Каја Калас им посака „среќа“ на САД во обидот да го придобијат Путин на преговарачката маса

Високата претставничка на Европската Унија за надворешна политика изрази скепса кон американскиот предлог за обновување на економските врски со Русија, како дел од разговорите за ставање крај на војната што Москва ја води против Украина.

„Русија не е држава заснована на владеење на правото и видовме како компании беа национализирани, па затоа велам - со среќа со тоа“, изјави денеска Каја Калас во интервју за „Блумберг ТВ“ (Bloomberg Television).

Соединетите Американски Држави воведоа обемни санкции против Москва од почетокот на војната и подготвуваат нови мерки насочени кон енергетскиот сектор, со цел да го зголемат притисокот доколку претседателот Владимир Путин одбие мировен договор со Украина, објави претходно „Блумберг“.

Но, како дел од тековните преговори, САД понудија и обновување на економските врски и големи инвестиции.

„Постои силен притисок за мир, особено затоа што Украинците навистина сакаат мир до Божиќ, но процесот е малку едностран, бидејќи Русија не се согласи со ниту една од точките“, изјави Калас.

„Треба да се поместиме од состојба во која тие се преправаат дека преговараат кон ситуација во која ќе бидат навистина притиснати да преговараат.“

Во меѓувреме европските земји се обидуваат да обезбедат пристап до замрзнатите средства на руската централна банка што се наоѓаат во ЕУ, за да обезбедат заем од 90 милијарди евра (106 милијарди долари) за Украина. Лидерите на ЕУ денеска се соочуваат со клучна одлука дали тие средства да бидат искористени.

Без нови финансиски средства, Украина најверојатно ќе остане без пари напролет.

Напорите за одобрување на заемот наидоа на отпор од неколку земји членки, предводени од Белгија, каде што се наоѓа најголемиот дел од средствата. Земјата бара цврсти гаранции дека нема да преземе одговорност доколку Русија успее судски да си ги поврати парите.

„Белгија е под силен притисок од Русија, од сите европски земји, но и од САД, и за да се намали тој притисок, треба да донесеме европско законодавно решение, бидејќи тогаш одговорноста ќе биде европска, за сите нас, со што ќе се симне товарот од Белгија“, изјави Калас.

Преговорите во Берлин, одржани во текот на неделава, резултираа со понуда за силни безбедносни гаранции од страна на САД, но разговорите и натаму се оптоварени со тешкото и нерешливо прашање за територијата. Рускиот претседател Владимир Путин досега даде малку сигнали дека е подготвен да ја прекине целосната инвазија, која се приближува кон четвртата година.

Украинскиот претседател Володимир Зеленски, кој денеска им се придружи на европските лидери на нивниот самит во Брисел, изјави дека делегација од Киев в петок и сабота ќе отпатува во САД на нова рунда разговори.

„Путин сака ние да не успееме, а тоа не смееме да му го дозволиме“, изјави Калас.