Нафтата паѓа четврти ден по ред, банките ги намалија прогнозите за цените

Нафтата е на пат да го забележи најдолгиот низ загуби годинава, бидејќи договорот меѓу САД и Иран за повторно отворање на Ормускиот теснец ги поттикна очекувањата дека понудата на пазарот ќе се опорави, додека водечките инвестициски банки од Волстрит ги намалија своите прогнози за цените.

Глобалниот референтен тип нафта брент падна под 83 долари за барел, бележејќи четврти последователен ден на пад, додека американската нафта ВТИ (WTI) се движеше блиску до 80 долари. Се очекува привремениот договор да биде потпишан во петок во Швајцарија, иако Вашингтон и Техеран сè уште не го објавија текстот на меморандумот.

И „Морган Стенли“ (Morgan Stanley) и „Голдман Сакс“ (Goldman Sachs) ги намалија проценките за цените во наредните квартали. „Голдман“ сега тргнува од претпоставката дека извозот од Персискиот Залив до крајот на јули ќе ги достигне нивоата пред војната, еден месец порано отколку што претходно се очекуваше.

Претседателот на САД, Доналд Трамп, изјави дека теснецот во петок ќе биде целосно отворен.

„Веќе сега имаме многу пловни коридори. Теснецот ќе биде отворен и преминот низ него нема да се наплаќа“, им рече Трамп на новинарите на Самитот на Групата 7 во Франција.

Падот на цените на нафтата на најниското ниво од почетокот на март ги избриша поголемиот дел од добивките остварени за време на конфликтот, со што се ублажија инфлаторните притисоци токму во момент кога претставниците на Федералните резерви (Фед) размислуваат за понатамошни потези во врска со каматните стапки.

Сепак, остануваат бројни отворени прашања за тоа како привремениот договор ќе биде спроведен во практика. Пазарот и понатаму е загрижен за безбедноста на пловидбата, правилата за функционирање на рутата, како и за прашањето дали Ормускиот теснец  - низ кој пред војната минуваше околу една петтина од светската понуда на нафта  - навистина ќе остане без наплата за транзит.

Недостигот од детали, меѓутоа, ги тера учесниците на пазарот на претпазливост. Енергетските претставници од Персискиот Залив наведоа дека се преплавени со прашања од купувачи кои сакаат да знаат дали суровата нафта повторно ќе може непречено да минува низ теснецот, додека бродските компании и трговците истакнуваат дека им е потребна поголема јасност пред да испратат танкери по таа рута.

И покрај тоа, „Морган Стенли“ сега проценува дека цената на брент во периодот од јули до септември во просек ќе изнесува 90 долари за барел, наместо претходно прогнозираните 100 долари. Прогнозата за четвртиот квартал е намалена за 15 долари, на 80 долари за барел.

„Многу работи допрва треба да бидат договорени и клучните ризици сè уште постојат, но ова е важен чекор кон смирување на конфликтот и зголемување на извозот на нафта преку Ормускиот теснец“, наведоа аналитичарите предводени од Мартијн Ратс. Тие очекуваат дека до септември ќе се опорават околу 50 проценти од производството, а до декември 80 проценти, нешто побрзо отколку што претходно проценуваа.

Аналитичарите на „Голдман“, предводени од Даан Стројвен, сега очекуваат брент во четвртиот квартал во просек да вреди 80 долари за барел, што е за 10 долари помалку од нивната претходна прогноза.

 

Од друга страна, РБЦ (RBC Capital Markets) зазеде попретпазлив став. Аналитичарите предводени од Хелима Крофт сметаат дека ќе бидат потребни месеци за обемот на транспортот да се приближи до нивоата од 27 февруари, односно периодот пред почетокот на војната.

„Можно е рекордните текови низ Ормускиот теснец веќе да се зад нас“, наведоа тие.

Промените во пазарната динамика се гледаат и преку намалувањето на разликата меѓу двете најблиски термински цени на брент. Иако пазарот и понатаму е во таканаречена „backwardation“ структура, каде што моменталната цена е повисока од идната, разликата во вторникот изнесуваше само 83 центи по барел. Пред еден месец беше поголема од четири долари.

Дополнителен увид во состојбата на пазарот се очекува в среда, кога Меѓународната агенција за енергија (ИЕА/IEA) ќе го објави својот месечен извештај за изгледите на пазарот на нафта. Агенцијата со седиште во Париз ги советува водечките светски економии во креирањето на енергетската политика и за време на војната го координираше ослободувањето на нафта од стратешките резерви на своите членки.

Практичното затворање на Ормускиот теснец, кој беше изложен на двојна блокада од Иран и САД, го намали протокот на нафта од регионот и доведе до трошење на комерцијалните и стратешките резерви. Американските стратешки резерви на сурова нафта паднаа на најниско ниво од 1983 година, покажуваат податоците објавени во понеделникот.