Најдобрите визи за работа од далечина: Земјите се борат за дигитални номади

Прочитајте како да аплицирате за некои од најпопуларните визи за дигитални номади ширум светот (анг. digital nomads - фриленсери кои можат да работат од каде било на планетата).

Многу земји, од Костарика до Хрватска, веруваат дека работата од далечина уште долго време ќе биде доминантна и се натпреваруваат да привлечат дигитални номади, дури и во време кога сè повеќе работодавачи бараат враќање во канцелариите.

Бројот на визи за работење од далечина експоненцијално порасна дури и пред пандемијата, при што најмалку 30 земји започнаа такви програми од 2020 година, за да привлечат работници чии работни позиции им дозволуваат да работат од било каде на планетата, според податоците од консултантската фирма Nomad Capitalist, која им помага на претприемачи да се преселат во странство.

Конкуренција

Конкуренцијата веќе почна да се вжештува, бидејќи уште најмалку 12 земји, вклучително и Колумбија, се очекува наскоро да воведат програми за визи за работа од далечина.

Земјите се натпреваруваат за поголем број потенцијални иселеници. Само минатата година имало 15,5 милиони американски дигитални номади, што е над двојно повеќе од бројот во 2019 година, според студијата на MBO Partners. Иако бројот на работници кои имаат таква флексибилност се намалува, веројатно е дека ќе остане поголем во споредба со времето пред пандемијата.

И покрај неодамнешното инсистирање за враќање по канцеларии по Денот на трудот, интересот за работа од далечина во странски земји продолжува да расте, вели Нејт Блечарчик, ко-основач и главен стратегиски директор на Airbnb, додавајќи дека резервациите за престој подолог од 28 дена или повеќе стануваат сè почести.

„Трендот на работа од каде било ќе продолжи, без оглед на плановите за враќање по канцеларии“, вели Кети Гарднер, потпретседателка на одделот за комуникација за работа од далечина на платформата FlexJobs. „Многу вработени за време на пандемијата сфатија дека од дома ги постигнуваат истите успешни резултати како од канцеларија и посакаа слобода кога станува збор за местото од каде што работат“.

Од речиси 50 земји кои нудат програми за дигитални номади, издвојуваме некои од најбараните дестинации и како да аплицирате за виза, според совети од стручњаци. Покрај таксите наведени подолу, можни се и дополнителни такси, а времето за обработка на податоците може да претрпи извесни промени.

Антигва и Барбуда

Оваа островска држава нуди визна програма за престој на дигитални номади во рок од две години. 

· Апликација: Пополнете го барањето на следниот линк: https://nomad.gov.ag/ui/applicationPreForm.php

· Трошоци: 1.500 долари за индивидуално барање, 2.000 долари за барање за две лица, 3.000 долари за семејство.

· Време на обработка на податоци: од пет до седум работни дена.

Аргентина

Во мај, Аргентина најави програма за издавање на дозволи за претстој на дигитални номади, која им овозможува на странците да останат во земјата до шест месеци, со опција за продолжување на дополнителни шест месеци. Програмата е можна само за жители на кои веќе им е дозволен влез во Аргентина без туристичка виза. Додека се чекаат деталите за новата виза што ќе бидат објавени наскоро, номадите можат да аплицираат за работна дозвола.

· Апликација: Барањето за работна виза, за кое можете да прочитате повеќе на следниот линк: https://cancilleria.gob.ar/en/services/working-visa, се поднесува до аргентинска конзуларна канцеларија, со задолжителен доказ за работен однос.

· Трошоци: 250 долари или евра, во зависност од местото каде што се аплицира, како и такса за престој.

· Време на обработка на податоци: Препораката на конзулатот е да се аплицира најмалку 45 дена пред поаѓање.

Бахами 

Програмата за подолг престој на Бахамите - Bahamas Extended Access Travel Stay е воведена во 2020 година и оттогаш нуди можност за живеење на островот во период од една година. 

· Апликација: Пополнете го барањето на следниот линк: https://portal.immigration.gov.bs/

· Трошоци: 25 долари за апликација, 1.000 долари за дозвола по апликант и 500 долари за дете.

· Време на обработка на податоци: До пет дена.

