Кралот на кашмирот на удар – дали „Брунело Кучинели“ го губи сјајот?

Дали на кралот на кашмирот му се ниша тронот? Минатата недела, во извештај на 84 страници, лондонскиот фонд „Морфеус рисрч“ (Morpheus Research) ја обвини компанијата „Брунело Кучинели“ (Brunello Cucinelli SpA) – позната по кашмирските парчиња омилени меѓу милијардерите од Силициумската Долина, дека ги доведува инвеститорите во заблуда за работењето во Русија

„Морфеус рисрч“ исто така наведе дека компанијата се занимава со „агресивни намалувања“ во малопродажните синџири, стратегија за решавање на „пренатрупани резерви“, што, како што тврдат, го загрозува „ексклузивниот имиџ на брендот“.

„Брунело Кучинели“ растеше побрзо од конкурентите. – Bloomberg

Извештајот на лондонскиот фонд се фокусира и на прашања за внатрешната контрола во компанијата, како и на одлуките на нејзиниот основач и претседател Брунело Кучинели, кој промовира филозофија на етичко работење. Компанијата од Перуџа ги отфрли обвинувањата и порача дека размислува за правни мерки против „Морфеус“, кој останува при својата анализа.

За Кучинели, притисокот е сериозен: мора брзо да го зацврсти работењето за да го зачува не само имиџот на „нежниот кашмирски капитализам“ туку и високата вредност на акциите. Пред овој напад, пазарната капитализација на компанијата изнесуваше околу седум милијарди евра, со однос меѓу цената и добивката дури повисок од „Хермес“ (Hermès). Но на 25 септември, по објавувањето на анализата на „Морфеус“, акциите потонаа и до 20 отсто.

Брендот има најмногу резерви во индустријата. – Bloomberg

Во обвинувањата се наведува дека брендот профитирал прекршувајќи ги ограничувањата на ЕУ за извоз на луксузна стока во Русија. Компанијата возврати дека рускиот пазар сега сочинува само два отсто од вкупниот приход, дека продавниците формално се затворени и дека деловната структура постои единствено за исплата на вработените и плаќање закупнини. Тие истакнуваат и дека сите испораки биле во согласност со правилата или испратени пред војната, со потврда од италијанската царина.

Модната компанија мора да подготви сериозен одговор. – Bloomberg

Сепак, самото одржување на изложбени продажби во Русија остава лош впечаток во јавноста. Истовремено, компанијата се соочува и со други критики: аналитичарите предупредуваат на високите резерви и можното појавување парчиња од „Кучинели“ во дисконтни синџири како „Ти-џеј Макс“ (TJ Maxx), што сериозно му се заканува на луксузниот имиџ.

За разлика од конкурентот „Лоро Пјана“ (Loro Piana), кој е под истрага за експлоатација на мигранти, „Морфеус“ не го оспорува квалитетот на производството на Кучинели. Но бара подетален и независен извештај за работењето и стратегиите за управување со резервите.

Во меѓувреме Кучинели одржува телеконференции со инвеститорите и се обидува да ја врати довербата на пазарот.

Акциите делумно закрепнаа, но луксузниот бренд мора да покаже дека може да му остане верен на својот имиџ – и да ја оправда високата цена што пазарот сè уште ја плаќа за неговото име.

За кралот на кашмирот, цената е совршенство. Сè под тоа би било кобно.