Унгарскиот премиер Виктор Орбан сака да ја почека инаугурацијата на Доналд Трамп пред да се донесе одлука дали ќе се продолжат европските санкции кон Русија. На светските берзи се тргува со загуби, а нафтата е во пад втор ден по ред.
ПОЛИТИКА
Се заканува блокада на работата на американската влада?
Претставничкиот дом на американскиот Конгрес го отфрли привремениот план за финансирање на владата, кој го поддржа новоизбраниот претседател Доналд Трамп, што ја зголеми опасноста од потенцијална блокада на работата на американската влада. Трамп побара од законодавците зголемување на границата на долгот, како и помал пакет во однос на сегашниот предлог, кој предвидува 100 милијарди долари за грижа за деца, помош за фармерите и помош во случај на катастрофи. Делумната блокада може да започне веќе в сабота, доколку Конгресот не го усвои законскиот предлог за привремено финансирање на владата.
Орбан сака да почека со санкциите кон Русија
Унгарскиот премиер Виктор Орбан им порачал на лидерите на Европската Унија дека сака да ја почека инаугурацијата на Доналд Трамп пред да се донесе одлука за продолжување на европските санкции кон Русија. Тоа го тврдат извори запознаени со ситуацијата. Европската Унија досега воведе 15 рунди санкции кон Москва поради инвазијата на Украина, кои ги продолжува на секои шест месеци. Датумот за следното продолжување на санкциите е крајот на јануари, односно 11 дена по положувањето на заклетвата на Трамп.
Составот на новата француска влада ќе биде познат за викендот?
Францускиот премиер Франсоа Бајру има намера за време на викендот да го претстави составот на новата влада и да го достави буџетот до средината на февруари. Бајру, во интервју за телевизијата „Франс 2“ (France 2), предупреди дека неуспехот во решавањето на моменталниот политички хаос може да биде катастрофален за земјата.
Nathan Laine/Bloomberg
БЕРЗИ
Европа
Фјучерсите на европските акции утрово се тргуваат претежно во црвено, пред објавувањето на податоците за довербата на потрошувачите во еврозоната. Потсетуваме дека европските берзи во четвртокот драстично паднаа, откако американскиот Фед најави побавно темпо на намалување на каматните стапки во наредната година. Истовремено, централната Банка на Англија ја задржа клучната каматна стапка на 4,75 отсто и најави дека ќе продолжи со постепено намалување на каматите во 2025 година.
САД
И фјучерсите на американските индекси се тргуваат со загуби, пред објавувањето на најновите податоци за трошоците за лична потрошувачка во САД. Истовремено, приносите на 20-годишните обврзници пораснаа во четвртокот на 4,57 отсто, ниво што последен пат беше видено во мај. Индексот за доларот на „Блумберг“ се движи околу максимумот од 2022 година.
Азија
Акциите во азиско-пацифичкиот регион се тргуваат со загуби, пред објавувањето на клучното мерило за инфлација на Фед. Акциите во Австралија и Јужна Кореја се во пад, додека јапонските акции се тргуваат меѓу добивки и загуби. Приносите на едногодишните кинески обврзници паднаа на еден отсто првпат од глобалната финансиска криза, бидејќи трговците ги зголемија облозите на монетарно олеснување.
НАФТА
Нафтата падна втор ден по ред, продолжувајќи го неделниот пад, бидејќи зајакнувањето на американскиот долар ги притисна цените. Брентот се тргуваше околу 72 долара за барел и неделава падна речиси за три проценти, додека ВТИ (West Texas Intermediate) беше близу 69 долари.
Доларот доби дополнителен поттик откако Федералните резерви во средата најавија помали намалувања на каматните стапки следната година, правејќи ја нафтата поскапа за многу купувачи. Во меѓувреме, најголемата кинеска рафинерија „Синопек“ (Sinopec) соопшти во четвртокот дека побарувачката за бензин во земјата го достигнала врвот минатата година.
Bloomberg Mercury
.webp){kind=icon}
