Запознајте го стартапот што клонира гласови со помош на вештачка интелигенција

„Илевен лабс“ (ElevenLabs), стартап што користи софтвер за вештачка интелигенција (ВИ) за реплицирање гласови на десетици јазици, обезбеди нов круг на финансирање, што ја вреднува двегодишната компанија на повеќе од милијарда долари.

Од компанијата „Илевен лабс“ објавија дека собрале 80 милиони долари во средства во кои предничи инвестицискиот фонд „Андресен Хоровиц“ (Andreessen Horowitz), со учество на „Секвоја капитал“ (Sequoia Capital), „Смеш капитал“ (Smash Capital) и „СВ енџел“ (SV Angel). Досега компанијата собрала 101 милион долари. Извршниот директор Мати Станишевски вели дека најновото финансирање му дава на неговиот стартап вкупна вредност од 1,1 милијарда долари.

Инвеститорите во технолошкиот сектор великодушно вложуваат пари во стартапи што развиваат алатки за вештачка интелигенција за да генерираат убедливи аудио и видеосодржини, сметајќи на деловните можности во рекламната индустрија и во медиумите. Но тоа ги вознемири истражувачите, кои се загрижени за ширењето на фалсификати и лажни содржини што се користат за измами, порнографија и во политиката, особено годинава, кога половина од светското население ќе гласа на национални избори. На почетокот на минатата година, „Илевен лабс“ изјави дека некои ја користат нивната технологија „за злонамерни цели“.

Станишевски рече дека аудиоснимките што имитираат луѓе без нивна согласност се забранети и ќе бидат отстранети. „Стартапот, кој има 40 вработени, има пет луѓе посветени на умереност и стандардизација и планира да вработи повеќе“, рече тој. „Деведесет и девет проценти од случаите што ги гледаме се во позитивен домен“.

„Со новите средства, компанијата планира да се прошири надвор од својата првична употреба во аудиокниги и видеоигри, во медиумска продукција, како што се синхронизирање филмови или создавање веродостојна вештачка интелигенција“, рече Станишевски. Сепак, ова е кревка амбиција. Широката употреба на вештачката интелигенција во забавната индустрија беше главна точка на расправа за време на неодамнешните штрајкови во Холивуд. Појавата на компјутерски генерирани аудиосодржини, како што е алатката од „Илевен лабс“, предизвика загриженост дека гласовите на актерите и познатите личности може да се користат без дозвола или надомест.

Станишевски истакна дека се надева на партнерство во индустријата за забава. Покрај најавата за финансирање, „Илевен лабс“ воведува нова услуга, која им овозможува на одредени луѓе да создадат вештачка верзија на својот глас, да ја прикачат во библиотека и потоа да заработат пари кога истата таа се употребува од други корисници. Годинава, според Станишевски, клучното прашање е: „Како да се имплементира оваа технологија безбедно и во соработка со индустријата?

Од „Илевен лабс“ разговарале со „повеќето“ од главните агенции за таленти и здруженија на работници во секторот, додаде тој, но не навлезе во детали од преговорите. Стартапот работи и на автоматски функции за емоции и интонација за аудиото со вештачка интелигенција. „Технологијата сè уште не го достигнала тоа ниво“, вели Станишевски. „Вложуваме многу во поврзани истражувања“.