Ве водиме во Музејот на БМВ во Минхен: тука, историјата не стои - таа забрзува

Сместен веднаш до познатиот Олимписки парк во Минхен, Музејот на БМВ (BMW) не нуди само преглед на техничката историја - туку ве вовлекува во жива нарација за визија, брзина и континуирана трансформација. На повеќе од 5.000 квадратни метри, низ архитектонски импресивен простор кој повеќе потсетува на футуристичка скулптура отколку на класичен изложбен простор, посетителите минуваат низ повеќе од сто години еволуција: од авионски мотори што го допирале небото, преку иконски мотоцикли и тркачки автомобили, па сè до денешните електрични модели што ја дефинираат мобилноста на иднината.

Приказната на БМВ започнува во 1917 година, но не со волан, туку со авионски мотори. Она што започнало во воздухот, продолжило на патот и патеките, во постојан дијалог помеѓу технологијата, дизајнот и општеството. Денес, музејот не е само ретроспектива, туку динамична лекција за иновации и бренд што преживеал војни, кризи и пазарни турбуленции - и секој пат излегувал посилен.

За разлика од многу технички музеи, овој е исклучително прифатлив: цената на билетот за семејство со три деца е 32 евра, додека индивидуалните билети почнуваат од 8 до 14 евра. Потребни ви се најмалку два часа за турата - но искуството се памети многу подолго. Па, да почнеме...

Посетители пред Музејот. Фотографија: Кристијан Бочи/Блумберг

Кога историјата забрзува

По Првата светска војна и забраната за воено производство, БМВ се сврте кон цивилните технологии. Првиот голем чекор? Мотоцикли - меѓу кои се издвојува револуционерниот Р32(R32), со кардански менувач кој стана заштитен знак. Веќе во 1933 година беше лансиран првиот автомобил од сопствен дизајн - БМВ 303, а потоа и легендарниот 328 Роудстер, еден од најуспешните спортски автомобили пред војната.

Втората светска војна ја враќа фабриката кон воените нарачки - повторно се произведуваат авионски мотори, мотоцикли и делови за тенкови. Крајот на војната повторно ја носи забраната и уништувањето на фабриките.

Во 50-тите години, тие се свртуваат кон луксузот со елегантниот БМВ 501.

Возила од серијата М. Фотографија: Теа Јовановиќ

На крајот од деценијата, БМВ запаѓа во криза, но клучен момент доаѓа со влегувањето на семејството Квант, кое останува мнозински сопственик до ден-денес. Нова ера започнува во 1960-тите со моделот БМВ 1500, а наскоро следи експлозија на раст: се раѓаат легендарни серии на автомобили, се основа „БМВ М ГмбХ“ (BMW M GmbH), а Музејот на БМВ се отвора во 1973 година, како симбол на сила и континуитет.

Седумдесетите ја донесоа првата серија 3, осумдесетите светска слава преку Формула 1 и M3 (E30), а деведесетите експанзијата во сегментот СУВ (SUV) со моделот X5 и аквизицијата на брендот „МИНИ“ (MINI). Влегувајќи во новиот милениум, БМВ станува синоним за одржлива мобилност - се воведуваат електрични модели, а на сцена е глобалната експанзија.

БМВ Лимузина 3/15 ps (1929-1931). Фотографија: Теа Јовановиќ

Ќе помислите дека е вселенски брод

Музејот изгледа како футуристичка чинија од која излегуваат мотори, турбини, авиони, мотоцикли и автомобили - сите обединети во еден збор: БМВ. Но, вистинската магија започнува кога ќе влезете внатре. Влезот е организиран како модерна галерија: бели ходници, дискретна сигнализација, светлосни ефекти, тивки аудиовизуелни елементи - сè создава чувство на почит, речиси како да влегувате во некаков храм.

Седиштето на Bayerische Motoren Werke AG (БМВ), лево, е веднаш до музејот (десно). Фотографија: Матијас Доринг/Блумберг

Изложбата е поделена на тематски домови, секој од нив истражува клучни аспекти од приказната на БМВ: компанијата и нејзините корени, мотоцикли, автомобили и дизајн, технологија и, се разбира, мотоспорт.

Домот на компанијата и мотоциклот содржи инсталација од стотици лебдечки метални топки кои ги формираат силуетите на иконските модели на БМВ. Тука навистина започнува патувањето низ времето. Но, ако барате автомобили, нема такви, бидејќи првото нешто на кое ќе наидете се авионски мотори - потсетник дека за оваа компанија, сепак, сè започнало во облаците. Домот на мотоциклите нуди преглед на развојот на двотркалните возила на БМВ од 1923 година до денес.