Барбадос

Визната програма Barbados Welcome Stamp им дозволува на лицата кои работат од далечина со себе да го понесат целото семејство, вклучително и домашно милениче - куче, изјави Никол Густас, директорка за маркетинг на International Citizens Insurance. Програмата бара од апликантите да генерираат приход од најмалку 50.000 американски долари за време на нивниот едногодишен престој.

· Апликација: Може да се пополни на веб-страницата на Barbados Welcome Stamp: https://www.visitbarbados.org/barbados-welcome-stamp.

· Трошоци: 2.000 долари за барање за едно лице или 3.000 долари за семејство.

· Време на обработка на податоци: Околу една недела.

Кајмански Острови

Кајманските Острови нудат дигитална номадска виза преку иницијативата Global Citizen Concierge, која овозможува живеење и работа на островите до две години. 

„Кајманските острови се второто најскапо место за живеење во светот, но фактот што овде нема даноци е добра компензација за тоа“, вели Јована Војиновиќ, оперативна директорка на компанијата Nomad Capitalist.

· Апликација: Заинтересираните можат да аплицираат преку веб-страницата на Global Citizen Concierge: https://ourcayman.formstack.com/workflows/gcc_application. Ако едно лице аплицира, се бара годишниот приход да биде најмалку 100.000 долари, 150.000 долари ако аплицираат двајца и 180.000 долари за семејства со деца.

· Трошоци: 1.469 долари годишно за едно до две лица и 500 долари за дете.

· Време на обработка на податоци: три до четири недели.

Костарика

Костарика во јули официјално започна програма за престој за работниците од далечина наречена Stay (Estancia) for Remote Workers and Service Providers. Апликантите треба да достават доказ за минимален месечен приход од 3.000 долари, а во случај на семејство со деца, 4.000 долари. Тие исто така мора да обезбедат доказ за здравствено осигурување. Работниците од далечина можат да ја обноват својата дигитална номадска виза доколку на Костарика поминале најмалку 80 дена.

· Апликација: Странските државјани можат да најдат информации за потребните документи и да ја пополнат апликацијата на веб-страницата https://tramiteya.go.cr/dgme/, или да закажат состанок со службата за имиграција на Костарика за лично да ја поднесат апликацијата.

· Трошоци: 100 долари за апликација и 90 долари за документи за легален престој.

· Време на обработка на податоци: 15 до 30 дена.

Хрватска

Иако земјата технички не издава виза, од 2021 година одобри привремен престој за дигитални номади, односно работа во земјата до една година. Иако оваа дозвола не може да се продолжи, иселениците можат да поднесат ново барање шест месеци по истекот на претходното. Дигиталните номади мора да достават доказ за работа, доказ за потекло од нивната земја, доказ за здравствено осигурување, хрватска адреса на живеење, како и доказ за доволно средства во износ од 17.822,50 куни (2.372 долара) месечно. По пристигнувањето, иселениците добиваат биометриска картичка за престој.

· Апликација: Барањето може да се пополни на хрватската веб-страница за издавање дигитална номадска дозвола: https://digitalnomadscroatia.mup.hr/Pages/Zahtjev2, или во хрватската амбасада или конзулат.

· Трошоци: 420 куни за барање, 460 куни за виза и 310 куни за биометриска картичка за престој.

· Време на обработка на податоци: од 15 до 60 дена.

Доминиканска Република

Доминиканската Република, лоцирана во источниот дел на Карибите, нуди виза за работниците од далечина што им овозможува да останат индивидуално или да останат со своето семејство до 18 месеци, во рамки на програмата Work In Nature (WIN) Extended Stay Visa. Потребно е апликантите да достават потврда за работен однос, здравствено осигурување, како и потврда за жиро-сметка.

· Апликација: Заинтересираните можат да го пополнат барањето на следниот линк: https://windominica.gov.dm/details/application-process

· Трошоци: 100 долари по барање, такса за виза од 800 долари за еден апликант или 1.200 долари за семејство.

· Време на обработка на податоци: од 14 до 28 дена

Германија

Иако сè уште нема специфична виза за дигитални номади во Германија, визата за самовработени овозможува живеење и работа од далечина во оваа земја. Оваа виза се издава за период до три години, а е достапна за фриленсери, како и за претприемачи кои започнуваат бизнис. Во Германија има обврска за плаќање даноци.

