Претставници на Организацијата на земји извознички на нафта и нивни сојузници (ОПЕК+) се собраа во Виена за да одлучат дали да им дадат повеќе време на постојните намалувања на производството да стапат во сила или да преземат дополнителни превентивни мерки за зголемување на цените на нафтата.
Скратувањето е меѓу опциите за кои се разговара, според еден делегат, иако министрите што пристигнаа во австрискиот главен град дадоа малку индикации за тоа кој пат би го избрале. Одлуката на групацијата е дополнително комплицирана со фактот дека цената на нафтата порасна втор ден во услови на поголем економски оптимизам, што претставува пресврт на трендот забележан кон крајот на мај.
„Главната цел на ОПЕК и неговите сојузници е да ја зачуваат стабилноста на нафтениот пазар и да избегнат каква било нестабилност. Нема да се двоумиме да донесеме каква било одлука што ќе донесе поголема рамнотежа и стабилност“, изјави вчера во Виена Хајан Абдул Гани, ирачкиот министер за нафта и вицепремиер за енергетски прашања.
ОПЕК+ се на само еден месец по изненадувачките намалувања на производството објавени во април. Тие нови ограничувања на снабдувањето од околу 1,2 милион барели дневно, дополнети со намалувањето за 500.000 барели дневно што веќе го најави Русија, ќе траат до крајот на годината и тешко е да се процени нивното влијание по само неколку недели, сметаат аналитичарите од „ЏП Морган Чејс“ (JPMorgan Chase & Co).
„Намалувањата станаа видливи во податоците за извозот дури во втората недела од мај. Веројатно ќе бидат потребни уште неколку недели за да се утврдат нивната имплементација и ефективност“, сметаат од банката.
Трговците со нафта во последните недели дадоа малку назнаки дека се подготвени да чекаат и да видат како ќе се движат работите. Цените на фјучерсите за нафта на крајот на мај во Њујорк беа намалени за 11 проценти, до околу 68 долари за барел. Дури и со закрепнувањето во првите два дена од јуни, суровата нафта е за околу 14 отсто под највисокото ниво достигнато во април.
„Ветувањето за идното силно намалување на понудата не го убеди пазарот преку пораст на цените на нафтата“, сметаат од „ЏП Морган“ (JPMorgan).
Кога беше запрашан за овој тренд на намалување на производството минатата недела, саудискиот министер за енергија, принцот Абдулазиз бин Салман им рече на шпекулантите да внимаваат. И покрај ова предупредување, многу набљудувачи очекуваат ОПЕК+ да го одржи стабилно производството на состанокот овој викенд, особено откако рускиот вицепремиер Александар Новак изјави за „Известија“ дека групата најверојатно нема да преземе никакви нови чекори. Тој подоцна ја промени таа изјава, велејќи дека групата може да одлучи да преземе каква било акција што е потребна.
Состанокот на министрите на ОПЕК+ се одржува денеска, по што утре ќе следува прес-конференција.
„Актуелните намалувања на производството на нафта од страна на групата треба да бидат доволни за затегнување на нафтените пазари во втората половина од годината, под претпоставка дека нема да има рецесија, но за да ги поттикнат цените повисоки, алијансата или барем некои членки најверојатно ќе треба да намалат повеќе од аутпутот“, велат од „ЏП Морган“.
Дополнително намалување од околу 500.000 барели дневно од страна на Саудиска Арабија ќе го усогласи производството на кралството со тоа на Русија, се наведува во извештајот.
.webp){kind=icon}