата без да ја доведе економијата во рецесија. Во четвртокот индексот на кредитните услови на Американското здружение на банкари падна на најниско ниво од почетокот на пандемијата, што покажува дека банкарските економисти гледаат слабеење на кредитните услови во текот на следните шест месеци. Како резултат на тоа, банките веројатно ќе станат повнимателни во однос на одобрувањето на кредитите.
„Банкарската криза ја направи рецесијата поверојатна“, смета Џејми Дајмон од „ЏП Морган Чејс“ (JPMorgan Chase & Co). Главниот извршен директор на банката во годишно писмо рече дека неуспесите „предизвикале многу нервоза на пазарот и неминовно ќе доведат до одредено заострување на финансиските услови, бидејќи банките и другите заемодавци стануваат поконзервативни“.
Извештајот на ФЕД покажа дека, според големината на банките, кредитите се намалиле за 23,5 милијарди долари кај 25-те најголеми домашни овластени банки во последните две недели, а опаднале за 73,6 милијарди долари кај помалите комерцијални банки. Заемите од странски институции во САД се намалија за 7,5 милијарди долари.
Најголемите 25 домашни банки сочинуваат речиси 60 отсто од вкупното кредитирање, иако во некои клучни области, вклучувајќи ги и комерцијалните недвижности, помалите банки се најважните даватели на кредити.
Таканаречените „други“ депозити, кои ги исклучуваат големите орочени депозити, паднаа за 260,8 милијарди долари кај деловните банки од неделата што заврши на 15 март. Депозитите во малите банки се намалија за 58,1 милијарди долари.
.webp){kind=icon}