text size
Ретка зелена комета, последен пат видена пред околу 50.000 години, треба да помине најблиску покрај Земјата на околу 45 милиони километри оддалеченост на 1 февруари. Наречен C/2022 E3 (ZTF), овој небесен објект потекнува од Ортовиот облак на најоддалечениот раб на Сончевиот систем.
Ледената топка орбитира околу Сонцето еднаш на секои 50.000 години, што значи дека последен пат поминала покрај планетата во каменото доба - кога неандерталците талкале по Земјата.
Д-р Грег Браун, астроном во Кралската опсерваторија Гринич за новинската агенција Прес асосиејшн изјави дека кометата моментално забрзува низ Сончевиот систем и нема да се врати најмалку 50.000 години.
„Сега е вашата шанса еднаш во животот да ја видите. Нејзиниот пат низ нашето небо води низ соѕвездието на змејот Драко и ќе минува помеѓу двете мечки, Голема и Мала Мечка, кон крајот на јануари и почетокот на февруари“, рече Браун.
Зелениот сјај на кометата е резултат на ултравиолетовото зрачење од сонцето кое ги осветлува гасовите што ја опкружуваат нејзината површина.
Кометата неодамна стана доволно светла за да се види со голо око во области со минимално светлосно загадување.
„Иако стана возможно да се види со голо око од екстремно темно место, многу е подобро да насочите двоглед или мал телескоп кон неа. Најлесно за гледање ќе биде посветлата глава на кометата, но, ако имате среќа, може да забележите една од нејзините две опашки како се издигнува од неа “, вели Браун.
.webp){kind=icon}
