Земјоделци трубејќи со тракторите вчера се обидоа да ги пробијат полициските бариери и ги опколија главните канцеларии на Европската унија во Брисел со барање за поголема поддршка, а протести имаше и во Грција. Земјоделците се жалат на бирократските пречки, трговските договори и правилата поврзани со климата. Кај нас се поголем број ниви остануваат необработени бидејќи нема кој да се занимава со земјоделство, а субвенциите не носат раст во производството, туку намалување.
Добро утро, подолу петте вести што ги издвоивме за почеток на денот.
Западан Балкан и ЕУ: На крајот се е само политичка одлука
Новата методологија во преговорите за пристапување во Европската Унија (ЕУ) за земјите од Западен Балкан значи отворање шест кластери, а не 35 поединечни преговарачки поглавја, како што беше претходно. Хрватска ги водеше преговорите за членство според претходните правила, Србија е во преговори десет години, додека Македонија и Албанија ги започнаа преговорите според новата методологија, а истото тоа ќе се случи и со Босна и Херцеговина (БиХ), која се очекува во март да ги почне преговорите.
Имено, поглавјата сè уште се присутни, но тие сега се вклучени во кластери, па со отворањето на кластерите на земјите, преговарачите истовремено отвораат повеќе поглавја, што носи подинамичен, но и попредизвикувачки процес на пристапување во ЕУ. Kластерот еден се однесува на основите, кластерот два на внатрешниот пазар, кластерот три на конкурентноста и инклузивен раст, кластерот четири на зелената агенда и одржливото поврзување, кластерот пет на ресурсите, земјоделството и кохезијата и кластерот шест на надворешните работи.
План: Недостигот од наставници ќе се реши со затворање училишта?
Училиштата во земјава во моментов имаат распишано огласи за вработување на 65 наставници по математика, 59 наставници по физика и 44 наставници по хемија, покажуваат податоците на Агенцијата за вработување (АВРМ) заклучно со 21 февруари. Податоците, пак, од евиденцијата на невработени на Агенцијата покажуваат дека невработени лица што можат да ги пополнат овие работни места има многу малку.
Како невработени се водат само пет лица што можат да ги пополнат празните места по математика. Ништо подобра не е ситуацијата ни со другите природни науки. Нема оптимизам ни дека состојбата ќе се смени во наредниот период затоа што квотите што денес ги има Природно-математичкиот факултет (ПМФ) за наставните насоки, одамна не се исполнуваат целосно.
Цената на нафтата паѓа, трговците чекаат сигнали за пазарна рамнотежа
По еднонеделен пад, цените на нафтата се упатуваат кон дополнителни загуби бидејќи трговците чекаат нови индиции за глобалната побарувачка и билансите. Брент се намали кон 81 долар за барел откако минатата недела падна за повеќе од два отсто, додека американската ВТИ беше над 76 долари. Прогнозите ќе дојдат од Меѓународната недела на енергија во Лондон, голем собир во индустријата.
Дополнително, податоците за инфлацијата во САД ќе ги обликуваат очекувањата за тоа кога Федералните резерви ќе почнат да ги намалуваат каматните стапки, што ќе влијае на побарувачката на енергија и движењата на доларот. Во последните две недели нафтата се тргуваше во тесен опсег од околу три долари за барел, при што тензиите на Блискиот Исток и намалувањето на понудата на ОПЕК+ го неутрализираа влијанието на поголемото производство надвор од групата, вклучувајќи ги и САД.
Од Монтреал до Берлин, градовите сакаат да бидат отворени 24 часа
Додека Њујорк често се нарекува градот кој никогаш не спие, технички му е потребна кратка дремка во 4 часот наутро, кога според прописите на државата е време за „последната тура“. Можеби Берлин или Токио треба да ја преземат оваа титула со оглед на тоа што во овие градови баровите можат законски да служат алкохол 24 часа на ден.
Монтреал би можел да биде најновото дополнување на таа листа. Канадскиот град, чии барови и клубови моментално се затвораат во три часот по полноќ, планира да воведе нова 24-часовна зона во населба во центарот на градот како дел од пошироките напори за инвестирање во ноќниот живот. Политиките за одржување на градовите отворени деноноќно почнаа да се зголемуваат откако Амстердам почна да издава 24-часовни дозволи за работа во 2013 година.
БЈД го претстави суперавтомобилот со кој ќе му биде ривал на „Ферари“
Кинеската БЈД (BYD) го претстави својот најскап автомобил - целосно електричен суперавтомобил со високи перформанси и вредност од 1,68 милиони јуани (233.450 долари) кој треба да им парира на луксузните опции што ги нудат ривалите како „Ферари“ и „Ламборгини“.
„Јангван У9“ првично ќе биде наменет исклучиво за кинескиот пазар, соопшти компанијата на настанот во Шангај што се емитуваше во живо. Автомобилот може да достигне 100 km/h (62 mph) за 2,36 секунди и да достигне максимална брзина од 309,19 km/h. БЈД стана најголемиот продавач на електрични во светот претекнувајќи ја „Тесла“ во последниот квартал од 2023 година.
.webp){kind=icon}
