Кинескиот луксуз во центарот на вниманието на Саемот за автомобили во Торино

Торино за Италијанците е симбол на автомобилската индустрија и гордост на дизајнот. Градот на северот на земјата, во Пиемонт, со околу 850.000 жители, повеќе од еден век е епицентар на италијанската автоиндустрија, особено како седиште и колепка на „Фиат“ (Fiat). Торино е исто така домаќин на Салонот за автомобили, кој секоја година собира најиновативни изложувачи и премиум возила од целиот свет. Сепак, додека многумина очекуваа класична италијанска елеганција и врвен дизајн од домашните брендови како „Италдизајн“ (Italdesign) и „Пининфарина“ (Pininfarina), посетителите на годинашниот Салон во Торино беа изненадени од кинеските производители.

„ДФСК мотор“ е компанија формирана од „Серес груп“ (поранешна „Сокон груп“) и „Донгфенг“ Фото: Giuliano Berti/Bloomberg

БЈД (BYD), „Донгфенг“ (Dongfeng), „Гили“ (Geely), „Липмотор“ (Leapmotor) и „Џаеку“ (Jaecoo) практично го „украдоа шоуто“, доминирајќи на изложбата и привлекувајќи внимание со своите електрични модели, футуристички концепти и импресивни простори за тест-возење.

Присутни беа и штандовите на сите брендови од групата „Стелантис“ (Stellantis) - од „Абарт“ (Abarth) и „Алфа Ромео“ (Alfa Romeo), преку „Ланчија“ (Lancia) и „Фиат“, до „Џип“ (Jeep) и „Липмотор“, „Масерати“ (Maserati) и ДС (DS), па до „Пежо“ (Peugeot), „Ситроен“ (Citroën) и „Опел“ (Opel). Дополнително, посетителите имаа можност да видат и модели на БМВ (BMW), „Далара“ (Dallara), „Ферари“ (Ferrari), „Хјундаи“ (Hyundai), „Киа“ (Kia), „Ламборгини“ (Lamborghini), „Мерцедес“ (Mercedes) и „Тесла“ (Tesla).

Новиот „хјундаи ионик 9“ Фото: Giuliano Berti/Bloomberg

Меѓу иновациите, „Хјундаи“ го претстави новиот „ионик 9“ (Ioniq 9), голем теренец што комбинира иновативна технологија со извонреден комфор и врвен квалитет на внатрешноста. Покрај него, „Хјундаи“ по првпат во Италија го претстави визионерскиот концепт инспириран од светот на видеоигрите и желбата за персонализација.

Кинеските брендови во офанзива

БЈД изложи неколку нови модели  - од електричниот теренец „сил“ (Seal U DM-i) до атрактивниот „долфин сурф“ (Dolphin Surf), додека „Донгфенг“ покажа цела палета од урбани компакти до пикап-возила.

„Гили“, еден од најголемите кинески концерни, ги претстави моделите „старреј“ (Starray) и „галакси м9“ (Galaxy M9), додека „Липмотор“ дебитираше со лимузината Б10 (B10). Брендови како „Омоде“ (Omode), „Воја“ (Voyah), „Џаеку“ (Jaecoo) и „Денза“ (Denza) дополнително потврдија дека Кина веќе не е само „придружен играч“ во глобалниот автобизнис.

Гили EX5 (цена: околу 37.000 евра) Фото: Giuliano Berti/Bloomberg

Посетителите на саемот имаа можност да ги испробаат новите електрични и хибридни модели, а кинеските производители зазедоа речиси половина од понудата. Најголем метеж имаше пред штандовите на БЈД и „Гили“, што јасно укажува на зголемената доверба кај потрошувачите.

Пристигнувањето на кинеските производители во Торино носи поширока порака: Европа, колепката на автомобилската индустрија, се соочува со конкуренција што комбинира напредна електрификација, агресивни цени и сè подобар дизајн.

Додека „Фарари“ и „Ламборгини“ и понатаму ги привлекуваат љубителите на престижот, а германските премиум брендови се борат да ги задржат своите позиции, кинеските гиганти создаваат имиџ на практична и технолошки напредна алтернатива.

