text size
САД се подготвуваат да воведат царина од 200 проценти за алуминиум од руско производство уште оваа недела, за да го задржат притисокот врз Москва во пресрет на навршувањето една година од инвазијата врз Украина, велат лица запознаени со ситуацијата. За овој потег се размислува со месеци, рекоа лицата, кои побараа да бидат анонимни бидејќи станува збор за внатрешни размислувања. Тие велат дека САД целат и на рускиот метал, бидејќи Москва извезува алуминиум на американскиот пазар и им штети на американските компании.
Претседателот Џо Бајден допрва треба да даде официјално зелено светло за акцијата, а во администрацијата има загриженост за колатерална штета на американските индустрии, вклучувајќи ги и воздушната и автомобилската индустрија. Ваквите високи царини ефективно ќе го прекинат американскиот увоз на метал од Русија, вториот по големина светски производител на оваа суровина.
Додека увозот од Русија традиционално претставува 10 отсто од вкупниот американски увоз на алуминиум, сега износот се намали на нешто над три проценти, покажуваат податоците за трговијата на САД. Последната ескалација на притисокот врз Москва доаѓа откако Вашингтон воведе невидени нивоа на санкции за да ја казни и изолира владата на претседателот Владимир Путин.
Увозот на алуминиум од земјата се намали речиси на нула во октомври, откако „Блумберг њуз“ (Bloomberg News) објави дека Белата куќа ја разгледува одмаздничката забрана за рускиот метал. Но увозот потоа се зголеми на 11.600 тони во ноември и на речиси 11.000 тони во декември. Во јануари беа увезени 9.700 тони алуминиум од Русија.
Акциите на „Русал“ во Москва паднаа за еден отсто. Фјучерсите на алуминиум со кои се тргува на Лондонската берза за метали забележаа загуба од 2,2 процента.
Русија е еден од најголемите производители на алуминиум, а царините за неговата понуда најверојатно ќе го затегнат глобалниот пазар и ќе помогнат да се зголемат цените. „Русал“, единствениот руски производител на алуминиум, одби да коментира веднаш. Советот за национална безбедност на Белата куќа не одговори веднаш на барањата за коментар.
Русија, најголемиот светски производител по Кина, е значаен доставувач на таа суровина за американскиот пазар. Иако повеќето од нив се производи со додадена вредност, купувачите во САД се движат од градежништво до автомобилска индустрија.
Цената на алуминиумот минатата година падна за околу 15 отсто поради загриженоста за забавување на глобалниот раст и рестрикциите во движењето и работата во Кина поради политиката на нулта ковид, која е најголем потрошувач во светот. Купувачите на американскиот пазар уште од октомври разговараа за потенцијално алтернативно снабдување во случај рускиот метал да добие забрана, царина или санкција. Дискусиите во последниве месеци од страна на учесниците во индустријата се фокусираа на тоа каде би отишол рускиот метал ако одеднаш биде блокиран од американскиот пазар, како и од Европа. Една таква дестинација би можела да биде Кина.
.webp){kind=icon}
