Трамп го повика Путин да прифати договор за Украина

Претседателот на САД, Доналд Трамп, го засили притисокот врз Русија да преговара за крај на војната во Украина и се закани со финансиски санкции доколку земјата одбие брзо да го прекине конфликтот.

Во објава на социјалната мрежа Трут (Truth Social) во средата Трамп наведе дека рускиот претседател Владимир Путин треба да постигне договор „наскоро“ или, во спротивно, ќе „нема друг избор“ освен да воведе дополнителни даноци, тарифи и санкции за рускиот увоз во САД, заедно со мерки од „други земји учеснички“.

Трамп во предизборната кампања ветуваше дека брзо ќе го заврши конфликтот што започна со целосна руска инвазија на Украина во 2022 година. Но во последно време тој ги намали таквите ветувања, признавајќи ја тешкотијата за постигнување договор за прекин на конфликтот, додека руската армија бележи постепени напредувања. САД се најголемиот финансиски и воен поддржувач на Украина, а Трамп навести дека може да ја намали таа поддршка.

„Не сакам да ѝ наштетам на Русија. Го сакам рускиот народ и секогаш сум имал многу добри односи со претседателот Путин“, посочи Трамп. „Да ја завршиме оваа војна, која никогаш немаше да започне ако јас бев претседател! Можеме да го направиме тоа на лесен начин или на потежок начин – а лесниот начин секогаш е подобар. Време е да се „ПОСТИГНЕ ДОГОВОР. НЕ ТРЕБА ДА СЕ ЗАГУБАТ ПОВЕЌЕ ЖИВОТИ!!!“

Не е јасно кои стоки ќе бидат предмет на санкциите што ги најави Трамп или кои други нации би се придружиле на таквата иницијатива. Администрацијата на Трамп потенцијално би можела да цели на големи руски нафтени производители, што минатата недела го поддржа и новиот секретар за финансии Скот Бесент.

Другите опции вклучуваат целење на банки од трети земји што овозможуваат руски трансакции или запленување на околу 300 милијарди долари руски резерви што се замрзнати во западните земји од почетокот на инвазијата, предвидува „Блумберг економикс“ (Bloomberg Economics), иако двете мерки носат одредени ризици.

Потенцијалот за воведување царини е ограничен, бидејќи САД увезоа само околу 4,6 милијарди долари стоки од Русија во 2023 година – помалку од 0,2 отсто од вкупниот увоз, според податоци собрани од „Блумберг“. САД веќе воведоа обемни санкции за Русија, но се соочуваат со тешкотии да убедат некои од клучните трговски партнери на Русија – како Индија – да ги намалат своите набавки.

Трамп претходно изјави дека во подготовка е средба со Путин, иако не е објавен датум или место. Путин претходно неделава изјави дека Кремљ е подготвен за разговори, иако се фокусира на потребата од долгорочен мир. Трамп минатата година се сретна со украинскиот претседател Володимир Зеленски во Њујорк и нагласи дека украинскиот лидер е подготвен да го заврши конфликтот.

Американскиот претседател, кој стапи на функцијата во понеделникот, веќе ја презеде заслугата за посредување во прекинот на огнот и договорот за заложници во Газа меѓу Израел и Хамас, група што САД ја означуваат како терористичка организација.

Во неговата прва вечер по враќањето во Белата куќа, Трамп го предупреди Путин дека неговата земја ќе страда ако нема мир во Украина. „Мислам дека тој ја уништува Русија со тоа што не постигнува договор“, изјави Трамп, посочувајќи на високата инфлација како знак за економска слабост. „Мислам дека Русија ќе биде во големи проблеми“.

Во моментов нема коментари за веста. Биди прв да коментира...

Остави коментар