Спијте во музејот на „Ферари“ или во куќата на Барби преку „Ербиенби“

Ако тајно сонувате дека сте возач на Формула 1, тогаш сигурно ќе бидете воодушевени од сознанието дека можете да поминете една ноќ во музејот на „Ферари“ во Маранело, Италија, а сместувањето можете да го резервирате преку „Ербиенби“.

Доколку успеете да резервирате место, целиот музеј ќе биде ваш и ќе имате можност да спиете на кревет направен од истата кожа со која се правеле седиштата на автомобилите на „Ферари“.

Можеби не сте љубител на спортски автомобили, но затоа ги сакате стриповите на Марвел? Имате можност да тренирате во опасната соба во анимирана 2Д-рекреација на куќата Иксмен во Вестчестер, Њујорк. А како е за една ноќ во Милано, во гејмерско дувло со Хаби Лама, чија суптилна сатира во видеата како да води до една од најпопуларните сметки на Тикток?

Ова секако не се типични резервации - како на пример стан во Лондон или куќа со три спални на плажа - кои најмногу придонесуваат за годишниот профит на „Ербиенби“, кој минатата година изнесуваше вкупно 10 милијарди долари. Но, бидејќи темпото на раст на компанијата е забавено од почетокот на пандемијата, „Ербиенби“ бара начини да поттикне возбуда.

Ограничената понуда на уникатни искуства е нова категорија на „Ербиенби“, наречена Икони, дизајнирана да ги привлече потрошувачите што сакаат да исполнат сон или опсесија. Компанијата со седиште во Сан Франциско има создадено слични искуства и претходно. На пример, Барби Малибу дримхаус, која „Ербиенби“ ја отвори минатата година заедно со „Варнер Брос“, за да ја обележи премиерата на филмот. Претходно ваквите искуства беа достапни само на веб-верзијата на „Ербиенби“ и често луѓето не знаеја за нив додека не беа резервирани.

Но сега списоците, како лебдечкиот дом на Карл од „Ап“ на „Дизни“, ќе бидат прикажани подобро, по редовен распоред, во новата категорија Икони на апликацијата „Ербиенби“ - преку која компанијата генерира повеќе од половина од своите резервации.

Повеќето искуства се бесплатни и ниту едно нема да чини повеќе од 100 долари по гостин, велат од компанијата. Часовникот со одбројување на апликацијата ќе ги извести корисниците кога ќе се отворат однапред нарачките. Кога ќе дојде време, од гостите ќе биде побарано да објаснат зошто сакаат да резервираат сместување. Скратениот список на заинтересираните ќе биде направен по случаен избор, а понатамошната евалуација ќе ја направи „Ербиенби“. Најжестоките обожаватели ќе добијат златен билет од „Ербиенби“- исто како во филмот „Чарли и фабриката за чоколада“. Планот е годинава да се поделат повеќе од 4.000 билети.

„Ова ќе го задржи интересот за брендот ’Ербиенби’“, смета директорот за операции Дејв Стивенсон. „Ова е маркетиншки трошок, но тоа е повеќе од тоа. Ние не сме само место за спиење, ние сме повеќе од тоа - ние сме место за инспирација. Ние сме место за поврзување“. Претходно годинава Стивенсон беше унапреден од главен финансиски директор во главен оперативен директор, што е знак дека компанијата се фокусира на нови области на раст и проширување.

Клаудија Најели Рамирез Ескобар, 25-годишна инженерка од Мексико и обожавателка на Барби, резервирала престој во реална верзија на куќата Барби минатиот јули. Огнената обожавателка, која како дете имала неколку играчки и електричен џип „барби“, го опишала својот престој во Малибу како остварување на сонот и нешто што ја направило поповрзана со брендот.

