Дали евтиниот алкохол предизвикува полош мамурлак?

Дали евтиниот алкохол создава полош мамурлак? Дали пиењето поевтин алкохол навистина прави да се чувствувате полошо? Кели, Лос Анџелес, Калифорнија

Ова е една од оние општоприфатени мудрости што се повторуваат толку често, па на крајот се прифаќаат како непобитен факт. Морам да признаам дека и јас верував во тоа додека не тргнав во лов на вистината. Пред неколку години, при обиколка на дестилериите за текила во Текила, Мексико, водичот ми кажа дека поевтините алкохолни пијалаци се помалку филтрирани и затоа прават да се чувствувате полошо кога ги пиете. Тоа ми се виде како добро објаснување за ситуациите низ кои минував во моите дваесетти, па купив шише скап пијалак, кој го ставив во куферот за од прва рака да се уверам во оваа теза. 

Што се однесува до постојните истражувања, рака на срце, не откриваат многу. Постојат студии што го разгледуваат општото влијание на етанолот - односно пиењето алкохол - врз нашите тела, но нема многу истражувања во однос на ефектите на специфични состојки и методологии.

Еден експерт што го најдов, Дејвид Нут од Империјалниот колеџ во Лондон, делумно одговори на моите прашања за мамурлакот користејќи здрав разум.

„Луѓето ќе испијат повеќе евтин алкохол бидејќи е евтин“, вели тој. „Ретко кој може да се опие со шише кларет од 200 долари“.

Мамурлакот е генерално знак дека сме претерале со пиењето - и тоа е првенствено реакција на самиот алкохол. Колку повеќе пиете, толку полошо ќе се чувствувате наредниот ден. Исклучок, како што вели тој, е алкохолот што е толку евтин зашто содржи други работи што генерално се отстрануваат за време на процесот на дестилирање.

Соединенијата и нуспроизводите од ферментираниот алкохол познати како конгенери, како што се ацеталдехидите, метанолот и танините, исто така го влошуваат мамурлакот, според Лаура Вич, специјалистка за клиничка зависност и професорка на Медицинскиот факултет на универзитетот „Вејк Форест“.

„Истражување за мамурлакот покажува дека колку повеќе конгенери има во опојниот пијалак, толку е поголема веројатноста за мамурлак“, вели таа. „Најмалку две студии покажуваат дека се јавуваат потешки симптоми на мамурлак кога се пијат потемни пијалаци, како што е бурбонот, со многу висока содржина конгенери“.

Општо земено, алкохолот станува посветол колку повеќе се филтрира. „Има исклучоци, но тоа значи дека содржи помалку сродни материи“, вели таа.

„Многу специјалисти се согласуваат дека поевтините брендови на алкохол често користат помалку ефективно филтрирање, дозволувајќи повеќе нуспроизводи да влезат во алкохолниот пијалaк, со што се зголемува ризикот од тие несакани мамурлаци“, вели Вич.

Значи, мојот водич не беше многу далеку од вистината. Но потребни се повеќе истражувања поврзани со мамурлакот за да се даде совршен одговор, вели таа.

Така, за жал, дури и од скапиот алкохол ќе ве заболи главата ако пиете премногу. А единствениот сигурен лек е времето. - Кристен В. Браун