· Апликација: Според веб-страницата Make It in Germany: https://www.make-it-in-germany.com/de/, треба да се распрашате за формулари за виза за самовработени во локалната германска амбасада или конзулат, а потоа да закажете формален термин во амбасадата или конзулатот за лично да го поднесете барањето.

· Трошоци: 75 евра или долари за барање и до 100 евра манипулативни трошоци.

· Време на обработка на податоци: од неколку дена до неколку недели.

Грција

Грчката виза за дигитални номади https://workfromgreece.gr/faq/ овозможува живеење и работа во Грција до една година, по што е можно повторно да аплицирате за дозвола за престој.

· Апликација: Контактирајте ја грчката амбасада или конзулат во вашата земја. Може да поднесете барање преку електронска или препорачана пошта.

· Трошоци: 75 евра за апликација и 150 евра за административна такса, според Citizen Remote https://citizenremote.com/visas/greece/.

· Време на обработка на податоци: Грчкото конзуларно претставништво ќе одговори на барањето во рок од 10 дена.

Италија

Италијанската влада во март одобри нова виза за работниците од далечина, но поради изборите во Италија, спроведувањето на новата програма е одложено. Во меѓувреме, номадите можат да аплицираат за веќе постоечки визи.

· Апликација: Иселениците во работен однос можат да најдат упатства и барања за добивање визи, што може да се разликуваат во однос на должината на престојот, на веб-страницата: https://immigration-italy.com/, која ќе ги упати до најблискиот италијански конзулат каде e возможна апликација. Доколку сакаат да останат во земјата повеќе од 90 дена, треба да поднесат барање за виза за самовработување, за која барателот треба да има минимална годишна плата од 8.500 евра.

· Трошоци: 116 евра.

· Време на обработка на податоци: До 90 дена за национална виза.

Малта

Дозволата за номадски престој во Малта (https://nomad.residencymalta.gov.mt/) им овозможува на граѓаните на ЕУ и нивните семејства да живеат и работат на островот една година. Кандидатите треба да имаат бруто годишен приход од најмалку 32.400 евра.

· Апликација: Посетете ја веб-страницата: https://residencymalta.gov.mt/ и пополнете ја апликацијата. Целосната пријава можете да ја извршите преку електронска пошта.

· Трошоци: 300 евра и 27,50 евра за издавање на дозвола за престој.

· Време на обработка на податоци: 30 работни дена.

Мексико

Мексико нуди виза за привремен престој. Оваа програма им овозможува на дигиталните номади да останат и да работат од далечина во Мексико до четири години. Апликантите треба да покажат финансиски извештај од банка кој докажува дека имале 43.000 долари на сметка во секој месец од претходната година, со месечна плата или пензија од најмалку 2.500 долари.

· Апликација: Пополнете го формуларот за апликација за виза на дното на оваа страница: https://consulmex.sre.gob.mx/portland/index.php/spe/ve?sectionid=5&id=63.

Закажете состанок во вашата локална мексиканска амбасада или конзулат за да ја поднесете вашата апликација и да разговарате за специфична виза. Очекувајте кратко патување во Мексико за да ја добиете вашата картичка за привремен престој, а исто така треба да размислите да ангажирате преведувач, адвокат или специјалист за визи.

· Трошоци: 48 долари за виза.

· Време на обработка на податоци: До два месеца.

Португалија

Иако Португалија сè уште не издава специфична виза за дигитални номади, земјата е популарна дестинација за иселениците благодарение на визата D7, која е добра опција за пензионерите и бара минимален годишен приход од 8.460 евра. Доколку номадот сака да си го донесе семејството, потребни се дополнителни 50 отсто од овoj износ за брачниот другар и 30 отсто за секое дете. Визата D7 им овозможува на странците престој во период од една година, а барање за нејзино повторно издавање може да се поднесува после секоја втора година.

· Апликација: Потребно е да се пополни апликацијата за португалска национална виза, како и формуларот за виза D7. После тоа, треба да закажете термин во амбасада или конзулат, за лично да го поднесете барањето.

· Трошоци: 75 евра за виза за привремен престој: https://vistos.mne.gov.pt/en/national-visas/general-information/fees#exemptions, 90 евра за дозвола за престој.

· Време на обработка на податоци: 30 дена за виза за привремен престој.