Царините се немоќни за статусните симболи - претставен е нов луксузен шампањ

„Шампањ де Лоси“ (Champagne de Lossy), долги години неактивен бренд што датира од 19 век, треба да започне со продажба на своите први шишиња во наредните недели, означувајќи го неочекуваното лансирање на висококвалитетен производ во услови на трговски тензии и пад на глобалната индустрија.

Шише брут ќе се продава за околу 300 евра во специјализирани продавници за вино по должината на француската ривиера, во Кан, Сен Тропе и Монако, според претседателот на брендот, Себастијан Бесон. Дистрибуцијата ќе се прошири и во други земји во Западна Европа, САД и Азија.

Трансформацијата на брендот, во која се инвестирани 20 милиони евра, досега вклучуваше купување замок и неговите напуштени вински визби, производство и складирање на шампањ, како и промоција во возило „ролс-ројс дроптеил“ (Rolls-Royce Droptail), кое е изработено по нарачка, рече Бесон.

Првиот уникатен „ролс-ројс дроптеил“ (Rolls-Royce Droptail) го носи името "La Rose Noire". Извор: „Ролс-Ројс“ (Rolls-Royce)

Оживувањето на истоимениот бренд, кој првпат беше создаден пред 163 години од богатиот барон и лондонски трговец со вино Анри Александар де Лоси, доаѓа во време кога шампањот е погоден од царина од 10 проценти за извоз во САД, нивниот најголем пазар, и можноста претседателот Доналд Трамп дополнително да ги зголеми царините.

Дури и пред трговската војна, испораките на шампањ паднаа за 9,2 проценти минатата година, што го натера претседателот на здружението на лозари во регионот да изјави: „Ова не е време за славење“.

И покрај мрачните прогнози, „ние остануваме многу сигурни“, рече Бесон во телефонско интервју. „Страдаат производите со понизок квалитет и вредност. Побарувачката за висококвалитетни, иновативни брендови е здрава“.

Работник зема примерок од буре во подрумот на „Шампањ де Лоси“ Извор: „Шампањ де Лоси“ (Champagne de Lossy)

И како да не беа доволни предизвиците, тој и неговиот деловен партнер го лансираат „Шампањ де Лоси“ на веќе заситен пазар. Регионот има околу 370 компании или брендови (таканаречени maisons) и 16.200 одгледувачи на грозје.

Луксузниот гигант ЛВМХ (LVMH) е најголемиот производител и сопственик на брендови како што се „Дом Перињон“ (Dom Perignon), „Моет и Шандон“ (Moet & Chandon), „Ројна“ (Ruinart) и „Вов Клико“ (Veuve Clicquot). Неговиот сектор „Моет Хенеси“ (Moet Hennessy) во четвртокот соопшти дека ќе го намали бројот на вработени за 13 проценти, или околу 1.200 работници, поради послабата побарувачка во САД.

Работна атмосфера на лозјата на „Шампањ де Лоси“ Извор: „Шампањ де Лоси“ (Champagne de Lossy)

Создавањето успешен ексклузивен бренд речиси од нула е релативно ретко во ценетата географска одредница источно од Париз, каде што многу лозја со генерации се во строга сопственост на одредени семејства. Еден значаен пример се случи пред една деценија, кога банкарската династија Ротшилд создаде нов бренд шампањ, оддалечувајќи се од своите историски вински корени во Бордо.

Џеј-Зи и неговиот бренд на шампањ

„Шампањ де Лоси“ ќе биде второто оживување на луксузниот бренд за Бесон и семејната куќа „Мезон Катје“ (Maison Cattier), која го прави шампањот. Тие го направија истото тоа за друг порано неактивен бренд, „Арман де Брињак“ (Armand de Brignac - „Ace of Spades“), кој првпат беше промовиран во 2006 година од раперот Џеј-Зи, кој сега заедно со ЛВМХ го поседува брендот фокусиран на клубовите. Бесон го водеше тој бренд речиси осум години.

Blanc de Noirs Assemblage No. 4. Извор: Armand de Brignac Champagne

И Бесон и Александар Катје, претставникот на 13-та генерација на чело на куќата „Мезон Катје“, ќе се обидат да го повторат успехот на „Арман де Брињак“ со „Шампањ де Лоси“. Брут и розе се прават од сортите грозје шардоне (chardonnay), пино ноар (pinot noir) и мение (meunier).

Брендот е основан во 1862 година од гореспоменатиот барон, кој изградил прекрасен замок во селото Рили-ла-Монтањ, јужно од Ремс, а потоа почнал да произведува шампањ и да го дистрибуира низ целиот свет, вклучувајќи ја и Бакингемската палата, според промотивните документи. Неколку децении подоцна тој му го продал имотот на сопственикот на локална фабрика за волна. Бизнисот со шампањ не ја преживеа големата депресија.

Замокот во Рили-ла-Монтањ Извор: „Шампањ де Лоси“

Во 1970-тите години дедото на Катје купил згради во Рили-ла-Монтањ во близината на замокот, каде што првично се произведувал „Шампањ де Лоси“. Брендот се префрли кај друг производител и стана неактивен.

Бесон рече дека идејата за оживување дошла откако го посетил замокот кога повторно бил на пазарот. Пред тоа замокот бил луксузен хотел во сопственост на семејството што го контролира производителот на просеко „Серена Вајнс“ (Serena Wines), со седиште во италијанскиот регион Венето.

„Винарските визби под замокот се протегаат четири нивоа надолу и се вклопени во карпа“, рече тој. „Не се користени со децении. Првиот пат кога ги посетив беа во целосен мрак. Агентот за недвижности одби да влезе“.

Иако Бесон одби да го именува својот деловен партнер во проектот „Шампањ де Лоси“, корпоративните документи покажуваат дека затворената компанија со седиште во Шато де Рили, именувана по замокот, ја води Хади Незир, 56-годишен турски државјанин од Дубаи, кој е претседател на семејниот конгломерат „УБ холдинг“ (UB Holding). Обидите да се стигне до Незир беа неуспешни.

„Повторно лансираме апсолутен бисер“, рече Бесон, кој поради овој проект се пресели од Њујорк во Франција.

Во моментов нема коментари за веста. Биди прв да коментира...

Остави коментар