Адресата 5 Бис ру де Вернеј во софистицираниот седми арондисман во Париз игра клучна улога во приказната за пејачот и текстописец Серж Генсбур. Куќата и предметите во неа останале непроменети откако Шарлот Генсбур, актерка и музичарка, инаку ќерка од бракот со славната Џејн Биркин, ги зачувала по смртта на татко си пред 32 години.
Покрај неговиот гроб на Монпарнас во Париз, каде што исто така се погребани и Жан Пол Сартр и Симон де Бовоар, кој е еден од најпосетуваните, оваа куќа повеќе од триесет години е своевидно светилиште за неговите обожаватели. Тие сликаа графити, пишуваа цитати и пораки на љубов и му оддаваа почит на контроверзниот уметник, кој е запаметен како голем поет, провокатор и заводник.
Брижит Бардо, Мариса Беренсон, Џејн Биркин, Франс Гал, Кетрин Денев, Ванеса Паради се некои од познатите дами што не останаа имуни на неговиот шарм, ниту приватно ниту професионално, а најчесто и двете. Култниот статус на контроверзен уметник во светот го стекна со песните „Je t’aime... moi non plus“ и „Bonnie and Clyde“, кои ги изведе во дует токму со жените што го обележија неговиот живот – Биркин и Бардо.
Автентичноста на текстовите, често со провокативни, ласцивни, сатирични или субверзивни значења, како и разновидноста на стиловите со кои се занимавал: од џез во раната фаза до шансоната и јеје-музиката, како и подоцнежните скокови во рок, фанк, реге и електронска музика, го прават еден од највлијателните светски музичари.
Богатото животно и уметничко наследство, заедно со музејот, продавницата за книги и сувенири и барот „Генсбур“, кој се наоѓа преку улицата, на бројот 14, сега е дел од првата модна институција посветена на Серж Генсбур - „Мезон Генсбур“ (Maison Gainsbourg,) која во септември ги отвори вратите за првите посетители.
Посетата на куќата е придружена со оригинален саундтрак создаден од групата „Саундволк колектив“, во соработка со Шарлот Генсбур. Саундтракот е збирка од необјавени звучни архивски записи. Во текот на триесетминутното доживување, публиката обиколува два ката со аудиоводство на Шарлот Генсбур, која чекор по чекор повторно ги оживува спомените и анегдотите со својот татко и куќата од нејзиното детство.
Depositphotos
Самиот музеј е дом на предмети, уметнички дела, мебел, фотографии, документи и облека што му припаѓале на уметникот. Збирката вклучува значајни дела, како „l'Homme à Tête de Chou“ од Клод Лалан, оригиналниот ракопис на „La Marseillaise“ на Генсбур и „La Chasse aux Papillons“ од Салвадор Дали.
Постојаната изложба трае речиси еден час и дава увид во светот на Серж Генсбур низ патување што е сумирано во осум хронолошки поглавја. Претставени се речиси 450 оригинални предмети: ракописи, уметнички дела, уникатни предмети, накит и облека што му припаѓале на Серж Генсбур, а потекнуваат од колекцијата „Мезон Генсбур“, неговата обемна документарна архива, како и заеми од институционални и приватни колекции.
На осум екрани се прикажуваат ретки и главно необјавени телевизиски, филмски, радио и фотографски материјали од архивите. Наратор на оваа педесетминутна видеотурнеја е самиот уметник, кој зборува за своето животно патување. Подрумот на музејот е посветен на привремени изложби што истакнуваат некои од клучните настани во неговиот живот и кариера.
Кафулето и пијано-бар „Генсбур“ е инспириран од музичките почетоци на Серж Генсбур како пијанист во париските барови и кабареа. Неговата декорација ги репродуцира атмосферата и стилскиот печат на уметникот. Со тепих со мотив од крин, бели рамки на вратите, прозорци во англиски стил и црни лакирани рамки.
За ручек, „Генсбур“ нуди едноставно и достапно мени за посетителите на музејот и локалните гости. Инспириран од менито на хотелската услуга во собите и британските чајџилници, кои уметникот ги сакаше, овој ресторан служи лесни гурмански оброци создадени од угостителската група „Париз сосаети“ (Paris Society): сендвичи со јастог, кроасан со тартуфи, крцкав зеленчук, паштета од гускин џигер, трио сос од тарам , остриги кадорет (Cadoret #3), гравлакс од лосос, сендвичи со школки.
Куќата на славниот уметник се очекува да пречекува 100.000 посетители годишно, а како што пренесува „Гардијан“, судејќи според висината на цената постигната при продажбата на лични детали на уметникот, таа процена е веројатно многу конзервативна. Имено, во 2012 година на аукција била продадена рачно напишана шопинг-листа на уметникот за 7.700 евра, пишува британскиот весник. Следната година четири догорчиња од цигари од марката „гитанес“ (Gitanes) што ги консумирал Генсбур (и тоа по пет кутии дневно) и една кутија кибрит биле продадени на аукција за 500 евра.
Според официјалната веб-страница на „Мезон Генсбур“, билетите за целото искуство со посетата на куќата и музејот биле распродадени до крајот на годината во истиот миг кога во септември беше лансиран сајтот. Билетите се достапни само за музејот, а цената е 12 евра.
Ако планирате да се почестите патување во Париз следната година и истражувањето на овој уметник е на мапата, информации за достапноста на целокупното искуство моментално можете да добиете ако се пријавите за билтенот.
.webp){kind=icon}
