Ирак е во преговори со Турција за обновување на извозот на нафта од северот преку Џејхан, изјави ирачкиот министер за нафта Хајан Абдул Гани во телевизиско интервју за „Рудав“ (Rudaw).
„Се водат разговори со турската страна за продолжување на пумпањето нафта и се надеваме дека наскоро ќе примиме турски делегат за решавање на ова прашање“, рече министерот.
Турција го затвори нафтоводот што тече до Џејхан откако Ирак во март победи во речиси девет години стар арбитражен случај во Меѓународната трговска комора. Вториот по големина производител на ОПЕК во случајот тврдеше дека Анкара го прекршила договорот за транзит на гасоводот од 1973 година, дозволувајќи сурова нафта од курдскиот регион да се извезува без согласност на Багдад.
„Последните преговори се одвиваат добро и извозот наскоро ќе се рестартира“, рече Абдул Гани.
Турција не се согласи со барањето на Ирак да продолжи со пратките минатиот месец. Извозот на Ирак во мај падна на најниско ниво во последните две години, бидејќи гасоводот од северните полиња на земјата остана затворен втор месец по ред. Абдул Гани рече дека има индикации дека цените ќе останат стабилни на сегашното ниво пред да пораснат во наредните месеци. „Запирањето на околу 500.000 барели сурова нафта дневно од северните наоѓалишта на земјата во Курдистан и Киркук преку Џејхан до глобалните пазари имаше позитивен ефект врз стабилноста на цените и зголемените цени“, додаде тој.
„Ирак исто така сака да ги диверзифицира своите извозни терминали, но извозниот гасовод Киркук-Банијас со Сирија во моментов не се разгледува како алтернатива на гасоводот Џејхан“, додаде министерот.
„Земјата ги почитува ветувањата од Парискиот договор дека до 2030 година ќе го запре палењето природен гас, согорување природен гас во процесот на екстракција на нафта“, рече Абдул Гани.
Министерството за нафта продолжува да го забрзува собирањето природен гас за производство на електрична енергија, а со тоа да го намали големиот увоз на гас во земјата од Иран.
„Не може да продолжиме да увезуваме гас додека тој енергент што се произведува во нафтените полиња се согорува“, рече тој. Откако ќе започне интегрираниот проект за развој на гас со француската „Тотал енерџис“ (Total Energies SE), палењето гас од пет полиња на југ ќе биде запрено во рок од пет години. „На земјата ѝ се потребни меѓу пет и седум години за самата да ги постигне потребните количества во производството на гас“, рече Абдул Гани.
.webp){kind=icon}
