Односот мајка-ќерка е сложена тема. Кога станува збор за најбогатата жена на светот и нејзината мајка, конфликтот и разликите во карактерот лесно можат да прераснат во национален скандал, што е тема на документарниот филм од три дела на „Нетфликс“, „Милијардерот, батлерот и момчето“ (The Billionaire, The Butler, and the Boyfriend).
Приказната, преку изјавите, документите и сведоштвата на многуте актери на оваа сага, открива поширок контекст надвор од компанијата за убавина, која нуди различни производи, од прифатливи шампони „гарниер“ (Garnier) до поексклузивни кремови „ланком“ (Lancome) и „хелена рубинштајн“ (Helena Rubinstein).
Франсоаз Бетенкур Мејерс, чие богатство според индексот на милијардери на „Блумберг“ изнесува 94,9 милијарди долари, имала тешка и контроверзна врска со својата мајка Лилиен. По смртта на нејзиниот татко, францускиот конзервативен политичар Андре Бетенкур, во 2007 година, таа поминала години борејќи се со мајка си на суд, тврдејќи дека е ментално неспособна и дека била манипулирана од оние околу неа.
Главна причина за тоа е многу блиската врска со пријателот на нејзината мајка, фотографот Франсоа Мари Бание, кој низ годините на дружење добил околу една милијарда евра подароци и готовина. Нивната врска, иако не беше романтична, придонесе за емоционална поддршка на Лилиен, додека таа се чувствуваше осамено во околината на големата палата, како што ја доживува низ сите три дела на оваа продукција. Наскоро тие имаа свој свет во кој немаше место за другите, дури ни за ќерката на Лилиен. Овој правен спор предизвика пошироки правни и политички последици.
Филмот ги истакнува финансиските аспекти и политичкото влијание со убедливи сведоштва и документи. Сè станува уште покомплицирано кога на сцена стапува Паскал Бонефој, батлерот што редовно ги снима разговорите на Лилиен (до крајот останува непознато чија е идејата) со нејзиниот финансиски советник Патрис де Мејстр, кој подоцна ќе биде уапсен и осуден за затајување данок од криење готовина на сметки во швајцарска банка. Исто така се тврди дека на снимките го има разговорот помеѓу Лилиен и Ерик Воерт, тогашен француски министер за труд, кој барал работа за својата сопруга додека водел кампања за санкционирање на богатите затајувачи на данок.
Франсоа Мари Бание/Bloomberg
Покрај тоа, Лилиен наводно добила поврат на данок од 30 милиони евра додека Воерт бил министер за буџет на Франција. Во скандалот на крајот беа вклучени и други француски политичари, вклучувајќи го и претседателот Никола Саркози, поради сомневања за коверт со пари дадени за неговата кампања во 2007 година, се објаснува во филмот.
Во 2013 година, Саркози, заедно со Воерт и други функционери, стана предмет на истрага од страна на обвинителите за различни аспекти на случајот. Во октомври истата година обвиненијата против Саркози беа отфрлени. Сепак, само за некое време. Во последниве години случајот се користеше како дел од поголем сет на обвиненија за корупција за кои Саркози беше осуден во 2021 година за три и помина една година во затвор.
Епилог за другите актери: осудени се финансискиот советник, адвокатот и нотарот. Франсоа Мари Бание, кој првично беше осуден, поднел жалба на одлуката и, иако пресудата му била потврдена во второто судење, казната му била намалена на четири години условна казна и парична казна од 375.000 евра, а другите обврски, за кои претходно му било наложено да ги плати, му биле откажани, вклучувајќи ја и вредноста на подароците и парите што ги добил како подарок.
Зградата на „Лореал“ /Bloomberg
Во 2019 година судијата ги отфрли преостанатите обвиненија, ставајќи крај на оваа правна сага. На батлерот му се губи трагата, Бание сè уште се занимава со фотографија и ужива во околината на францускиот џетсет, а во 2011 година францускиот суд им додели на Франсоаз и нејзините синови Жан-Виктор и Николас Мејерс старателство над Лилиен. Франсоаз веднаш го смени персоналот и донесе нови луѓе. Патрис де Мејстр беше сменет од функцијата, а на негово место дојде нејзиниот сопруг.
По смртта на Лилиен во 2017 година, Франсоаз и нејзините деца го наследиле целиот имот, а последниот тестамент со кој Лилиен сакала да му ги подари својот приватен остров на Сејшелите и дел од парите на Бание никогаш не бил спроведен. Другите врски на ова семејство во историски контекст се исто така предмет на внимание и дискусија, се објаснува во филмот. Имено, Франсоаз Бетенкур Мејерс пораснала како посветена католичка, а се омажила за Жан-Виктор Мејерс, внук на рабин што починал во Аушвиц и поранешен директор на „Нестле“. Овој брак предизвика контроверзии поради поврзаноста на нејзиниот дедо Ежен Шулер со нацистите за време на Втората светска војна. Фармацевтот што го измислил „Лореал“ во 1908 година стигнал на суд поради „економска и политичка соработка“ со нацистите. Тој е обвинет дека обезбедувал финансиска поддршка и одржувал состаноци за групата „Ла Кагул“, француска организација со фашистички идеи, антисемитски и антикомунистички ставови, чиј лидер подоцна основал политичка партија наречена Револуционерно социјално движење. Парискиот суд го ослободи по војната.
Инаку, Франсоаз Бетенкур Мејерс живее многу далеку од гламурозниот свет на својата мајка. Таа има напишано две книги - петтомна студија на Библијата и генеалогија на грчките богови - и е позната по тоа што секојдневно со часови свири клавир. Во реставрацијата на „Нотр дам“ вложи 190 милиони евра.
Филмот до крајот го ангажира гледачот да открие голема тајна во светот на милијардерите, истакнувајќи го главното прашање што останува нерешено: дали Лилиен ќе го потпишела договорот за старателство со Франсоаз ако не била во таква состојба на умот?
На крајот, впечатокот е дека и двете богати жени го живееле својот најголем страв: мајката осамена и изолирана во луксузен дворец, без најдобра пријателка, а ќерката засекогаш лишена од мајчината љубов и разбирање.
.webp){kind=icon}
