Пет модни додатоци со македонски потпис што секој маж треба да ги има

„Модните додатоци и чевлите со висок квалитет се од пресудно значење за дефинирање на изгледот“, ни кажа македонскиот моден дизајнер и професор Никола Ефтимов кога на почетокот од годинава го прашавме кои есенцијални парчиња треба секој маж да ги има во својот плакар.

Исто размислуваат и другите модни експерти. Без разлика дали станува збор за деловна средба, вечерно излегување или за секојдневен стил, деталите се тие што прават разлика во светот на машката мода.

Секој добро стилизиран маж треба да поседува клучни модни додатоци што ја дополнуваат облеката што ја носи, особено во деловниот свет, каде што впечатокот често се создава уште пред да се каже првиот збор. Затоа, ние одлучивме да ви помогнеме во изборот и одбравме пет производи, сите со македонски потпис.

1. НИЕ СМЕ ОД СКОПЈЕ

Последниве години платнените торби (таканаречени tote bag) стануваат многу популарни и кај мажите што се сѐ послободни во модниот израз, покажуваат изразена индивидуалност и не се веќе ограничени само на актовки и ранци.

Овие „неконвенционални“ ќеси, кои првично беа наменети за пазарување, сега имаат универзална употреба и се вклопуваат во многу сценарија. Лесно собираат лаптоп, книги, документи, вода, па дури и облека, што ги прави идеален моден додаток за сите, без разлика дали сме ги купиле за на работа, за во вежбалница или за викенд-прошетка.

Овие чанти често се поврзуваат со независни брендови, книжарници, музички фестивали и уметнички институции, па за кратко време се наметнаа како симбол на културна припадност. Како урбани парчиња што совршено се вклопуваат во секојдневниот градски живот стануваат сѐ поатрактивен бизнис и за македонските дизајнери.

Ние овој пат се одлучивме за малата креативна работилница „5 до 12“ основана од Стефанија Атанасовски. Ја одбравме нивната платнена торба со минималистички и модерен дизајн „Ние сме од Скопје“, која е инспирирана од истоимениот хит на бендот „ПМГ колектив“.

Цена со попуст: 750 денари

2. Орбитал - Торонто вајт (ORBITAL -TORONTO WHITE)

Без разлика дали претпочитате класика или посмел дизајн, добриот часовник е секогаш добра инвестиција во стилот. Ние се одлучивме за комбинација на минимализам и безвременска елеганција од „11 и 11 саат“ (11i11saat), марка основана во Австрија. Механизмот е швајцарски, но сите луѓе вклучени во осмислувањето на дизајнот се Македонци, предводени од Петар Кајевски, нашинец што живее и работи во Виена и кој е и основач на брендот. Освен за необичниот дизајн, во разговор за „Блумберг Адрија“ тој раскажа и за иновативноста на неговите производи.

„Круната ротирана во иновативна положба и прстенот внатре во часовникот визуелно ја формираат бројката 8. Дополнително, формата на круната овозможува таа да служи како аналоген општ потсетник, со функција на врзувањето конец околу прстот во македонската култура, односно врзувањето јазол во некои други култури“, објасни Кајевски.

Механизмот е швајцарски, но сите луѓе вклучени во осмислувањето на дизајнот се Македонци

Спецификации за моделот со бели ремчиња што се најде на нашата листа:

• Функции – часови, минути и секунди; датум со сопствен дизајн на бројките; механички потсетник преку позицијата на круната.

• Механизам – Sellita SW400-1 (зголемена верзија на SW200-1), Swiss-made автоматски механизам, special grade, 38 часа резерва.

• Димензии – 41,4 мм дијаметар, 48,2 мм lug-to-lug, ширина на ремче 20 мм, дебелина 10,0 мм, куќиште од 316L не’рѓосувачки челик. Водоотпорност 5 атмосфери.

• Сафирно стакло со троен антирефлективен премаз под стаклото.

Цена: 46.700 денари

3. Цигар кејс ред браун (CIGAR CASE RED BROWN)

„Ред фокс гудс“ (Red Fox Goods) e македонски бренд за рачно изработени производи од кожа, основан од група млади претприемачи што јавноста ги препознава и како големи поддржувачи на иницијативата „Супорт Кочани“ (Support Kocani). Со купување на нивните паричници, 50 отсто од сумата донирате за семејствата погодени од пожарот.

На пазарот нудат и рачно изработени кожени футроли за пасоши и очила, ремчиња за часовници, чанти и ремени, но ние се одлучивме за еден типичен машки моден додаток.

„Оваа кожена футрола дизајнирана за љубителите на квалитетни пури е без дополнителни делови на пластика и други синтетички материи во внатрешноста“, пишува во спецификацијата на производот, кој доколку во моментот не е означен како достапен, се чека околу три недели за изработка.

Сите производи се рачно изработени и се кожени

Други спецификации:

Можност да собере до 20 см пура.

Димензија: 150 мм х 80 мм (целосна димензија на затворен производ).

Ширина на еден отвор за пура 25 мм дијаметар.

Цена: 2.500 денари

4. „Биг литл маало“ (BIG LITTLE MAALO)

„Шизик на ризик“ (Sheezick na reezick) преку своите производи речиси една деценија го оживува македонското културно наследство и го слави локалниот идентитет преку дизајни инспирирани од иконични знаменитости, градски симболи, но и култни телевизиски шоуа како што е серијата „Бушава азбука“.

Основачите на овој домашен уличен бренд истакнуваат дека во време кога глобализацијата се заканува да ги припои културните идентитети, тие нудат производи што се потсетник на уникатноста и автентичноста, а со кои, како што велат, на еден урбан начин ги поттикнуваат младите да ги негуваат своите корени со самодоверба.

Од нивната богата колекција не случајно одбравме чорапи. Без разлика дали ги носите со костум или со фармерки, добар пар чорапи секогаш привлекува внимание, а дизајнот што ние го одбравме, кој е инспириран од населбите во македонската метропола, дефинитивно ќе внесе индивидуалност во вашиот изглед.

Цена: 490 денари

Шизик на ризик

5. Такер шрт стеј (TUCKER SHIRT STAY)

Луксузноста е во деталите и за македонскиот бренд што создава машки костуми по мера „Сињори“ (Signori), а со нивниот иновативен моден додаток „Такер шрт стеј“ (Tucker Shirt-Stay) го заокружуваме овој каталог.

Станува збор за производ што на уникатен начин користи еластична тензија за задржување на кошулата во панталоните, без нејзино растегнување при движењата во текот на денот. Со гумените држачи и слотот за копчиња гарантира дека кошулата ќе остане уредна, држејќи ја ниско и блиску до телото, без непријатен изглед и чувство.

Може да се користи за кошули, поло-маици, обични маици и блузи. Дизајнот е приспособлив и за жени.

Цена со попуст: 26 долари