.webp){kind=icon}
Педесет и една недела годишно швајцарскoто гратче Давос е доста скромен ски-центар. Меѓутоа, во текот на една недела во јануари Давос станува место каде што е најтешко да се најде маса во ресторан без резервација.
Годинашниот Светски економски форум, кој ќе трае од 15 до 19 јануари, се очекува да вклучи гости како што се претседателот на Светската банка, Аџај Банга, американскиот државен секретар Ентони Блинкен, извршниот директор на „Мајкрософт“, Сатја Надела, извршниот директор на „Опен еј-ај“ (OpenAI), Сем Алтман, и главниот извршен директор на „Стандард чартерд“ (Standard Chartered), Бил Винтерс.
Истакнатите учесници не треба да се грижат за резервации во рестораните. Тие ќе седат на маси покриени со бели чаршафи, на приватни настани резервирани со месеци однапред.
Следствено, најдобрите места како ресторанот „Гентијана“ (Gentiana), кој е познат по едно од најдобрите фондуа во градот, и трпезариите на луксузните хотели, како „Гриja“ (Grischa) и „Моросани“ (Morosani), се резервирани од странски компании за приватни забави.
Давос
Bloomberg
Сепак, за посетителите во Давос што бараат места за вечера сè уште има многу добри опции, вклучувајќи и места на кои има неколку маси за кои не е потребна резервација и такви што таа недела воопшто не примаат резервации. Во најлош случај, можете да го побарате автоматот за сирење лоциран во близината на хотелот „Хард рок“ (Hard Rock).
Каде сè уште можете да најдете маса
„Локал“ (Lokal)
За неделата што завршува на 19 јануари, атрактивниот „Локал“ е отворен само за гости без резервации. Менито на готвачката Стефани Хејн нуди многу добри хамбургери со сос од виски и сирење со кромид за 27 швајцарски франци. Во Давос не е лесно да се најдат вегетаријански опции, но во „Локал“ можете да најдете чан масала кари од наут за 26 швајцарски франци. Што се однесува на пијалаците, се нудат локални пива, „брокен негрони“ (Broken Negronis), комбуха шприц и неколку безалкохолни коктели.
„Стекхаус Оксе“ (Steakhouse Ochsen)
„Оксе“ е познат по своите вжештени камења за печење месо, како и по палетата на месо што може да се стави на нив. Опциите вклучуваат дивеч, јагнешко, швајцарски риб-ај, бизон, па дури и филети од зебра, од кои многу може да се исечат на големини од 180 до 400 грама. Цените се движат од 39 до 69 швајцарски франци и вклучуваат избор на придружни јадења, како што е печен зеленчук. Како бонус, гостите добиваат престилки за заштита на нивната облека. „Оксе“ прифаќа резервации преку својата веб-страница, како и гости без резервации.
„Панорама“ (Panorama)
Појдете со жичницата до соодветно именуваниот ресторан „Панорама“, во историскиот хотел „Шацалп“ (Schatzalp), каде што ќе најдете фонду и прекрасен поглед на планините. Трпезаријата заградена со стакло нуди и јадења како што се кремаста супа од печурки со крцкави коцки од компири и свинско филе завиткано со сувомесно во сос од пиво. Хотелот прифаќа резервации преку електронска пошта за во „Панорама“ и за неговата поелегантна трпезарија „Бел епок“ (Belle Epoque).
„Ла карета“ (La Carretta)
Овој италијански ресторан има старомодно мени, кое одговара на декорот со црвено-бели карирани чаршафи за масите. Менито нуди разновидност, од супа минестроне и говедско карпачо до избор на ризото и тестенини како што се тортелини во крем-сос и њоки со путер и жалфија. Тие нудат и пици, вклучувајќи и хавајски. За јадења со месо постојат голем број опции со телешко и коњско месо, вклучувајќи и Строганов. „Ла карета“ е достапна секоја вечер, а можете да нарачате и храна за носење.
„Тоник пијано бар“ (Tonic Piano Bar)
Овој забавен бар во хотелот „Европа“, на шеталиштето, е веројатно најпопуларната опција за пијалак меѓу посетителите. Добро е да го знаете тоа доколку ви снема опции. Барот е полн со шишиња и нуди широк избор на многу добри коктели, кои истакнуваат низа класици. На пример, негрони, мохито и еспресо-мартини. Како што кажува името, има и клавир, а музиката започнува во 21 часот.
Поевтини оброци
„Кафе Клач“ (Kaffee Klatsch)
Ова типично алпско кафуле има две локации. Малиот, оригинален се наоѓа во близината на Конгресниот центар, а поголемиот е на другиот крај на Давос. И двете се одлични места за полнење на батериите наутро со мусли, компири на скара и палачинки со сезонски компот од јаболка за 14 швајцарски франци. За ручек, кинг сајз бургерот има повеќе од половина килограм говедско месо со две сирења, локално планинско и чедар, и пржен кромид за 30 швајцарски франци. Менито нуди и комбинации на супи и салати и тестенини.
„Пицерија Падрино“ (Pizzeria Padrino)
„Падрино“ со децении ги нуди своите омилени пици на дрва за 20 до 35 швајцарски франци. Меѓу нив се зачинета дијаволо, мафијасо со чили и лук и ал капоне со горгонзола, печурки и тенко исечено свинско филе. „Падрино“ нуди и избор на тестенини, вклучувајќи лазања со болоњезе сос и свински стек односно осо буко. Винската листа е особено фокусирана на италијанските вина. За групи до четири лица, „Падрино“ обезбедува места дури и без претходна резервација.
Каде да резервирате за следната година
„Стал Валар“ (Stall Valär)
Едно од најдобрите места за јадење во Давос е „Стал Валар“, кое зрачи со скандинавски шарм, со маси од светло дрво. Ресторанот нуди современо европско мени, кое истакнува јадења како пржени телешки образи со шафран ризото и чипс од кељ односно швајцарски лосос послужен со сенф од зелка. Винската листа е исклучителна, со разновидни пенливи и природни вина. Според последните информации, можно е да се резервира за понеделник, 15 јануари, и за петок, 19 јануари. Сепак, ресторанот е целосно резервиран за трите дена меѓу нив, поради приватни настани.
„Џодис“ (Jody's)
Привлечното мени фокусирано на предјадења нуди штици со исечено ибериско месо и швајцарски и шпански сирења; чинии со ракчиња во лук и крокети; и паела за две или повеќе лица. Има долга листа на коктели, со и без алкохол, како и обемна понуда на вина. Она што „Џодис“ го нема годинава е достапност: една компанија го има резервирано за цела недела. Додајте го на вашата листа за следната година.
