Македонски деликатеси: Што сакаат да јадат странците?

За вкусовите не треба да се дебатира, но истражувавме што љубителите на храна од различни страни на светот мислат за македонската кујна и кои јадења ги сметаат за најдобри.

Откако „Тејст атлас“ (Taste Atlas) го прогласи македонскиот ајвар за најдобра закуска во светот за 2023 година и тоа во конкуренција на јадења не само од регионот Адрија, туку и од Хаити, Јужна Африка и Ел Салвадор, странските туристи уште повеќе се заинтересираа за традиционалните рецепти од нашето поднебје.

Истиот онлајн водич подоцна објави листа со 35 најдобро рангирани македонски специјалитети и според корисниците на оваа платформа зелникот е убедливо највкусното македонско јадење. Станува збор за традиционален рецепт од тенки слоеви на кори, полнети со сирење, јајца, праз, киселец или мелено месо.

На оваа листа одлично котираат и сармата и лутеницата, но и македонскиот пинџур кој овој сајт за традиционална храна основан во 2015 година од хрватскиот новинар и претприемач Матија Бабиќ го смести и меѓу најдобрите десет мезиња од зеленчук во светот на високото четврто место.

„Тејст атлас“ неодамна објави и список со девет најлошо рангирани македонски јадења кој предизвика жестока полемика меѓу познавачите на нашата кујна. Овде кукурекот е прогласен за најлошо македонско јадење, иако овој традиционален специјалитет од плетени јагнешки црева многумина го сметаат за деликатес, а популарниот блог за храна и патувања „Чејсинг д донки“ (Chasing the Donkey) го стави на листата со 52 традиционални македонски јадења кои мора да се пробаат.

Гостите во Македонија се со поделени мислења и за надалеку прочуената симит-погача. Додека едни велат дека е „леб во леб“ и го сметаат за најлош македонски појадок, други му се воодушевуваат. Се состои од два дела, симит кој всушност е лепче и погача што всушност е бурек без полнење кој се става во симитот. Најчесто се комбинира со јогурт или ајран.

Овој автентичниот скопски специјалитет како врвно задоволство го нудат организаторите на приватната гурманска тура The 10 Tastings of Skopje достапна на „Трип-адвајзер“ која може да ја доживеете и вие ако сте подготвени да платите околу 100 фунти.

Невообичаен кулинарски специјалитет за кој странците се’ повеќе се интересираат е и прилепскиот ширден кој „Фуд хог“ (The food hog) го смести меѓу најдобрите 50 деликатеси од земјава. Се приготвува со три вида месо-јагнешко, телешко и свинско. Јагнешкото црево служи како обвивка за другите состојки: телешко и свинско месо, кромид, суви пиперки, бибер, сол, доматно пире, зачин, ориз, толчени пиперки, масло и вода. Прво месото се сече на коцки, се меша со други состојки и се остава да отстои 24 часа. Потоа, масата од месо и зачини се полни во јагнешки абомасум кој внимателно се затвора со чепкалка за заби, се полива со масло и вода и се готви два до три часа.

Список со јадења кои не смеете да ги пропуштите во Македонија објави и една од најголемите светски компании за пребарување „ТУИ Груп“ (TUI Group). Авторот Метју Робинсон препорачува од локалните специјалитети задолжително да се проба тавче гравче.

Тавче гравче/Depositphotos

„Зачинет со лито пиперче, динстан неколку часа и сервиран директно од рерна во глинен сад во кој се приготвува-ова е печен грав каков што никогаш порано не сте пробале“, напиша тој.

Овој специјалитет се најде и на листата со пет традиционални македонски јадења кои треба да се пробаат според посетителите на intrepidtravel.com заедно со качамакот (традиционално јадење од пченкарно брашно), ајварот, ќебапчињата и пастрмајлијата.

„Вистинскиот специјалитет за љубителите на месо се наоѓа во Македонија. Потекнува од зборот пастрма, што значи „солено и сушено месо“. Пастрмајлијата е долга пица со овален облик прелиена со свински (или јагнешки) коцки, а често и со пржени јајца. Секој регион во Македонија верува дека нивната пастрмајлија е најдобра“, пишува, меѓу другото, нивниот рецензент.

Пастрамајлија/Depositphotos