Г7 и Европската Унија (ЕУ) разговараат за начините за следење на руските дијаманти преку границите, потег што може да го отвори патот за ограничувања на нивната трговија во иднина, информираат лица запознаени со ова прашање.
Претходните обиди на ЕУ да ги санкционира руските скапоцени камења наидоа на отпор од земјите увозници, како што е Белгија, кои тврдат дека напорите би биле залудни, бидејќи трансакциите едноставно ќе се префрлат на друго место, без механизам за следење на скапоцените камења. Потеклото на дијамантот е јасно во почетокот на синџирот на снабдување, кога му се издава сертификат во рамките на процесот „Кимберли“, кој беше креиран за да ѝ стави крај на продажбата на таканаречените крвави дијаманти што финансираат војни. Но потоа може да се отежни нивното следење.
Брусените и полираните камења често се мешаат во трговските куќи и оригиналниот сертификат ќе биде заменет со документација за „мешано потекло“, што прави речиси невозможно да се следи каде евентуално се продаваат руските дијаманти.
САД го санкционираа рускиот рударски гигант „Алроса“ (Alrosa PJSC), кој е заслужен за околу една третина од глобалната трговија со необработени дијаманти во вредност од 80 милијарди долари. Но мерките имаа ограничено влијание, бидејќи голем дел од трговијата се одвива преку други пазари, како што е Индија.
Лицата што се запознаени со разговорите меѓу Г7 и ЕУ рекоа дека решението не е неизбежно, бидејќи следењето на полираните дијаманти на глобалниот пазар е исклучително комплицирано. Сепак, двајца од изворите велат дека Г7 може да се изјасни за ова прашање уште следната недела, како дел од напорите да се одржи притисокот врз Русија, бидејќи нејзината војна во Украина деновиве ќе наврши една година.
.webp){kind=icon}
