Нов концепт на „Ауди“ ја најавува новата ера на брендот

Новиот концепт-автомобил на „Ауди“ (Audi) беше претставен во Милано, во момент кога производителот се снаоѓа на пазар разнишан од царини и млаки глобални продажби на електрични возила. „Ауди концепт ц“ (Audi Concept C) е двосед и целосно електричен спортски автомобил со тврд покрив, кој се повлекува во тарга-стил; неговото елегантно, модернистичко тело изгледа како стопен метал преточен во единствен блок од титан.

„Ова е нашиот пат“, вели главниот извршен директор на „Ауди“, Гернот Долнер, наведувајќи дека очекува брендот да ја достигне пресвртната точка помеѓу глобалната продажба на мотори со внатрешно согорување и хибриди и своите целосно електрични возила, околу 2030 година. „Овој автомобил ќе нè однесе во наредниот век.“

„Концепт ц“ има покрив од три дела што се собира со допир на копче, трансформирајќи го автомобилот во елегантен кабриолет. Фото: Audi

Автомобилот има малку украси и нималку дополнителни детали, како одговор на она што раководителите го нарекоа „слабо дефинирани и прекомплицирани ауди-модели од минатото“. Има рамен низок капак на моторот и вертикална црна решетка меѓу острите воздушни канали, кои стојат како столбови од секоја страна. Рабовите кај тркалата од 53 см и затворениот заден дел со масивни широки рамена и три хоризонтални лајсни што се спуштаат од покривот го заокружуваат неговиот монолитен дизајн. Со должина од приближно 450 см и ширина од 195 см, тој е подолг и поширок од претходните генерации на „ауди тт“ и „ауди р8“, но и натаму потсетува на нив.

Фото: Audi

 

Сепак, раководителите на „Ауди“ брзо истакнаа и неколку икони од историјата на брендот. Масимо Фраскела, поранешен шеф на дизајн во ЈЛРА (Jaguar Land Rover Automotive Plc), го предводеше дизајнерскиот тим, кој силно се инспирираше од малиот „тт“. „За мене, ‘тт‘ беше повеќе од автомобил, тоа беше порака: не мора да викаш за да те слушнат“, вели Фраскела, кој му се приклучи на „Ауди“ во 2024 година. „Не ти треба премногу за да оставиш впечаток.“

Внатре, неколку алуминиумски копчиња и природно ткаен текстил на седиштата и подот даваат пријатна тактилна атмосфера. Монохроматската сива палета на бои е инспирирана од истиот тон како и надворешноста. Звучниците се невидливи, скриени зад ткаените облоги на вратите; централниот екран чувствителен на допир од 26,5 см, монтиран на минималистичка контролна табла, се склопува кога не е потребен.

Внатрешноста има минималистичка контролна табла и природни ткаени материјали. Фото: Audi 

„Не сакаме купувачот да се чувствува преплавено“, вели Улрих Бајерлајн, шеф за архитектура на ентериерот во „Ауди“. „Сè се сведува на информација на барање.“

„Концепт ц“ исто така одразува елементи од историските тркачки модели на „Ауди“ од 1930-тите, особено заоблената правоаголна решетка на „ауто унион тип ц“ (Auto Union Type C). Четири светлосни снопа во тенки ленти на предните и задните светла потсетуваат на четирите прстени што компанијата, тогаш позната како „Ауто унион“ (Auto Union), ги усвоила како свој амблем во 1932 година.

„Концепт ц“ вози на тркала со дијаметар од 53 сантиметри. Фото: Audi 

Автомобилот означува почеток на повеќе планирани модели што ќе ја прикажат новооткриената едноставност. Особено е впечатливо враќањето на воланот со целосен круг, враќајќи го брендот во ерата пред многу спортски автомобили да добијат волани со рамен долен дел или издолжени форми. „‘Ауди‘ наскоро ќе нуди околу пет различни волани во своето портфолио – значително помалку од сегашните сто“, вели Долнер.

„Порано правевме премногу од сè – имавме премногу варијации и премногу опции за купувачите“, вели тој. „Радикалното поедноставување на нашата бизнис-структура ќе го следи и радикален дизајнерски пристап, совршено насочен да му понуди повеќе карактер на купувачот во иднина.“

Помалку е повеќе, велат дизајнерите во „Ауди“. Фото: Audi 

 

„Концепт ц“ доаѓа во момент кога брендот во сопственост на „Фолксваген“ (Volkswagen AG) минува низ голема транзиција - ја обновува својата понуда на модели, започнува нов бренд во Кина, ја затвора фабриката во Брисел и разгледува фабрика во САД за да ги ублажи последиците од царините на претседателот Доналд Трамп. До крајот на годинава „Ауди“ ќе претстави повеќе од 20 нови модели од почетокот на 2024 година. Следната недела ќе го претстави новиот „ауди ку-3 спортбек е-хибрид“ (Audi Q3 Sportback e-hybrid) на автомобилскиот саем ИАА (IAA) во Минхен, а до 2026 година планира да лансира целосно електричен модел од почетно ниво.

Производството ќе започне во 2027 година. Фото: Audi 

Производството на „концепт ц“ ќе започне во 2027 година, вели Долнер, во форма што ќе биде многу блиска до концептот Баухаус. Глобалниот обем на продажба би можел да достигне „многу ниска петцифрена бројка“, вели тој. Цената се очекува да биде поексклузивна од „тт“ (кој во 2023 чинеше околу 46.000 евра), но подостапна од „р8“ (кој при неговото укинување во 2020 година чинеше околу 156.000 евра).

Во моментов нема коментари за веста. Биди прв да коментира...

Остави коментар