Нафтата расте по шпекулациите дека Кина ја напушта политиката на нулта ковид

Цената на нафтата порасна поради шпекулациите дека Кина се подготвува постепено да ја напушти политиката на нулта ковид.

ВТИ (West Texas Intermediate - WTI) порасна за 2,1 отсто, на 88 долари за барел, откако во претходните два дена го загуби тлото. Поточно, цената на нафтата ВТИ со испорака во декември порасна за 1,84 долар, на 88,37 долари за барел, додека нафтата Брент за испорака во јануари достигна 94,65 долари.

Bloomberg Mercury

 

Нафтата го следи растот на светските берзи, откако непроверената објава на социјалните мрежи предизвика шпекулации дека Пекинг сака полека да ги укине ковид-ограничувањата, и покрај тоа што од Министерството за надворешни работи на Кина велат дека не се запознаени со таков план.

Слабеењето на доларот исто така придонесе за раст на цената на нафтата, правејќи ја суровината поатрактивна за странските купувачи.

„Потенцијалните промени на кинеската ковид-политика, без разлика дали се вистински или само шпекулативни, ќе создадат несигурност во тргувањето со суровата нафта“, рече Ребека Бабин, виш трговец со енергија во „ЦИБЦ прајват велт менаџмент“ (CIBC Private Wealth Management).

Додека нафтата загуби речиси третина од својата вредност од почетокот на јуни, фјучерсите го завршија октомври со прв месечен раст од мај, главно поттикнат од договорот за намалување на производството од страна на ОПЕК+. Генералниот секретар на Организацијата на земји извознички на нафта и нивни сојузници, Хајтам ал Гаис, рече дека кратењето е неопходно, бидејќи економската неизвесност доведува до прекумерни резерви.

Но процените за испораките се заматени од претстојните санкции на Европската Унија кон руските текови на сурова нафта, кои ќе стапат во сила од 5 декември.

Во моментов нема коментари за веста. Биди прв да коментира...

Остави коментар