Кинеската БЈД со двојно повеќе модели на возила ја освојува Европа

БЈД (BYD Co.) ја засилува својата европска експанзија со нови модели и салони, во услови на жестока ценовна војна на домашниот пазар во Кина.

Производителот на автомобили преговара со стотици локални доставувачи и ќе има повеќе од 1.000 продавници во 32 земји низ Европа до крајот на годината, изјави во понеделникот на автомобилскиот саем во Минхен извршната потпретседателка Стела Ли. Компанијата сега нуди 13 модели во регионот во споредба со шест пред две години.

Најновиот европски модел на БЈД е „сил 6 ДМ-ај туринг“ (Seal 6 DM-i Touring), плагин хибриден караван со комбиниран опсег на возење на бензин и батерија од 1.350 километри (839 милји).

БЈД, „Икспенг“ (Xpeng Inc.) и „Жеџијанг липмотор текнолоџи“ (Zhejiang Leapmotor Technology Co.) се меѓу кинеските производители на автомобили што го користат овонеделниот настан во Германија за да ги претстават своите линии додека се обидуваат да го прошират уделот на пазарот што го стекнаа во Европа во последниве години. Нивниот притисок се засилува во услови на војна со цените на електричните возила во Кина.

Европската Унија воведе царини на електрични возила увезени од Кина, но тоа не го запре подемот на БЈД и неговите конкуренти. Тие додадоа повеќе хибридни и автомобили со класичен мотор што не подлежат на давачките, формираат локални партнерства за продажба и ветуваат дека ќе воспостават производство во регионот. Тоа претставува закана за компаниите како „Фолксваген“ (Volkswagen AG) и „Стелантис“ (Stellantis NV), кои ги намалуваат трошоците за да ги заштитат профитните маргини на стагнантниот европски автомобилски пазар.

„Фолксваген“ прави напори да понуди подостапни возила, меѓу кои и електричен модел „поло“ (Polo), кој се очекува да чини помалку од 25.000 евра (29.330 долари) кога ќе излезе во продажба следната година, како и верзија на батерии на неговиот популарен спортски теренец „т-крос“ (T-Cross). Компанијата претстави и нови модели од поевтиниот бренд „Шкода“ (Skoda).

„Нашата амбиција е да обезбедиме технологија за луѓето и токму тоа го правиме сега со електричните автомобили од почетно ниво“, изјави главниот извршен директор Оливер Блуме во интервју за „Блумберг ТВ“ (Bloomberg Television).

Најголемиот европски производител на автомобили, „Фолксваген“, исто така се соочува со трговските потези на американскиот претседател Доналд Трамп. Блуме изјави дека договорот меѓу ЕУ и САД за царини од 15 отсто создава предвидливост за планирање, но сепак останува товар за групацијата, која извезува возила „ауди“ (Аudi) и „порше“ (Porsche) во земјата.

„Производителот на автомобили останува во преговори со Вашингтон за да обезбеди договор за компензација на царините во замена за неговите инвестиции во земјата“, рече Блуме, додавајќи дека се надева на „брзо решение“ во наредните недели.

Бидејќи американскиот пазар е практично затворен за кинеските производители поради трговските бариери, овие брендови прават чекори за да создадат подлабоки корени во Европа.

„Липмотор“ планира да ги удвои продажбите во регионот следната година на дури 120.000 единици, а потоа повторно да ги удвои во 2027 година, изјави вчера во Минхен претседателот Жу Џијангминг. Локалното производство во Шпанија ќе започне во втората половина на следната година, додаде тој.

„Икспенг“ планира да го донесе својот подостапен суббренд „Мона“ во Европа следната година, изјави на саемот претседателот и главен извршен директор Хе Шијаопенг. Потегот означува значаен исчекор надвор од сегментот на премиум возила и дополнително го зголемува притисокот врз европските производители.

Првиот модел на „Мона“, седанот од почетно ниво М03, стана клучен двигател на брзиот раст на „Икспенг“, сочинувајќи околу 40 отсто од месечната продажба на производителот на автомобили.