Хаос на пазарот на алуминиум, Бајден сака да го санкционира рускиот извоз

Целосна забрана на рускиот алуминиум во САД се заканува да го загрози светскиот пазар веќе потресен од повеќекратни нарушувања и покренува прашања за тоа како Кина би можела да ја пополни празнината во снабдувањето.

Администрацијата на Бајден ги разгледува опциите, вклучително и санкции против најголемиот руски производител на метал, бидејќи Белата куќа се обидува да ја казни Москва за ескалација на воениот конфликт во Украина, велат извори запознаени со развојот на настаните. Мерките дополнително ќе влијаат на пазарот следната година со турбулентни промени на цените и нестабилност во понудата и превирања во побарувачката по февруарската инвазија на Русија.

„Доколку рускиот алуминиум биде санкциониран, западниот пазар на алуминиум би бил изложен на екстремно затегнување“, посочуваат од „Голдман сакс“ (Goldman Sachs Group Inc.). Цените би се зголемиле многу повеќе, а Кина би извезувала повеќе полупреработен алуминиум, пишуваат аналитичарите на банката, вклучувајќи го и Николас Сноудон.

Санкциите за „Русал“ (United Co. Rusal International PJSC) би предизвикале најголеми последици од опциите кои се разгледуваат, а кои исто така вклучуваат забрана за увоз од САД или казнени тарифи за руската понуда. Русија е втор најголем снабдувач со алуминиум во светот по Кина.

Цените на алуминиумот пораснаа на рекордно високо ниво во март веднаш по рускиот напад, но се повлекоа бидејќи руските метали главно останаа на светскиот пазар. Енергетската криза во Европа, исто така, ја разниша побарувачката и ги затвори топилниците, додека Лондонската берза за метали одделно размислуваше да го забрани новиот руски метал од своите магацини.

Најлошо сценарио

„Во најлошото сценарио, Европа и САД ќе го блокираат рускиот алуминиум“, посочуваат од Институтот за истражување Chaos Ternary со седиште во Шангај. „Рускиот алуминиум што не може да оди во САД најверојатно ќе оди во Кина, Индија и други места, а потоа ќе следи кинески извоз на алуминиумски производи во Европа и САД за да се пополни празнината“.

Кина е убедливо најголемиот светски производител и потрошувач на алуминиум. Како дел од реконфигурацијата на трговските текови, металот од Русија потенцијално би можел да се користи во домашната индустрија, а Кина потоа би ја зголемила продажбата на сопствениот метал во странство на своите добро воспоставени извозни рути.

Bloomberg

Постои преседан за санкциите против Rusal. САД воведоа санкции за компанијата во 2018 година, бидејќи односите со Русија се влошија, предизвикувајќи толку големи превирања на пазарот што мерките беа повлечени на почетокот на 2019 година. Во тоа време, имаше и многу шпекулации за тоа дали рускиот алуминиум би можел да се пробие до Кина, при што основачот на Rusal, милијардерот Олег Дерипаска, дури го посети Пекинг за да разговара за соработка.

„На крајот, Кина ќе набавува примарен алуминиум со попуст од Русија, а потоа ќе извезува алуминиумски производи на Запад“, вели Веи Лаи, аналитичар во TF Futures. Кинескиот извоз на алуминиум веќе достигна рекордно ниво во мај годинава, во услови на забавување на домашната побарувачка.

Алуминиумот во четвртокот падна за 1 процент на 2.282 долари за тон на Лондонската берза за метали (LME), откако забележа еден од најголемите рекордни скокови по извештаите за размислувањата во Белата куќа. Акциите на Rusal во Хонгконг паднаа за дури 8,1 отсто.

Во моментов нема коментари за веста. Биди прв да коментира...

Остави коментар