„Можевте да облечете облека од плакарот на Барби“, рече таа „Секој детаљ беше многу кул, дури и шампонот и крпите беа розови“, рече таа, додавајќи дека и таа и нејзината мајка, која ја однела на пат, добиле чанти со промотивен материјал. Тие содржеле производи инспирирани од Барби, како кармин, мини-огледала, крпи и ролери. Таа рече дека во иднина речиси сигурно ќе следат и други слични искуства на „Ербиенби“.

„Ербиенби“ долго време користи познати личности и брендови за да се разликува од своите конкуренти. Од 2019 година компанијата влезе во партнерства со познати личности и почна да ги издава нивните домови. Дополнително, „Ербиенби“ склучи договори со филмски и ТВ-студија и продуценти за да обезбеди неколку ексклузивни престои што се привлечни за широка, глобална демографија.

Актерката Гвинет Палтроу, на пример, ја постави својата куќа за гости во Монтесито, Калифорнија, инспирирана од нејзиниот животен бренд „Гооп“. И диџеј Калед го понуди својот плакар - со големина на стан во Њујорк - исполнет од подот до таванот со ексклузивни патики „најк џорданс“.

Но она што започна како маркетиншки трик за генерирање на признавањето на брендот пред ИПО во 2020 година, сега презема централна улога во стратегијата на „Ербиенби“ за стекнување нови корисници. На пример, корисниците ќе можат да изнајмат семејна куќа на индиската филмска ѕвезда Јанхви Капур, седумдневно патување на турнеја со колумбискиот уметник Феид и ноќевање во саат-кулата во музејот „Орсеј“ за да присуствуваат на церемонијата на отворање на Олимпијадата во Париз.

Рекордниот број на резервации за време на годините по пандемијата доведе до зголемени критики. Гостите се пожалија на превисоките трошоци за чистење, строгите куќни правила, долгите списоци на обврски наметнати од домаќините и неусогласеноста меѓу фотографиите и ситуацијата на теренот.

Активистите за домување велат дека порастот на краткорочните изнајмувања е делумно виновен за зголемувањето на трошоците за домување во некои градови. Но можеби најтешката поплака е тоа што понудата на „Ербиенби“ стана досадна, со хомогенизирана естетика на „Икеа“

Извршниот директор Брајан Чески помина голем дел од изминатата година обидувајќи се да ја поправи репутацијата на компанијата со подобрување на нејзината основна платформа за да ги направи цените потранспарентни и да ги нагласи сместувачките капацитети со врвна оцена за гостите да имаат посигурен престој.

Тој исто така сигнализираше дека компанијата, на која е соосновач од 2007 година, е на „пресвртна точка“ и дека е подготвена  „повторно да го измисли ’Ербиенби’“ со нови видови услуги и искуства за гостите и за домаќините. „Тоа ќе вклучи нова палета услуги достапни на ’Ербиенби’ во текот на оваа или следната година, нудејќи услуги за чистење и одржување, возење на аеродром, па дури и приватни сесии на готвач или сомелиери“, рече Стивенсон.

Како дел од своето годишно ажурирање ова лето, „Ербиенби“ воведува нови функции за да го олесни планирањето групни патувања за повеќе од 80 проценти од своите корисници што патуваат во групи.

Новата алатка ќе им овозможи на гостите да ги споделат своите списоци со желби со другите на нивното патување, а подобрениот таб за пораки ќе ги консолидира пораките од гостите, домаќините и поддршката за корисници. За домаќините, „Ербиенби“ ја прошири контролната табла за заработка со графикони за перформанси и автоматски извештаи за заработка. Чески исто така рече дека ќе сподели повеќе детали за употребата на вештачката интелигенција во текот на годинава.

За „Ербиенби“, нудењето на овие уникатни искуства не е ниту лесно ниту евтино.

„Но, за возврат, среќен сум што ќе донесам луѓе директно кај нас за да патуваат и се надевам дека ќе прават други работи“, рече Стивенсон. „Мислам дека почнува да се покажува каде можеме да одиме во иднина и да нудиме повеќе од само сместување“.

Во моментов нема коментари за веста. Биди прв да коментира...

Остави коментар