Еден од најдобрите фондови од еврозоната вели дека автомобилите се новите банки

Европските автомобилски акции се подготвени за подобри перформанси по години заостанување, смета инвеститор што победува на пазарот и продава долгогодишни победнички акции во банкарскиот сектор.

Фондот „Еврозон валју“ (Eurozone Value) на „Дивас асет менаџмент“ (Divas Asset Management AG) го зголеми својот удел во автомобилскиот сектор на околу една четвртина од фондот, во споредба со околу 15 проценти, колку што изнесуваше пред една година, посочува менаџерот Хансуели Џост (64). Тој рече дека од септември има помал удел во банките, првпат по 17 години.

 

„Еврозон валју“ ги намали своите удели во „Сосиете женерал“ (Societe Generale SA) и „АБН амро банк“ (ABN Amro Bank NV), продолжувајќи го оддалечувањето од банките, кое започна во пролетта 2024 година. На сметка на тоа неговите удели сега ги вклучуваат производителот на автомобили „Мерцедес-Бенц“ (Mercedes-Benz Group AG) и компанијата за делови „Форвија“ (Forvia SE). Џост го зголемил својот удел и во акциите од одбранбениот сектор, но и во белгиската пиварница „Анхојзер-буш“ (Anheuser-Busch InBev) и германската „Хенкел“ (Henkel AG), рече менаџерот, чиј фонд има годишен поврат од 20 проценти во последните пет години. Неговиот перформанс е подобар од 99 проценти од конкурентите.

„Малопродажните банки сега се прилично вреднувани“, рече Џост. „Сите се таму и сега е тешко да се најде дополнително за купување. Затоа се префрливме во автомобилската индустрија, бидејќи тоа е сега е новиот малопродажен банкарски сектор.“ Оваа година фондот од 520 милиони евра, управуван од Џост и Леонардо де Феца, има поврат од 34 проценти.

Неговата промена во портфолиото е пример за тоа како контрадикторните инвеститори во Европа бараат следен сет победници, и тоа во услови кога банките веќе неколку години ги надминуваат очекувањата. Брокерските куќи и другите менаџери на фондови сè уште гледаат раст за акциите во најдобриот европски сектор.

Стратезите на „УБС глобал велт менаџмент“ (UBS Global Wealth Management) минатиот месец ги подобрија оценките за европските банки на атрактивни поради подобрувањето на растот на кредитите и силните приноси за акционерите. Индексот на банките во еврозоната само оваа година оствари поврат од 89 проценти благодарение на силната заработка, дарежливите исплати за инвеститорите, подобрувањето на економските перспективи и консолидацијата на индустријата.

Џост, кој вели дека престанал да ги чита истражувањата за акциите на брокерите пред повеќе од 20 години, ја развил својата стратегија за лов на вредност во текот на четиридецениската кариера во фирми како „Морган Стенли“ (Morgan Stanley), „УБС глобал“ и „ГАМ холдинг“ (GAM Holding AG).

Неговото портфолио се состои од околу 25 акции, избрани од универзум што тој со текот на годините го скратил на само 80 претежно големи ликвидни компании „доминантни во рамките на нивниот асортиман на производи во барем една категорија на производи“, рече тој. Во криза ваквите компании можат да го заштитат својот слободен паричен тек многу подобро од тие што не се доминантни, според менаџерот на фондот, кој генерално бара акции што се тргуваат најмалку 30 проценти под неговата процена за фер вредност.

Bloomberg Mercury

 

Во случајот на автомобилската индустрија продажбата веројатно ќе биде на најниско ниво, рече Џост, така што има малку негативен ефект за акциите. Тие треба да пораснат дури и ако заработката само се нормализира, потпомогната од евтини процени и силни биланси оптоварени со готовина, рече тој. Освен тоа, ако широкиот пазар се распродаде, производителите на автомобили би требало да се држат подобро од големите победници во изминатите неколку години, рече тој.

Производителите на автомобили малку здивнаа откако Европската Унија неделава ја повлече ефективната забрана за мотори со согорување и понуди поголема флексибилност за производителите на автомобили во транзицијата кон почист превоз.

„Ако пазарот се консолидира, може да го продадете тоа што го поседувате, а светот поседува технологија и раст“, рече Џост. „Никој не поседува автомобили, па затоа никој нема да продава автомобили.“

Џост е задоволен што се држи до акциите што не се во мода, гледајќи многу поголем раст тука отколку кај долгогодишните победници како што се банките.

„Ако имате повеќе од 70 отсто од средствата на повеќегодишни минимуми кога пазарот е на историски максимум, не треба да бидете научник за да видите дека ова е многу атрактивна понуда“, рече Џост.