Накратко од светот: Ќе ја потресе ли пресудата за Ле Пен јавната политика на Франција

Крајот на март не беше наклонет кон лидерката на крајната десница во Франција, Марин Ле Пен, осудена за проневера, а почетокот на овој месец мириса на дополнителна ескалација на трговската војна поради објавата на новите американски царини на 2 април.

ПОЛИТИКА

Пресудата на десничарката Ле Пен би можела да ја разниша јавната политика на Франција

Петгодишната забрана за кандидатура за претседателската функција на лидерката на француската крајна десница Марин Ле Пен би можела да ги разниша јавните финансии во таа земја. Француските јавни финансии само што се стабилизираа по промената на неколку премиери во текот на претходната година. На местото на кандидат на партијата Национално обединување на претседателските избори во 2027 година би можел да дојде Жордан Бардела (30). Да потсетиме, Ле Пен е прогласена за виновна за проневера на средства од фондовите на ЕУ и ѝ е изречена казна од две години затвор и две години условна слобода.

Новите американски царини ќе се разликуваат од земја до земја

Американскиот претседател Доналд Трамп в среда ќе го објави својот план за сеопфатни реципрочни царини на настан во Белата куќа, изјави портпаролката Каролин Левит. Таа додаде дека царините ќе се разликуваат од земја до земја.

 

ЕКОНОМИЈА

Дали ЕЦБ ќе паузира со монетарното попуштање?

Кога станува збор за монетарната политика, неколку официјални лица на Европската централна банка сметаат дека потенцијално треба да се паузира со намалувањето на каматните стапки на априлскиот состанок. Причината за повнимателниот став е несигурноста што ја носи политиката на американскиот претседател и растот на европската потрошувачка за одбрана. Имено, шансите за намалување на каматните стапки за четвртина процентен поен во април паднаа на 65 проценти во однос на претходните 85 проценти.

Да потсетиме дека Германија, најголемата европска економија, влегува во гигантска потрошувачка и задолжување кога станува збор за одбраната, но и за други прашања. Тие формираат специјален фонд од 500 милијарди евра за инфраструктура и уште еден таков за одбрана.

 

БЕРЗИ

Европа

Фјучерсите на европските акции се тргуваат претежно во зелено по веста дека Европската централна банка би можела да паузира со намалувањето на каматните стапки. Да потсетиме, европските берзи го завршија тргувањето во понеделник во црвено.

САД

Истовремено, фјучерсите на американските индекси се тргуваат во црвено, додека трговците размислуваат колкав ќе биде обемот на царините на Трамп најавени за 2 април. Да потсетиме, американските акции го забележаа најлошиот квартал во споредба со остатокот од светот од 2009 година. Ова беше првпат од почетокот на пандемијата (март 2020) обврзниците да пораснат, а акциите да паднат во тримесечен период. Доларот, кој долго време беше прибежиште за криење за време на распродажбите на пазарите, го претрпе најлошиот почеток на годината од 2017 година.

Азија

Кога станува збор за акциите во азиско-пацифичкиот регион, тие се тргуваат претежно во зелено, а најголем раст бележат јапонските акции. Централната банка на Австралија ја задржа референтната каматна стапка непроменета, бидејќи сака да види понатамошни докази за намалување на растот на инфлацијата пред да се врати на монетарното попуштање.

Bloomberg

 

Злато

На пазарот на благородни метали, цената на златото достигна нов рекорд, додека побарувачката за сигурно засолниште за капитал не стивнува. Вредноста на златото скокна на 3.133 долари за унца, по растот од 1,4 проценти. Да потсетиме, првиот квартал од 2025 година беше најдобриот квартал за златото од септември 1986 година.

 

Нафта

Цената на нафтата се стабилизираше по скокот во понеделник, кога претседателот Доналд Трамп сугерираше дека САД би можеле да работат на намалување на испораките на нафта од Русија, третиот најголем производител во светот и голем извозник. Во вторник, брент се тргуваше по цена малку пониска од 75 долари за барел (договор за јуни), откако фјучерсите пораснаа за 2,8 проценти во понеделникот. ВТИ во вторник беше над 71 долар.

 

Во моментов нема коментари за веста. Биди прв да коментира...

Остави коментар