.webp){kind=icon}
Цената на нафтата продолжи да се качува по нејзиниот најголем неделен раст од април. Причина за тоа се знаците дека Кина ќе ја засили поддршката за својата економија и стравувањата дека конфликтот меѓу Израел и Хезболах може да прерасне во регионална војна.
Нафтата брент денеска се тргува по цена од близу 75 долари за барел, откако минатата недела ја зголеми својата вредност за четири проценти, додека ВТИ (WTI-West Texas Intermediate) e на ниво од околу 72 долара.
Хезболах вчера лансира околу 115 ракети, проектили и беспилотни летала кон северен Израел, што доведе до контранапади против организацијата поддржана од Иран во Либан.
Кина ги објави плановите за нејзината економија откако ја намали краткорочната каматна стапка. Тоа ги зајакна очекувањата дека Народната банка на Кина ќе ја олабави монетарната политика, откако и Федералните резерви (Фед) го сторија тоа минатата недела.
Цената на нафтата брент се зголеми за околу девет проценти откако на почетокот на овој месец потона на најниското ниво од 2021 година. Пазарот го следи оптимизам во врска со намалувањето на стапките во САД, но и стравувања дека непријателствата на Блискиот Исток ќе го повлечат и производителот на ОПЕК (Организацијата на земји извознички на нафта), Иран. Сепак, загриженоста за влошената перспектива за побарувачката на гориво досега ги држеше добивките под контрола.
„Цената на суровата нафта може кратко да стагнира, консолидирајќи ги минатонеделните добивки. Веселбата на пазарот поради големото намалување на каматите од Фед го одржува позитивното расположение. Но во одреден момент би можеле да видиме како суровата нафта одново е под надолен притисок бидејќи сјајот на Фед избледува и вниманието на пазарот на нафта се враќа кон влошената слика на побарувачката“, рече Вандана Хари, основач на „Ванда инсајтс“ (Vanda Insights) во Сингапур,
ОПЕК утре ќе ја објави својата годишна прогноза за нафтата на глобално ниво.
