text size
Русија заработи 24 милијарди долари од продажба на енергенси во Кина и Индија за само три месеци по инвазијата на Украина, што покажува дека повисоките глобални цени ги ограничуваат напорите на САД и Европа да го казнат претседателот Владимир Путин.
Кина потрошила 18,9 милијарди долари на руска нафта, гас и јаглен од март до крајот на мај, што е речиси двојно повеќе од една година порано, покажуваат најновите податоци на царината. Во меѓувреме, Индија издвоила 5,1 милијарди долари во истиот период, пет пати повеќе отколку лани. Тоа се дополнителни 13 милијарди долари приход од двете земји во споредба со истите месеци во 2021 година.
Bloomberg
Поголемото трошење помага да се надоместат намалените набавки од САД и некои други земји кои ги запреа или забавија купувањата за да ја казнат Русија за војната. Забраните ги зголемија цените на алтернативните набавки и ја поттикнаа инфлацијата што се заканува да ги доведе големите економии во рецесија.
„Кина веќе купува во основа сè што Русија може да извезе преку цевководи и пристаништа на Пацификот“, вели Лаури Миливирта, главен аналитичар во Центарот за истражување на енергија и чист воздух, кој ги следи руските енергетски текови од избувнувањето на војната.
Метежот кој настана веројатно нема да заврши наскоро, а цените на енергијата се многу повисоки отколку што беа ова време минатата година, дури и доколку се сметаат големите попусти на светските индекси што Русија ги нуди за да привлече купувачи. Врз основа на обемот, кинескиот увоз продолжи бавно да расте во јуни, додека Индија може да има поттик дополнително да ги засили купувањата во наредните месеци, бидејќи забраната на Европската унија за руската нафта стапува на сила, објаснува Миливирта.
Bloomberg
Кина и Индија продолжуваат да ја следат Европа како блок во однос на вкупната продажба оваа година, според неговото истражување. Сепак, купувањата во Европа ќе продолжат да се намалуваат бидејќи стапуваат на сила забраните за увоз на јаглен и нафта и бидејќи Русија ги намалува испораките на гас за некои европски клиенти.
Русија има долготрајни трговски и стратешки односи со Кина и Индија, а покрај тоа што нуди големи попусти на цените, прифаќа и плаќања во локална валута за да им помогне на трговските текови да останат силни оваа година.
Кина е најголемиот увозник на енергија во светот и има наменски цевководи за сибирска нафта и гас. Иако потрошувачката на енергија беше намалена во првата половина на 2022 година, делумно поради Ковид-19, земјата потроши многу повеќе на руската енергија поради повисоките цени и малиот раст на обемот.
Bloomberg
Зголемувањето на потрошувачката на Индија по војната е многу подраматично, бидејќи таа не дели копнена граница со Русија, а нејзините пристаништа обично се премногу далеку за исплатлив превоз. Покрај поголемите количини нафта и јаглен, Индија увезла и три товари руски течен природен гас од почетокот на војната, во споредба со еден во истиот период минатата година, според податоците за следење на бродовите на Bloomberg.
„Историски гледано, Индија купуваше многу малку руска нафта, но војната во Украина и ембаргото за нафта на ЕУ доведоа до ребаланс на трговските текови на нафтата“, посочува Веи Чеонг Хо, аналитичар во Rystad Energy, во својата истражувачката белешка.
.webp){kind=icon}