„Ламборгини торино“  Фото: Giuliano Berti/Bloomberg

Европа под притисок  - сè помали и поекономични модели

„Рено“ (Renault) беше присутен со моделот Р4 (R4 E-Tech), икона што од своето деби во 1961 година, па до 1992 година го следеше историскиот развој. Опишан како „блуџинс-автомобил“ поради својата флексибилност и стил, Р4 ја претставува новата интерпретација на авантуристичкиот дух во ретро-футуристички стил.

„Рено Р4 е-тек“ (цена: околу 30.000 евра) Фото: Giuliano Berti/Bloomberg

„Стелантис“ се фокусираше на „опел фронтера“ (Opel Frontera), семеен теренец што се рекламира како автомобил за широк спектар на примени. „Без разлика дали одиш на одмор или само на голем шопинг, ’фронтера’, електрифициран во сите верзии, е вистински придружник за сите задачи“, велат од компанијата. Пространата внатрешност и капацитетот на багажникот до 1.600 литри овозможуваат да се сместат сите работи, од торби за купување до кофи и пакети.

„Опел фронтера“ ги комбинира функционалноста и практичноста за секојдневна употреба Фото: Giuliano Berti/Bloomberg

Од истата компанија беше претставен и „алфа ромео џуниор“ (Alfa Romeo Junior), компактен кросовер теренец, кој е моментално најмалиот модел во понудата на „алфа ромео“.

При претставувањето, автомобилот првично бил лансиран под името „алфа ромео милано“ (Alfa Romeo Milano). Сепак, по жалбата на италијанската влада, која истакнала дека е нелегално да се продаваат производи со „италијански звучни“ имиња што не се произведени во Италија (дизајниран е во фабриката на „Стелантис“ во Полска), автомобилот бил преименуван во „милано“.

„Алфа ромео џуниор“ Фото: Giuliano Berti/Bloomberg

Во сличен ценовен опсег, градот домаќин на настанот го претстави и „микролино“ (Microlino), минијатурен електричен автомобил за двајца, дизајниран од швајцарската компанија ММС (Micro Mobility Systems), а произведен од италијанската компанија „Секомп“ (Cecomp) во Торино. Овој автомобил се полни за само четири часа, како паметен телефон, на домашен полнач.

„Микролино“ е дефинитивно мал, но чини исто како многу поголеми играчи Фото: Giuliano Berti/Bloomberg

„Тесла сајбертрак“ - електричен пикап надвор од сите стандарди

„Тесла“ го претстави својот пикап „сајбертрак“ (Cybertruck), кој изгледа како да е излезен од научнофантастичен филм – аголен, футуристички и изработен од не’рѓосувачки челик. Стилот му е впечатлив и дефинитивно се разликува од сè што е присутно на пазарот, кратко кажано, не е ништо помалку ексцентричен од самиот Илон Маск.

 

Фото: Giuliano Berti/Bloomberg

Производот е направен од не’рѓосувачки челик, има досег од 400 до 750 километри, во зависност од верзијата. Моќноста на моторот се движи од 315 до 845 КС. Максималното оптоварување е 1.134 кг. Багажникот има простор од повеќе од 2.800 литри, а тука се и големиот преден „франк“ (багажник во предниот дел на возилото) и дополнителен простор под подот. Забрзувањето до 100 км/ч во тримоторската верзија е за само 2,6 секунди.

Вратите се отвораат со притискање на скриени копчиња. Предните светла се скриени под панелот. Предниот „франк“ може да се користи и како маса за пикник, а капакот е толку цврст што по него може и да се скока.

Единствено прашање е кој ќе го вози ова „чудо“, бидејќи возилото сè уште не е достапно на пазарите во Европската Унија. Со данок од 21 отсто, некои извори наведуваат дека цената би можела да биде околу 350.000 евра, додека во САД започнува од околу 70.000 долари.

Погледнете ги и другите возила што привлекоа рекорден број гости на „Пјаца Кастело“ во центарот на Торино минатиот викенд.

Giuliano Berti/Bloomberg

Погледнете ја галеријата

Giuliano Berti/Bloomberg

Погледнете ја галеријата

Giuliano Berti/Bloomberg

Погледнете ја галеријата

Giuliano Berti/Bloomberg

Погледнете ја галеријата

Giuliano Berti/Bloomberg

Погледнете ја галеријата

Giuliano Berti/Bloomberg

Погледнете ја галеријата