Нафтата се движи кон втор неделен раст, бидејќи оптимизмот поради посилната кинеска побарувачка ја засени послабата перспектива во другите големи економии. ВТИ порасна кон 81 долар за барел, ставајќи ја американската референтна вредност на курс за раст од околу еден отсто оваа недела.
Конкретно утрово ВТИ за испорака во февруари порасна за 0,4 отсто, на 80,67 долари, но договорите за испорака во март се со дури два процента повисока цена, додека нафтата брент за испорака во март доби 0,1 отсто на својата вредност, со што барел се тргува по цена од 86,22 долари.
Неделна промена на цената на нафтата ВТИ / Bloomberg Mercury
Кинеската потрошувачка се зголемува откако најголемиот увозник на сурова нафта ги напушти строгите ограничувања за вируси, со знаци на зголемено купување од страна на рафинериите на физичкиот пазар. Сепак, слабоста на други места го ограничи растот на цената на нафтата.
Претседателката на Европската централна банка (ЕЦБ), Кристин Лагард, вети дека политиката ќе остане цврста бидејќи инфлацијата е сè уште превисока. Во САД, заменик-претседателката на Федералните резерви (ФЕД), Лаел Брејнард, вчера рече дека стапките ќе треба да останат високи одреден период.
Суровата нафта беше во голем пад во првите три недели од новата година, бидејќи инвеститорите ги проценуваа спротивставените сили на пазарот, како и изгледите за руските текови во 2023 година, со оглед на тоа дека санкциите се заоструваат среде војната во Украина. Наспроти тоа, постојат многу различни изгледи од банките за тоа каде се движи суровата нафта, при што „Голдман Сакс“ (Goldman Sachs Group Inc) тврди дека нафтата брент може да надмине 100 долари за барел, додека од „ЈП Морган чејс“ (JPMorgan Chase & Co) се многу повнимателни.
„Цените се зголемија бидејќи кинескиот оптимизам продолжи да владее. Извештаите дека бројот на ковид-случаи во Кина го достигна врвот дополнително го поттикнаа оптимизмот на пазарот дека побарувачката ќе почне поодржливо да закрепнува“, рече Чару Чанана, пазарен стратег во „Саксо“ (Saxo Capital Markets Pte) во Сингапур.
Трговската активност на пазарите на сурова нафта се зголемува откако ликвидноста се намали минатата година, што ги влоши осцилациите на цените. Во следните недели трговците ќе бараат какво било влијание врз испораките на руски рафинирани производи предизвикани од ограничувањето на цената и забраната на Европската Унија за увоз, која започнува на 5 февруари. Некои европски земји се залагаат за намалување на ограничувањето на суровата нафта, но администрацијата на Бајден дава отпор.
.webp){kind=icon}
