Фридрих Мерц: Путин и Зеленски нема да се сретнат

Средба меѓу украинскиот претседател Володимир Зеленски и рускиот лидер Владимир Путин веројатно нема да се одржи, изјави германскиот канцелар Фридрих Мерц, иако претходно беше најавена од американскиот претседател Доналд Трамп.

„Очигледно нема да се случи средба меѓу Зеленски и Путин, без разлика што било договорено меѓу претседателот Трамп и Путин“, изјави Мерц во четвртокот пред новинарите во близината на Тулон, Франција.

Белата куќа претходно соопшти дека верува оти Путин се согласил на средба со украинскиот претседател и дека подготовките се „во тек“. Но Кремљ никогаш не ја потврди својата посветеност и досега не е закажан никаков самит. Во понеделникот Трамп призна дека не „знае дали тие ќе се сретнат“.

Трамп во текот на неделата изјави дека разговарал со Путин и дека, според него, одбивноста на рускиот претседател кон Зеленски ја кочи можноста за средба меѓу двајцата лидери, кои досега се сретнале само еднаш – во 2019 година. Во вторникот Трамп предупреди на „економска војна“ доколку Русија и Украина не го прекинат конфликтот, истакнувајќи дека ќе има „многу сериозни“ последици доколку борбите продолжат.

Во меѓувреме Русија почна нов бран напади со дронови и ракетни напади врз Киев, игнорирајќи ги повиците на САД за прекин на судирите.

Дваесет и еден човек загинаа во руски воздушен напад, кој уништи станбена зграда во Киев, соопштија локалните власти во четвртокот вечер. Спасувачките екипи продолжуваат со работа, а можно е под урнатините да има уште луѓе.

Канцеларија на Европската Унија во главниот град исто така беше оштетена во нападот.

Мерц вчера го осуди нападот. „Русија повторно го покажа своето вистинско лице во текот на ноќта“, напиша тој на платформата X. „Фактот дека сега и канцеларијата на ЕУ стана цел сведочи за сè поголемата бескрупулозност на рускиот режим.“

Белата куќа, пак, соопшти дека Трамп бил „незадоволен, но не и изненаден“ од последните руски напади.

„Ова се две земји што многу долго време се во војна“, изјави вчера портпаролката Каролина Левит.

„Русија го изврши овој напад врз Киев, а исто така Украина неодамна нанесе удар врз руските рафинерии на нафта“, додаде таа, потсетувајќи на серијата напади во текот на август.

Коментарите на Левит, како и објавата на социјалните мрежи во четвртокот во која американскиот пратеник Кит Келог ги нарече нападите „скандалозни“ и предупреди дека тие ја загрозуваат мировната иницијатива, ја отсликуваат сè поголемата фрустрација на американската администрација од Путин во врска со конфликтот што Трамп првично вети дека ќе го реши уште во првиот ден од неговото враќање на власт.

Целта на Путин е „да го убеди Трамп дека е подготвен за разговори“, додека продолжува со офанзивни операции против Украина, изјави Марија Снеговаја, виша соработничка во програмата за Европа, Русија и Евроазија во Центарот за стратешки и меѓународни студии.

Денеска високи украински функционери, меѓу кои и Андриј Јермак, шеф на претседателската администрација на Украина, се очекува да отпатуваат во САД за размена на идеи за поствоена безбедност со претставници на администрацијата на Трамп. Сепак, притисокот од претходните разговори изгледа дека е намален.

„Ништо не се случи, затоа што Путин нема интерес да се сретне со Зеленски, тој има голем интерес да избегне санкции“, изјави Џон Хербст, поранешен американски амбасадор во Украина и во Узбекистан.

По најновиот руски напад, Украина побара состанок на Советот за безбедност на Обединетите нации, кој треба да се одржи в петок попладне во Њујорк.