Пекинг возвраќа на тарифите на Трамп: Истрага против „Гугл“ и нови царини

Кина воведе царини за низа американски производи и најави истрага за „Гугл“ (Google) неколку моменти откако претседателот Доналд Трамп воведе царина од 10 отсто на стоки од Пекинг, што повторно ја разгоре трговската војна меѓу најголемите светски економии. 

Кина отвори истрага против американскиот технолошки гигант за наводни антимонополски прекршувања, се вели во соопштението од Државната управа за регулирање на пазарот. Пекинг воведе давачка од 15 проценти за американскиот јаглен и течниот природен гас, а ја таргетираше нафтата и земјоделска опрема со надомест од 10 отсто.

Кинеските власти, исто така, ги ставија „ПВХ Корп.“ (PVH Corp), сопственичка на „Келвин Клајн“ (Calvin Klein) и американската компанија за секвенционирање на гени „Илумина“ (Illumina Inc.) на таканаречената црна листа на ентитети и наметнаа нова контрола на извозот на материјали поврзани со волфрам.

„Едностраното воведување царини од страна на САД сериозно ги крши правилата на Светската трговска организација“, се вели во соопштението на кинеското Министерство за финансии во кое ги објави новите царини. „Тоа не само што не помага во решавањето на сопствените проблеми, туку ја поткопува и нормалната економска и трговска соработка меѓу Кина и САД“.

Одговорот на претседателот Шји Џјинпинг изгледаше внимателно насочен за да се избегне голем удар на кинеската економија, истовремено покажувајќи му на Трамп способност да нанесе штета на низа фронтови, вклучително и со нарушување на синџирот на снабдување со критични минерали и нанесување штета на американските компании со големи операции на копното.

Воздржаноста, заедно со шпекулациите дека Шји може да направи повеќе за зајакнување на кинеската економија, доведе до релативно тивка реакција на пазарите - особено кога Трамп сигнализираше желба да разговара со кинескиот лидер пред да стапат на сила тарифите.

Доларот закрепна по веста, додека офшор јуанот ја зголеми својата загуба на 0,3 проценти, а валутите на Австралија и Нов Зеланд, кои имаат силни трговски врски со Кина, се лизнаа за речиси еден процент. Другите азиски валути, како тајландскиот бах и индонезиската рупија, ги намалија своите добивки.

„Одмерено и соодветно“

Одговорот на Кина беше „одмерен и соодветен“, според Дилан Лох, асистент-професор по политика на технолошкиот Универзитет Нанјанг во Сингапур.

„Тоа му овозможува на Пекинг да создаде слика дека нешто прави, без да реагира на начин кој би се сметал за покана за понатамошна одмазда“, додаде тој. „Мислам дека Пекинг исто така гледа што направија Канада и Мексико и знае дека сè уште можат да дојдат до некакво разбирање“.

Владата на Шји возврати со својата одмазда речиси веднаш по стапувањето на сила на американските царини. Таа акција ги уништи надежите дека Пекинг ќе постигне договор за избегнување на царините, откако Трамп рече дека наскоро ќе разговара со Шји. Републиканецот неколку часа претходно им даде на Канада и Мексико одложување на тарифите од 25 отсто во последен момент по разговорите со лидерите.

САД обезбедија околу шест проценти од кинескиот увоз на ЛНГ минатата година, според податоците за следење на бродови. Кина увезува малку јаглен од САД. Услугите за пребарување и интернет на „Гугл“ за потрошувачите се недостапни во Кина од 2010 година, иако компанијата ги задржува операциите во земјата, првенствено околу нејзиниот рекламен бизнис.

„Ова може да се протолкува како предупредување за американските претпријатија кои имаат голема зависност од кинескиот пазар“, рече Лин Сонг, главен економист за Голема Кина во „ИНГ Бенк“ (ING Bank) во Хонг Конг. „Сè уште постои надеж дека тарифите би можеле брзо да се повлечат по разговорите лице в лице“.

Сонг ги нарече чекорите „прилично пригушена одмазда“, истакнувајќи дека енергијата претставува мал дел од увозот на Кина од САД.

Кина е најголемиот производител на волфрам, со околу 80 проценти од глобалното производство. Волфрамот, познат по својата извонредна густина и високата точка на топење, делува како тампон против интензивните температури и најчесто се користи во ракетите кои пробиваат оклоп во одбранбената индустрија.

ПВХ е исто така сопственичка на „Томи Хилфигер“и е под истрага од кинеските регулаторни власти за наводно бојкотирање на памукот од регионот Ксинџијанг. „Илумина“ е водечки глобален снабдувач на генетско секвенционирање и ривал на кинескиот биотехнолошки гигант „БГИ Геномникс“ (BGI Genomics Co).

Трамп во текот на викендот нареди да стапи на сила сеопфатната давачка за кинескиот извоз во вторник по полноќ во САД, поради, како што го нарече, неуспехот на Пекинг да го спречи протокот на нелегални дроги. Наредбите вклучуваа одмазднички клаузули кои ќе ги зголемат тарифите доколку земјите одговорат во иста мера.

Поагресивен одговор од Пекинг би ризикувал спирала на односите меѓу САД и Кина кои беа на постабилна основа откако Шји и поранешниот американскиот лидер Џо Бајден седнаа во Сан Франциско во ноември 2023 година.

Двете земји ја продолжија размената на високо ниво и покрај постојаните тензии околу технолошкиот пристап и територијалните спорови. Шји и Трамп разговараа телефонски пред неговата инаугурација за да разговараат за трговијата, „Тикток“ (TikTok) и фентанилот.

Трамп во понеделникот рече дека двајцата лидери ќе зборуваат повторно, „веројатно во следните 24 часа“, тврдење на кое Пекинг јавно не одговори.

Во моментов нема коментари за веста. Биди прв да коментира...

Остави коментар