Која е тајната на привлечната сина боја на „Тифани“

Во 2020 година Викторија Рејнолдс стана главна јувелирка во „Тифани“ (Tiffany & Co), првата жена на таа позиција во 183-годишната историја на брендот. Рејнолдс разговараше со „Блумберг“ по повторното отворање на водечката продавница „Тифани лендмарк“ (Tiffany Landmark) во Њујорк токму кога нејзината ексклузивна колекција на накит „Блу бук 2023“ (Blue Book 2023: Out of the Blue), создадена во соработка со новата главна директорка за дизајн Натали Вердеј, тргна на светска турнеја.

Работевте за „Тифани“ 36 години. Како течеше вашата кариера?

Пораснав на Стејтн Ајленд. Некои од моите најрани спомени се одење во „Тифани“ заедно со мојот татко, за да ѝ купиме на мајка ми божиќен подарок. Значаен дел од тоа искуство беше самата продавница, нејзината убавина. Така, сега, со обновениот „Лендмарк“, многу е возбудливо да се видат следната генерација клиенти што доаѓаат и уживаат на истиот начин на кој јас уживав некогаш.
Ја посетував школата за дизајн во Род Ајленд и дипломирав за изработка на накит и златарство. Првото работно искуство ми беше практикантка во одделот за порцелан и кристали во „Тифани“, само во текот на летото. Му се приклучив на „Тифани“ во 1987 година, во одделот за приспособен дизајн. Од тој момент немаше враќање назад. Четири години работев како оценувачка на дијаманти, што ми беше како да добивам докторат по дијаманти. Еднаш изброив колку скапоцени камења оценив, бројката е близу стотици илјади.

Викторија Рејнолдс, главна јувелирка во „Тифани“/Daymion Mardel

Тогаш започна мојата страст за скапоцени камења. Добив диплома по јувелирство, се вратив на одделот за накит по нарачка, овој пат како менаџерка. Работев многу на изработка на трофеи, малку познат факт е дека ги создаваме сите главни спортски трофеи освен на купот Стенли. И тогаш се префрлив на ексклузивен накит пред околу 12 години. Моето срце чука „тифани-сино“.

Како се промени „Тифани“ во изминатите 36 години?

Мислам дека „Тифани“ забележа огромен раст. На некој начин, неодамна се вративме на нашите корени. Многу работи што нè направија посебни, сме ги заборавиле. Жан Шлумберже е добар пример. Тој е несомнено еден од најголемите дизајнери на накит досега. Тој е дел од брендот од 1956 година. Сега повторно го откриваме, истакнувајќи го сето она што го прави генијален.

Обетки од платина и жолто злато со цаворит и други дијаманти |Tiffany & Co.

 

Како изгледа вашиот ден?

Имам неколку главни функции, но основната е набавка на скапоцени камења за нашата ексклузивна колекција на накит „Блу бук“. На оваа задача соработувам со Натали Вердеј, нашата директорка за дизајн. Имаме група од најдобрите светски јувелири што патуваат низ светот во потрага по најдобрите скапоцени камења и дијаманти. Да се најде палетата што ја бара Натали, вистинските бои, вистинскиот крој, речиси секогаш е потребна една година. Дури тогаш тоа оди кај златарот што работи на моделот. Во секое од овие парчиња се инвестираат од две до две и пол години работа.

Ѓердан од платина и жолто злато со ситни мониста од сперсатин и разни скапоцени камења |Tiffany & Co.

 

Како изгледа таа соработка?

Сè започнува со палета за расположение. Зборуваме за палетите на бои што таа ги бара и какви скапоцени камења користиме. Одличен пример за тоа е брошот од морската медуза од годинешната колекција „Аут оф блу“ (Out of the Blue). Тој брош мораше да биде направен исклучиво од месечев камен, затоа што само тој има таков сјај и течно прекршување на боите како што имаат морските медузи. Потоа користевме танзанит кабошон како суптилен премин кон сините сафири. Да беше сè рамно во дизајнот, немаше да функционира, бидејќи природата и морето се многу нијансирани.

Ѓерданот „Птица на карпа“ од колекцијата „Шлумберже“ на „Тифани“ – платина и злато со морганит, дијаманти и розови сафири | Tiffany & Co.

 

Дали има скапоцени камења што секогаш се дел од колекцијата на „Тифани“?

Се разбира, бели и жолти дијаманти. Белите дијаманти се дел од нашата ДНК од првиот амбиент на „Тифани“ во 1886 година до купувањето на француската круна во 1887 година. Но, кога станува збор за бојата, постојат четири скапоцени камења што ги нарекуваме „вечните скапоцени камења на Тифани“. Првиот е кунзит, именуван по нашиот главен јувелир Џорџ Кунц, кој ѝ се приклучил на компанијата во 1880 година, кога имал само 23 години, а го обликувал дијамантот „Тифани“ во 1878 година. Кунзитот бил откриен и именуван по него во 1902 година. Потоа, тука е морганитот, именуван по финансиерот Ј.П. Морган, многу добар клиент на „Тифани“, во 1910 година. Подоцна, танзанитот бил откриен во Танзанија во 1968 година, а последниот е цаворит, откриен во 1974 година. Секогаш се трудиме да ги вклучиме овие четири скапоцени камења во колекцијата.

Интензивни аргилни розови дијаманти од колекцијата „Тифани“ | Tiffany & Co.

 

Зошто некој камен станува популарен, а некој оди во заборав? Дали влијаете на некој тренд?

Скапоцените камења често влегуваат и излегуваат од мода затоа што ние, скромно ќе кажам, влијаеме малку на пазарот. Добар пример е бумот на жолтите дијаманти откако Бијонсе носеше дијамант „Тифани“ во кампањата „About Love“. Дијамантот ја презема уникатноста на личноста што го носи. На тоа бевме сведоци на примерот на Одри Хепберн, Лејди Гага и Бијонсе. Тоа е една од работите што ги прават скапоцените камења толку магични. Начинот на кој славните личности носат одреден накит и како тие го прикажуваат во јавноста може значително да влијае на популарноста и побарувачката на тој накит во модниот свет.