Новите петминутни полначи на БЈД донесоа рекордна цена на акциите

Акциите на БЈД (BYD Co.) се искачија на рекордно ценовно ниво откако кинескиот производител на автомобили претстави серија електрични возила (ЕВ) за кои вели дека може да се полнат речиси исто толку брзо колку што е потребно за полнење гориво на обичен автомобил.

Акциите на автомобилскиот производител се искачија дури за шест проценти на отвореното тргување во Хонгконг во рамките на денешната сесија, зголемувајќи ја пазарната вредност на компанијата на речиси 162 милијарди долари - повеќе од „Форд“ (Ford Motor Co.), „Џенерал моторс“ (General Motors Co.) и „Фолксваген“ (Volkswagen AG) заедно.

Новата батерија и систем за полнење на БЈД може да обезбедат досег од околу 400 километри (249 милји), и тоа за пет минути, покажаа тестовите направени на неговиот нов седан „хан ел“ (Han L), изјави вчера претседателот и основач Ванг Чуанфу. Производителот ќе започне со продажба на возила со новата технологија веќе од следниот месец.

Брзина на полнење и досег на километража според времетраењето на полнење Bloomberg Mercury

 

Можноста за полнење на електричните автомобили за исто време колку што е потребно на возило со мотор со согорување за да влезе и излезе од бензинска пумпа може да ги убеди возачите што не се подготвени да прават долги застанувања за да се прикачат на струја и да полнат батерии.

„Веруваме дека ова е уште еден знак дека БЈД претрпува стратегиска промена“, напишаа во белешката аналитичарите на „Мекуари капитал“ (Macquarie Capital), вклучувајќи го и шефот на кинеските автомобили Јуџин Хсијао. „Наместо да се натпреварува со цена, дизајн на возила или влегување во нови производствени линии, се чини дека БЈД бара начини да ги искористи својот обем и основни технологии за електрични возила за да се разликува на висококонкурентниот пазар“.

Новата платформа, која ќе биде основа за многу од нејзините идни електрични возила, би можела да обезбеди уште еден поттик за БЈД, кој дојде зад ривалот „Тесла“ (Tesla Inc.), кој е најдобар продавач на ЕВ во светот. Испораките на „Тесла“ во Кина во февруари паднаа за 49 проценти на годишна основа, на само 30.688 возила, што е најниска месечна бројка од јули 2022 година.

БЈД се обврза да изгради повеќе од 4.000 станици за полнење низ Кина за да ги опслужува новонадградените електрични возила. Компанијата не откри конкретна временска рамка или трошок за реализирање на ветеното. Сепак, компанијата во текот на месецов собра околу 5,6 милијарди долари од продажба на акции.

Bloomberg Mercury

 

Брзината на полнење би била значително пред суперполначите на „Тесла“, кои можат да додадат до 275 километри досег за 15 минути. Сепак, „Тесла“ има многу поголема мрежа од над 65.000 суперполначи низ светот. Новиот електричен седан КЛА (CLA) на „Мерцедес Бенц“ (Mercedes-Benz Group AG), претставен минатата недела, може да дополни 325 километри за 10 минути полнење.

Новата ЕВ-платформа на БЈД ќе им овозможи на автомобилите да достигнат брзина од сто километри на час за две секунди, рече Ванг на настанот во седиштето на производителот на автомобили во Шенжен.

Првите модели што ќе добијат ултрабрзо полнење ќе бидат „хан ел“ и спортското теренско возило „танг ел“ (Tang L). Нивната цена ќе почнува од 270.000 јуани (37.300 долари) и 280.000 јуани (38.700 долари), соодветно, а ќе се продаваат од април. БЈД ќе изгради повеќе од 4.000 станици за полнење дизајнирани да се приспособат на новата технологија.

„Ова е БЈД што ја издигнува играта во друга димензија“, рече Леи Ксинг, независен кинески автомобилски аналитичар.

БЈД имаше одличен почеток на 2025 година. Компанијата што произведува само хибридни и целосно електрични автомобили минатиот месец продаде повеќе од 318.000 патнички возила, што е за 161 отсто повеќе од истиот месец лани. Тој е најдобриот производител на автомобили во Кина, најголемиот светски пазар на автомобили, со удел што се приближува до 15 проценти.

Напредниот погонски систем на ЕВ може дополнително да ја зголеми побарувачката за автомобилите од следната генерација на БЈД, смета Џоана Чен, кинеска аналитичарка за автомобили во „Блумберг интелиџенс“ (Bloomberg Intelligence). „Ова би можело да го означи почетокот на новиот бран модели, поттикнувајќи ја продажбата на електрични возила на БЈД да ги достигне хибридите откако заостана во 2024 година“, рече таа.

БЈД исто така почнува да го наметнува и темпото во напредната технологија за помош на возачот. 
Супер е-платформата на БЈД може да претставува и конкурентна закана за „Контемпорари амперекс технолоџи“ (Contemporary Amperex Technology Co. Ltd.), моментално најголемиот светски производител на батерии за ЕВ. „Ли ауто“ (Li Auto Inc.), на пример, користи една од батериите од најновата генерација (CATL) за да овозможи полнење што овозможува досег од 500 километри за 12 минути.