Мотоцикли кои изградија репутација за сила и издржливост - од 1923 година до денес. Фотографија: Теа Јовановиќ

 

Од тркачки модели до друмски класици, сè е прикажано со германска прецизност и внимание на деталите. Огледалата и светлосните ефекти создаваат оптички илузии, правејќи го просторот речиси магичен. Мотоциклите се позиционирани така што секој експонат раскажува своја приказна за иновација, издржливост и перформанси, а да ги видите одблизу значи да ја почувствувате основата на она што подоцна стана икона на друмската елеганција и моќ.

Домови на автомобили, дизајн и технологија - серии кои обликувале епохи

Конечно она што го барав на почетокот - автомобили! Се нижат сериите 3, 5, 7, па сè до електрични и концептни модели на иднината. Автомобилите се подредени хронолошки и тематски, што овозможува јасен увид во еволуцијата на дизајнот и технологијата.

Секој модел сјае како штотуку да излегол од фабриката, совршено исполиран, со душата на минатото и поглед кон иднината.

Посакувате да седнете, да го свртите клучот и да исчезнете во тосканските ридови. Но, можете да гледате, но не и да допирате. Германските правила се почитуваат и го прават целото искуство уште поексклузивно.

Серија 3. Фотографија: Теа Јовановиќ

Рафинираноста е нешто што го карактеризира музејот на БМВ како целина, бидејќи е како модна писта за автомобили. Секој примерок е истакнат како уметничко дело, а секој детал, од линијата на каросеријата до текстурата на материјалите, раскажува приказна за иновација и визија. Тука наидов на импресивен прототип модел на електричен автомобил кој повеќе личи на бетмобил отколку на автомобил. Откако ќе го погледнете, може само да жалите што оваа светлина не излегува од темнината. Реставрираниот БМВ 507 на Елвис Присли, некогаш изгубен, сега сјаен потсетник на гламур, слава и бесмртна елеганција има посебен сјај.

Ако влезете во домот на технологијата, минатото и иднината ви се сервираат на послужавник. Тука можете да ги видите моторите што напојувале сè, од авиони и тенкови до тркачки автомобили и бродови. Од турбомлазниот мотор БМВ 003, преку радијалниот мотор на авионот БМВ 132, до морскиот Б220З (B220Z) со шест цилиндри.

Фотографија: Теа Јовановиќ

Тука е и легендарниот П75(P75), моторот што го однесе БМВ до победа во Ле Манс. Секој експонат е претставен со технички податоци и историски контекст. Целиот простор зрачи со моќ, прецизност и страст за механиката што ја пренесуваат - ова не е само дом на технологијата, туку и на идеите што го променија светот.

Тркачките патеки во гените на БМВ

Крајот? Па, сè уште ја барам иконската коцка, а знаете и кога ќе стигне шеќерот! На самиот влез во домот на мотоспортот, како чувар пред палатата на кралевите, стои серијата M3 (E30). При влегувањето во овој дом, сè пулсира со адреналин. Заедно со иконските М модели, беа прикажани и нивните најпознати адути од автомобилите на Формула 1, ДТМ ѕверовите и автомобилите што ги освоија патеките низ целиот свет.

Фотографија: Теа Јовановиќ

До нив се наоѓаат оригинални трофеи, шлемови и технички детали што ги оживуваат приказните за победите, рекордите и инженерскате извонредност. Звукот на моторот, мирисот на гумите и сјајот на каросеријата - речиси можете да ги почувствувате. Дури и на еден изложбен модел, имате можност да седнете и да го стиснете гасот. Тука не гледате историја, туку ја доживувате.

Како што се приближувате кон излезот, сè станува потивко. Сите врати полека се затвораат, но се свртувате - со надеж дека има уште еден премин, уште еден дом на визијата. За оние кои сè уште се гладни за естетиката на БМВ, крајот на јуни донесе нова адреса: финиот ресторан „Д клауд“ (THE CLOUD) од Кефер (Käfer), отворен во БМВ Велт (делот каде што можете да ги откриете најновите модели на БМВ, МИНИ, „Ролс-Ројс“). Од почетокот на годината, готвачот Јенс Мадсен, во соработка со дизајнерската екипа на БМВ, работи на концептот Кулинарски номадизам - кулинарска одисеја што комбинира глобални вкусови и локални состојки. Во простор кој буквално лебди над автомобилскиот свет, гастрономијата станува уште една ода на брендот БМВ, неговите почетоци - и облаците.

Ресторан THE CLОUD од Кефер. Фотографија: Преса - BMW Group/Deutschland