Кинески производител на луксузни автомобили го надмина БМВ

За помалку од четири години, „Серес“ (Seres Group Co.), мала кинеска автомобилска компанија што претходно беше најпозната по своите мини-комбиња од 30.000 јуани (околу 4.200 долари), ги надмина луксузните автогиганти БМВ (BMW) и „Мерцедес“ (Mercedes) и стана најбараниот продавач на луксузни автомобили во Кина.

Порано позната како ДФСК (DFSK Motor), компанијата „Серес“ во 2021 година се здружи со технолошкиот гигант „Хуавеј“ (Huawei Technologies Co.) за да го лансира брендот „Аито“ (Aito), наменет за производство на електрични и хибридни теренски возила од повисока класа. Оттогаш „Серес“ доживеа вртоглав подем. Продажбата тројно се зголеми за три години, достигнувајќи околу 427.000 возила во 2024 година, додека акциите на компанијата на берзата во Шангај пораснаа за 120 проценти.

„Аито“ ги надмина сите луксузни брендови

„Аито“, благодарение на популарниот теренец модел M9, стана најпродаван автомобилски бренд во Кина минатата година во категоријата возила поскапи од 500.000 јуани (над 60.000 евра), иако моделот беше лансиран дури на крајот на 2023 година. Според шангајската консултантска куќа „Тинкер кар“ (ThinkerCar), испорачани се околу 151.000 примероци од овој пространо дизајниран модел, кој вклучува оперативен систем хуавеј хармони (Huawei Harmony), контролна табла со три екрани, опции како двозонска клима и амбиентално осветлување.

Основната верзија на „аито M9“ со батерии започнува од 509.800 јуани Фото: Qilai Shen/Bloomberg

На Саемот за автомобили во Шангај во април претседателот на „Серес“, Жанг Сингхаи, изјави дека водечките модели на „Аито“ „го преобликуваат пазарот на луксузни автомобили во Кина“.

„Денешниот успех на ’Аито’ е резултат на препознавање од пазарот и преференции на потрошувачите“, рече Жанг. Освен моделот M9, најновиот модел на „Аито“ е M8, нешто помал теренец лансиран претходно годинава.

Луксузот повеќе не е резервиран само за старите играчи

Луксузниот сегмент во Кина досега се сметаше за последниот дел од автомобилскиот пазар што беше релативно заштитен од транзицијата кон електрични возила – транзиција што остави странски производители како „Фолксваген“ (Volkswagen AG) и „Џенерал моторс“ (General Motors Co.) да се борат да ја стигнат конкуренцијата. До неодамна се веруваше дека новите производители на електрични возила, без автомобилска репутација, не можат да се натпреваруваат со престижот на големите брендови. „Аито“ го докажа спротивното и покажа дека вкусовите на кинеските потрошувачи за луксуз се менуваат.

Внатрешност на моделот М9 Фото: Qilai Shen/Bloomberg

Ова е исто така сведоштво за успехот на кинеските производители на паметни телефони, „Хуавеј“ и „Шаоми“ (Xiaomi Corp). Кога пред четири години најавија независен влез на пазарот за електрични возила, беа дочекани со голем скептицизам. Иако седанот „шаоми СУ7“ (SU7) и понатаму е баран, компанијата ја погоди фаталната несреќа во март во која беше вклучено едно од нивните возила.

Не им веруваа

На една прес-конференција во 2022 година, Жанг рече дека многумина се сомневале дека „Серес“, кој дотогаш произведувал главно евтини мини-комбиња, и „Хуавеј“, кој никогаш претходно не произведувал автомобили, можат да создадат успешен луксузен бренд.

Но успехот на „Серес“, барем засега, не е без предизвици. Пазарот на луксузни автомобили во Кина падна за 23 отсто во 2024 година, според податоците на „Тинкер кар“, како резултат на забавената економија и ослабената побарувачка.

Тука е и тековната ценовна војна. Цената за повеќето освежени верзии на M9 за 2025 година падна за 10.000 до 20.000 јуани, и „Аито“ почна да заостанува. Во јануари и февруари „Мерцедес“ испорача 22.160 возила, а БМВ продаде 18.130, надминувајќи го „Аито“, кој продаде 17.190 единици, според „Тинкер кар“. Вкупната продажба на „Серес“ исто така опадна во првиот квартал – за 42 процента.

 

 

Број на продадени возила во Кина во 2024 година. Луксузниот сегмент е дефиниран како автомобили со цена над 500.000 јуани (60 илјади евра). Извор: ThinkerCar

 

„Хуавеј“ соработува и со други

Уште еден предизвик за „Серес“ е партнерството со „Хуавеј“. Технолошкиот гигант сега склучува слични софтверски договори и со други автомобилски производители. Лансирани се проекти како „Луксид“ (Luxeed) со ЧА (Chery Automobile Co.) и „Стелато“ (Stelato) со БАИК (BAIC Motor Corp.), кои исто така целат на премиум сегментот. Тоа предизвика загриженост за хомогенизација и меѓусебен канибализам. Дури и некои европски конкуренти на „Серес“, како БМВ, склучија партнерство со „Хуавеј“ за да понудат паметни функции во своите возила.

Ричард Ју, кој го води потрошувачкиот сектор на „Хуавеј“, останува оптимист, велејќи дека на брендот „Аито“ му требало време да се пробие.

„Секогаш кога градиме бренд, особено луксузен бренд, тоа е огромна работа“, рече Ју на претставувањето производи во септември. „Но нема да се откажеме и ќе продолжиме да опстојуваме“, додаде тој, потенцирајќи дека „Хуавеј“ е решен секој автомобилски бренд што ќе го создаде со партнери – не само „Аито“ – да го направи успешен.

Во моментов нема коментари за веста. Биди прв да коментира...

Остави коментар