Ако сте го гледале филмот„Дневникот на Бриџит Џонс“, можеби се сеќавате на разговорот во кој мајката ја известува Бриџит дека ќе ја носи да ѝ се „средат“ боите затоа што повеќе не сака да ја гледа во нејасни матни нијанси. Бриџит е во шок, бидејќи постоењето на таква услуга ѝ било непознато, иако во Велика Британија дури повеќе од 35 години постојат лични консултанти за бои. Тоа порано важеше за престижна услуга, која главно ја користеа политичари, директори на големи компании и јавни личности за да го подобрат својот изглед и да ја зајакнат својата самодоверба кога се појавуваат во јавност.
Меѓутоа, во последно време, особено кај генерацијата зед (Z), експертската анализа на личните бои стана вистинска сензација, јавува репортерката на „Блумберг“ Сани Ким.
Консултантите се особено барани во Кореја
Таа вели дека едноставно пребарување на страницата „Лична анализа на боите од Кореја“ покажува дека темата имала 375 милиони прегледи на Тикток, при што креаторите на содржина ги поставуваат своите искуства, вклучувајќи детални инструкции чекор по чекор за тоа како да се резервира услугата и каде да се оди. Вирално видео во кое Џису, членка на популарната К-поп група „Блекпинк“ (Blackpink), ги објаснува резултатите од својата лична анализа на бои, има дури 2,6 милиони прегледи само на Јутјуб. Дури и јужнокорејскиот политичар Ли Јае-Мјунг (Lee Jae-myung), лидер на Демократската партија на Кореја, привлече внимание кога доби анализа за неговата лична боја.
Bloomberg
Поради ова, а и поради зголемената популарност на корејските серии и филмови во кои се споменува оваа услуга, Сеул стана познат како центар за експертска анализа на личните бои, а особено е популарен меѓу младите што бараат начини да го подобрат својот изглед и кои ги следат актуелните трендови.
Така, сè повеќе луѓе од Америка патуваат во Сеул за да ја направат оваа процедура, ставајќи ја на врвот на листата на „работи што сакам да ги правам“, вели Сани Ким. Трендот исто така доведе до зголемување на туризмот во тој дел од светот, па маршрутата и буџетот се планираат однапред.
Бидејќи сликањето е забава во која претпочитам да уживам сама, не ги користев овие услуги, но ме интересираа искуствата на другите.
„Познавањето на личните бои навистина ми промени сè. Се чувствувам променето, подинамично. Открив боја на кармин што одлично ми прилега, ми го менува изгледот за миг дури ипо најтешката работна недела и, најважно, сега веќе не губам време на пробување и на барање. И конечно излегов од бежовата и од црната боја“, вели пријател што ја доби токму оваа услуга на подарок пред неколку години во еден од многуте центри за анализа на бои и личен стајлинг во Лондон – „Хаус оф колорс“ (House of Colors).
Bloomberg
Консултацијата вклучува процес во кој до лицето на личноста се ставаат и се менуваат парчиња ткаенина во околу 40 различни бои, а се гледа каков ефект има секоја боја и нијанса на лицето без шминка. Најчесто се бара анализа на бојата според годишните времиња. Сите нијанси на бои се поделени во четири категории, именувани по четирите годишни времиња. Така, на пример, ако имате пријателка што ви вели дека самата е „лето“, тоа значи дека ѝ се допаѓаат боите од летната палета, која вклучува светли бои и топли тонови. Многу консултанти за боја се обучени за сезонска анализа и тоа е релативно едноставен систем на бои. Таа анализа е и ценовно најприфатлива, па оваа сесија чини од 100 фунти за еден час консултација, па нагоре.
Нешто понапорна и подолготрајна е анализата на тонските бои, во која групирањето на боите во четири сезонски категории е проширено на 12 категории. Тие се означени според најдоминантниот аспект на таа група на бои, така што на пример на една „летна“ дама ќе ѝ биде доделена ознака „топла и длабока“ во тонскиот систем. На повеќето клиенти им е доделена доминантна насока на бојата (топло), по што следува секундарна насока на бојата (длабоко). Овој систем е основен метод за анализа на бојата, кој советува за доминантните карактеристики во индивидуалната боја на една личност.
Оние што се задоволни од ефектите што ги донеле личните бои во нивниот живот истакнуваат дека уште една причина зошто оваа анализа е добра инвестиција е тоа што заштедува време и пари. Мојата соговорничка вели дека ги игнорира боите во продавницата за кои знае дека не ѝ прилегаат и се фокусира само на оние што ѝ одговараат - а со тоа купувањето веднаш станува побрзо и полесно. Исто така комбинирањето облека од една палета на бои е многу побрзо отколку обидот да се усогласат боите од целиот спектар.
Bloomberg
Консултантите за бои што се занимаваат и со личниот стајлинг на своите клиенти нагласуваат дека познавањето на личните бои значително го заштедува буџетот што годишно се издвојува за гардероба и шминка. Според нивното искуство во работата со клиенти и стручниот преглед на нивните гардероби, само 10 отсто одговараат на она што би се препорачало во однос на боите, но и формата и стилот на облекување. Ако се земе предвид тоа, според статистиката на „Глобал фешн индустри“ од 2022 година, просечниот Европеец троши 600 евра годишно за гардероба, така што заштедите што се добиваат со инвестирање во вакви консултации се многу поголеми отколку кога би потрошиле 90 отсто од буџетот на нешто што визуелно не импресионира. Се разбира, под услов да не патувате во Кореја за консултации.
Анализата на бои е сè попривлечна и како професија. Има зголемување на едукативните центри што нудат ефективни курсеви за оние што сакаат да се подобрат во овој бизнис. На пример, деветнеделен курс за основно ниво на „Лондон колеџ оф стајл“ (London College of Style) чини 1.245 фунти. Обуката за бои ја предава Жил Стандиш, најистакнатата експертка за бои во Велика Британија и авторка на бестселерите „Шарена доза на оптимизам“ и „Како да не се носи црно“.
Покрај основните консултации, многу центри ги проширија своите бизниси за да вклучат посеопфатни консултации за личен стил, како и понуда на шминка за сите четири основни типа (т.е. годишни времиња), така што клиентите по консултацијата на самото место можат да купат сè што ќе посакаат за својот нов живот со бои.
.webp){kind=icon}
Во моментов нема коментари за веста. Биди прв да коментира...