Владата на Макрон со старите министри повторно ризикува политички колапс

Одлуката на францускиот претседател Емануел Макрон да назначи речиси непроменет кабинет веднаш предизвика силна реакција од опозициските партии, поткопувајќи ги шансите на премиерот Себастијан Лекорну да ја преживее клучната недела во парламентот.

Повеќето високи членови од кабинетот на разрешениот премиер Франсоа Баиру повторно беа именувани на своите функции, со јасен знак на продолжување на центристичките политички цели на Макрон. Претседателот не го преименува Ерик Ломбард на функцијата министер за финансии, но неговиот наследник Ролан Лескир е негов близок сојузник, кој претходно го водеше индустрискиот ресор.

Лидерката на крајната десница Марин Ле Пен во објава на социјалните мрежи изјави дека континуитетот на Макрон е „патетичен“ и дека нејзината партија Национален сојуз е „без зборови“. Социјалистичката партија, која има потенцијално клучно гласачко место во Националното собрание, уште еднаш предупреди дека ќе поддржи иницијатива за соборување на Лекорну доколку тој не покаже јасна промена на насоката.

„Без промена на политиката, социјалистите ќе гласаат недоверба“, изјави портпаролот на партијата Пјер Жуве за БФМ ТВ (BFM TV) во неделата вечер. „Имаме претседател и премиер што, во суштина и по убедување, не сакаат ништо да променат.“

Ролан Лескир, Фотограф: Нејтан Лејн / „Блумберг“ 

Лекорну, кој управува без мнозинство во Националното собрание, се соочува со истата нерешлива задача што ги урна мандатите на неговите двајца претходници – усвојување буџет во поделен парламент, што веројатно ќе вклучува непопуларни намалувања на трошоците и зголемување на даноците, неопходни за ограничување на најголемиот дефицит во еврозоната.

Баиру беше принуден да поднесе оставка минатиот месец, откако го загуби гласањето за доверба поради неговиот план за драстично намалување на дефицитот следната година. Во декември минатата година неговиот претходник Мишел Барние исто така беше разрешен поради предложените кратења во буџетот.

Лекорну ќе се соочи со сличен тест неделава, бидејќи опозициските групи најавија дека ќе спроведат гласање за недоверба веднаш штом тој официјално ќе ги изложи своите политички приоритети во обраќањето пред Националното собрание во вторник.

Политичките и фискалните тешкотии по неуспешниот обид на Макрон со изборите минатата година предизвикаа повремени распродажби на француски хартии од вредност, што ги зголеми трошоците за задолжување на земјата во споредба со нејзините европски партнери.

Еврото ослабе за 0,2 отсто и достигна 1,1718 долари во раното тргување по објавата на Макрон, во услови на зголемена побарувачка за американската валута.

Француската политика го зголемува ризикот

Разликата во однос на Германија нагло порасна од август наваму

Bloomberg

Разликата во приносот меѓу француските и германските државни обврзници – клучен показател за фискалниот ризик – се прошири на околу 81 базичен поен, од најниско 65 во август, пред Баиру да објави дека ќе ризикува гласање за доверба во Националното собрание.

Покрај повисоките трошоци за задолжување, новата влада мора да се соочи и со влошена економска состојба, бидејќи компаниите и домаќинствата ги ограничуваат трошењето и инвестирањето поради неизвесноста.

Владата на Баиру успеа во февруари да го протурка задоцнетиот буџет за 2025 година, нудејќи им отстапки на пратениците од Социјалистичката партија за да убеди доволен број од нив да се воздржат при гласањето за недоверба.

Но централно-левичарската партија на крајот се сврте против Баиру и оттогаш зазеде построг став во преговорите со Лекорну. Нивните барања вклучуваат побавно темпо на намалување на дефицитот, воведување данок на богатство предложен од економистот Габриел Зукман и укинување на законот на Макрон од 2023 година за зголемување на старосната граница за пензионирање.

Политички групи во Националното собрание на Франција

Bloomberg

Во изминатите неколку дена претставници на Социјалистичката партија изјавија дека предлозите за компромиси на Лекорну се недоволни и нема да ги спречат да поддржат гласање за недоверба.

Именувањата на Макрон и Лекорну на највисоките позиции во новата влада не укажуваат на промена на насоката што ја бараат опозициските партии. Бруно Ретајо останува на чело на Министерството за внатрешни работи, Жералд Дарманен продолжува да ја извршува функцијата министер за правда, а поранешната премиерка Елизабет Борн – која го спроведе пензискиот реформски план на Макрон – беше задржана на функцијата министерка за образование.

Амели де Моншален, која ги подготви нацрт-буџетот за 2025 година и плановите на Баиру, исто така останува на својата позиција како министерка за буџет.

Единственото изненадување е враќањето на Бруно Ле Мер, кој ќе го преземе ресорот одбранa. Но тој беше министер за финансии во првите седум години од претседателскиот мандат на Макрон и е тесно поврзан со неговите клучни политики.

Себастијан Лекорну во Националното собрание во Париз. / Извор: „Блумберг“ 

„Му ставивме до знаење на премиерот: или ќе раскрсти со минатото или ќе следува недоверба“, изјави лидерот на крајно десничарската партија Национален сојуз (National Rally), Жордан Бардела, во објава на X. Новата влада, додаде тој, „целосно се заснова на континуитет и нема апсолутно ништо за да му се стави крај на минатото, што францускиот народ го очекува“.

Меѓу маслиновите гранчиња што Лекорну им ги понуди на опозициските партии е и ветувањето дека нема да го користи уставниот инструмент познат како член 49.3 за да ги заобиколи гласањата во парламентот за финансиските закони.

Иако тоа може привремено да ги смири политичките партии, значи дека неговите министри ќе мора да направат поголеми отстапки пред пратениците за да обезбедат можност да се формира мнозинство за усвојување на буџетот за 2026 година.

Доколку владата го преживее тестот на гласањата за недоверба неделава, министерот за финансии Лескир ќе биде фрлен во срцевината на буџетските преговори во наредните недели. Лескир (58) е близок сојузник на Макрон – ја напуштил својата кариера во финансискиот сектор за да му се придружи на претседателот во неговата прва изборна кампања во 2017 година.

Подоцна беше избран за пратеник во Националното собрание, каде што ја извршуваше функцијата претседател на Комисијата за економски прашања во текот на првиот мандат на Макрон. Во 2022 година беше назначен за министер за индустрија, функција што ја извршуваше до падот на владата на Барние.

Повремено бил критички настроен кон централно-десничарските сојузници на Макрон и нивните предлози за заострување на политиките за имиграција. Лескир исто така изјавил дека накратко бил член на Социјалистичката партија во 2000-тите години, за да ја поддржи претседателската кандидатура на Доминик Штраус-Кан.