Производителите на луксузни добра не треба да се грижат за царините, туку за ударот врз џебовите на клиентите поради хаосот на берзата, предупредуваат аналитичарите.
Аналитичарот на „Дојчебанк“ (Deutsche Bank AG), Адам Кокрејн, смета дека превирањата на пазарот дополнително ќе го одложат закрепнувањето на секторот, кој веќе се соочува со забавена побарувачка на клучниот пазар – Кина. Тој го намали рејтингот на водечките актери во индустријата, луксузниот конгломерат „Ришемон“ (Richemont) и сопственикот на „Гучи“ (Gucci), компанијата „Керинг“ (Kering SA), на „задржи“ (hold). Акциите на двете компании паднаа за околу три отсто во средата.
„Ришемон“ обединува повеќе луксузни брендови, меѓу кои „Картие“ и „Ван Клиф“
Фото: Bloomberg
„Гледајќи кон 2025 година, бевме пооптимистични од повеќето инвеститори во однос на обемот и брзината на закрепнувањето на побарувачката за луксуз. Бевме во право приближно три месеци“, напиша Кокрејн во белешка, намалувајќи ја прогнозата за раст на секторот на два отсто за 2025 година.
Светските пазари повторно забележаа големи загуби во средата, кога стапија во сила реципрочните царини на американскиот претседател. Неговиот последен потег вклучуваше воведување давачки на кинеска стока до 104 отсто (потоа се зголемија на 145 отсто).
Bloomberg
Аналитичарите на „Морган Стенли“ (Morgan Stanley) исто така сметаат дека директното влијание на царините врз компаниите во секторот на луксуз нема да биде значајно, бидејќи тие можат да ги пренесат трошоците на потрошувачите преку зголемување на цените. Поголем ризик претставуваат потенцијалната рецесија и падот на потрошувачката доверба предизвикан од колапсот на акциите.
Кокрејн од Дојчебанк (Deutsche Bank) додава дека волатилноста во побарувачката на американските потрошувачи била поголема отколку што се очекувало за време на првиот квартал и дека таква ќе остане најмалку до крајот на годината. Европа, Азија и Блискиот Исток веројатно нема да можат да го надоместат падот на побарувачката предизвикан од трговската војна меѓу САД и Кина.
Сепак, нестабилноста би можела да создаде и можности. Кокрејн го унапреди рејтингот на производителот на чанти „биркин“, „Хермес“ (Hermès International SCA), на „купи“ (buy), наведувајќи дека компанијата би можела да биде победник благодарение на силата на својот бренд.
„Процената на вредноста долго време ни беше главна грижа, но како и кај квалитетната торба – го добиваш она за што плаќаш“, рече Кокрејн.
.webp){kind=icon}
