ЕУ предупредува дека би можела да ги забрза одмаздничките царини кон САД

Европската Унија се подготвува за уште една рунда трговски разговори со САД и предупреди дека може да ги забрза одмаздничките мерки доколку претседателот Доналд Трамп ги спроведе своите закани за царини, од кои последната вклучува данок од 50 проценти за увоз на челик и алуминиум.

Европската комисија, која се занимава со трговските прашања на ЕУ, во понеделникот соопшти дека „силно“ жали за зголемувањето на царините - во споредба со првично планираните 25 проценти - и рече дека овој потег ги поткопува напорите за постигнување решение за трговскиот конфликт.

Главниот раководител на ЕУ за трговија, Марош Шефчовиќ, ќе се сретне со американскиот трговски претставник Џејмисон Грир во среда во Париз, а тим од комисијата е на пат кон Вашингтон за да продолжи со техничките разговори, изјави портпаролот на Комисијата, Олоф Гил, за новинарите во Брисел во понеделникот.

„Доколку не се постигне заемно прифатливо решение, и постојните и можните дополнителни контрамерки на ЕУ автоматски ќе стапат на сила на 14 јули или порано доколку тоа го бараат околностите “, рече Гил. „Комисијата во секое време беше јасна во врска со својата подготвеност да дејствува во одбрана на интересите на ЕУ, заштитувајќи ги нашите работници, потрошувачи и индустрија.“

ЕУ се обидува да ги забрза преговорите со САД пред крајниот рок на 9 јули, кога Трамп рече дека ќе воведе царина од 50 проценти врз речиси целиот увоз на блокот. Тој го критикуваше блокот дека е нефер во трговијата и ја повика ЕУ да го намали трговскиот суфицит на стоки и да ги намали царинските и нетарифните бариери, како што е данокот на додадена вредност.

Трамп претходно се согласи да го одложи спроведувањето на царините за метали, како и за автомобили и делови за автомобили, во обид да овозможи преговори за постигнување поширок трговски договор. ЕУ, исто така, се согласи да ги задржи своите контрамерки.

ЕУ одобри царини за американски стоки од 21 милијарда евра (24 милијарди долари) како одговор на давачките на Трамп за метали кои можат брзо да се спроведат. Тие се насочени кон политички чувствителни американски држави и вклучуваат производи како што се соја од Луизијана, дом на претседателот на Претставничкиот дом Мајк Џонсон, како и земјоделски производи, живина и мотоцикли.

Блокот, исто така, подготвува дополнителен список на царини за американски производи во вредност од 95 милијарди евра. Овие мерки, кои се одговор на „реципрочните“ давачки и автомобилски давачки на Трамп, би се однесувале на индустриските стоки, вклучувајќи ги авионите на „Боинг“, автомобилите произведени во САД и бурбонот.

„Во случај нашите преговори да не доведат до избалансиран исход, ЕУ е подготвена да воведе контрамерки, вклучително и како одговор на ова најново зголемување на царините“, рече Гил.

Иако предупреди за понатамошни царини, блокот рече дека негов приоритет е да се овозможи простор за преговори и дека намалувањето на давачките останува долгорочна цел.

Преговарачката стратегија на комисијата се фокусира на критичните сектори - како што се полупроводниците и фармацевтските производи - како и на царинските и нетарифните бариери, објави претходно „Блумберг“. Комисијата, исто така, ќе го поврзе својот пристап кон решавање на регулаторните бариери со своите планови за поедноставување на правилата.

Индустриите на кои ќе се фокусира Шефковиќ или веќе се погодени од американски царини или се наменети за идни давачки. ЕУ предложи продлабочување на соработката со САД во тие сектори како дел од претходниот предлог споделен со САД минатата недела, објави „Блумберг“.